ROM KHUAA MIHAI KUANGA TÎRTÔN PAULA LEKHATHON 2 - PATHIAN LEKHABU IRTHIANG C.L. Bible (BSI)

Pathian roirêlna dik

¹ Khasikin, o mihriam, mi hrilsiatpu tukhom ni inlân, irphilna rêng nei viat no chi ni; mi dang ni irêlna ngeia khan nangma theiloi ni ichang kêng; nangma a rêlpu rêng khomin khaanga sin kha ni tho sa ngai sikin.

² Khaanga tho mihai kha chu Pathianin thiam no an changtirin chu, a itho indik a nih ti ei inhriat;

³ nangma’n ni itho anga thohai thiamno nin changtirin chu, Pathianin nangni a idemna kha lôi hrangin ni irtûng ma ni?

⁴ A ninole, nangni irlettir a nuam sikin Pathian chu khonzâna neiin nangni a nghâk ngai tih inhre loiin satna a nei intamzia le a tuangdiarzia le a entheizia chu a ingainêp ma ni?

⁵ Ni tukullian le ni milung ngar sikin Pathian ningmurna nikhua, dik taka Pathianin roi a rêlna nikhua tika mani hremna bukkhôm chian ni ni.

⁶ Pathianin chu mi tin an sintho ang takin a irêl hrang a ni.

⁷ Roiinpuina hai, chôiindômna hai le irhmang thei loinahai zonga thil sa tho mai maihai kumtuang hringna pe a ti;

⁸ Khannisianlân, mâni hrang vai sapirsia ngita, thutak hnôla, thil dikloi zôm ualhai chunga chu Pathian ningmurna le ninginthikna om a ti.

⁹ Thil sual tho murdihai hrangin intakna hai, chardongnahai om a ti Judahai hrangin om bak a ta, Jentailhai hrang khomin om a ti;

¹⁰ Khannisianlân, thil sa tho murdihai chu Pathian kuang ata roiinpuina hai, chôiindômna hai le irtharngamnahai dong an ti. Judahai dong phot an ta, Jentailhai khomin dong an ti.

¹¹ Pathianin mi theibîk nei mah.

¹² Dân pên tianga om, sualna tho murdi, dân pên tiang irhmang an ti; Dân sûnga om, thil sual tho murdi Dân hmanga an chungchâng rêl ni a ti.

¹³ Dân inhriat sika ni loiin a zôma zôm sika khan Pathian makunga thiam chang thei a ni.

¹⁴ Dân nei loi Jentailhai chu Dân thu tum chu an irsiangpui zia irfûk lam a ni sikin an thoa, dân chu an kuang ipêk ni no khomsian, dân nei ang an ni.

¹⁵ Dân thupêk chu an milunga a irziak a nih ti an omlam ata an lang, an sia le sa inhriatnaa khom an langa an lungrîlhai ar sêla, a kâra thiam an changa, a kâra thiamno an chang ngai.

¹⁶ Pathianin mi tinrêng ngaituana irthup Jisua Krista hmanga a rêl niin chu Thurchi Sa ki insîr anga hin rêl a ti.

Judahai le Dan

¹⁷ Khannisianlân, nang kha, Juda mi nir tia, Dana khan ni’rnghata, Pathian chu a sân ni songa:

¹⁸ Pathian nuamlam khom nin hriat. Dân nin hriat sikin a sia le sa khom nin hriat;

¹⁹ mitchohai hruaitu, inthima omhai in êltu,

²⁰ Mi invêthai hruai invârtu, nâipang irchutirtu tak nia ni irbe ngai; inhriat hrang le thutak zong chu Dân thua hin a om zita nin hriat sikin.

²¹ Mi dang ki’rchutir nir tia, ithoa mo mâni a irchutir loi? Inru loi hrangin mi nir chutira, nangin ni inrûk mo?

²² Uire ni khapa, nangin ni iuire mo? irlim khôkmâktu, nangin millim biakna ina thilhai kha ni inrûk ngai mo?

²³ Dân chu a sâna songin dân chu inchâiin Pathian thang ni insetir mo?

²⁴ “Nangnihai sikin Pathian irhming chu Jentailhai laia hrilinsiat a ni,” ti irziak ang khan.

²⁵ Dan zômin lân chu ni sertan khom kha a sân inlâp a ti; Dân nin châiin chu sertanloi ang chian ni ni.

²⁶ Sertanloiin Dân a zômin chu sertan anga bê a ini loi hrang ma ni?

²⁷ Nangni’n ser nin tana, Dân thu irziak nin neia, khannisian Dân thu chu inchâi nôka, Jentail, taksa sertan loihai chu Dân thu chu an zôm ngit nôka, thiamno nangni an inchangtir hrang a ni.

²⁸ A chungphua ringota Juda mi ki nih ti chu Juda mi tak tak ni mah, taksa ringota sertan chu sertan tak tak ni nôk sa mah;

²⁹ aniachu, sûngrîla Juda mi ni chu, Juda tak tak chu a nia, sertan tak tak khom kha milung tianga a nia, Lekha thu ringota ni loiin irtha tiang a ni ual. Khaang mi chu mihriamin chôiindôm nohai khomsian Pathianin chôiindôm a ti.