ROM KHUAA MIHAI KUANGA TÎRTÔN PAULA LEKHATHON 16 - PATHIAN LEKHABU IRTHIANG C.L. Bible (BSI)

Mimal chubai mûkna

¹ Ei farnu Foibi, Kenriai Koiindanga sinthotu hi, a hmêl nangni inhriattirna nei ki nuam a ni.

² Rengpa irhminga mi irthianghai ti irhoi anga lei lôm hrang le changpui nangna kipa lei changpui hrangin nangni ki nuam a ni. Ama khom hi mi tamtak lei changpui ngai a nia, keima ngei khom a ni changpui a ni.

³ Priskili le Akuila, Krista Jisuaa ki sinthopuihai kha chubai ni mûk pe roi;

⁴ khahai khan ki hringna inzôkna hrangin thi khom an irhuam a ni. Keima vai ni loiin Jentail koiindang murdi khom an chunga an ilôm a ni.

⁵ An ina Koiindang inkhômhai ngai kha chubai ki mûk a ni. Ki rual lungthung Epaineta, Asia rama Krista iam masatak kha chubai ni mûk pe roi.

⁶ Mari, nin ta hranga dengthei taka sinnu kha chubai ki mûk.

⁷ Andronika le Junia, ki chipui le ki intângpuihai kha, chubai ki mûk; anni chu tirtônhai laia irhming inthang tak an nia, ki’rthûla Krista iam masa an ni.

⁸ Ampliata, Rengpaa ki rual lungthung tak kha, chubai ki mûk.

⁹ Kristaa ki sinthopui Urbana le ki indit tak, Stakua kha chubai ki mûk.

¹⁰ Kristaa mi tak, Apelia kha chubai ki mûk. Aristobula in sûng mihai chubai ki mûk.

¹¹ Ki chipui, Herodiona kha chubai ki mûk. Narkisa hai in sûnga mi Rengpaa omhai kha chubai ki mûk.

¹² Trufaini le Trufosi, Rengpaa a satêna sinthohai kha, chubai ki mûk. Ki rual satak Persi, Rengpa hranga a satêna sintho ngai kha, chubai ki mûk.

¹³ Rengpa sinthoa mi langsâr tak Rufa le a nu, ka nu ni sa khom kha, chubai ki mûk.

¹⁴ Asunkrita hai, Flegona hai, Hermia hai, Patroba hai, Herma hai, an kuanga urêng omhai leh khan, chubai ki mûk.

¹⁵ Filologoa le Juli, Nirea le a farnu le Olumpa, an kuanga mi irthiang om murdi chubai ki mûkhai.

¹⁶ Tum irthiangin irchubai irhlôm unglân, Krista Koiindang hin chubai nangni kin mûk a ni.

Inthorna hnungkhôn

¹⁷ Urênghaio, irchutirna thu nin idongna lama nin laia irsenna le tûkna insuaktuhai ata irdîn unglân, anni kha irheisan hrangin nangni ki nuam a ni.

¹⁸ Khaang mihai khan ei Rengpa Krista sintho mahai, mâni phîngpui sintho chian an ni. An chong hmang thiam le chong hoiin mi’nmôlhai kha an huanghai ngai a ni.

¹⁹ Thurchi Saa nin detzia mi tin inhriat a nia, khasikin kei khom nin chunga ki ilôm a ni. Nikhomsianlân, thil sa tianga vâra, sualna tiang irkiang ki inuam a ni.

²⁰ Irngeina Pathian khan Setana kha nin ke hnuaia nangni insirphatir a ti. Ei Rengpa Jisua Krista lungkhamna kha nin kuang om ri se.

²¹ Ki sinthopui Timothea le ki chipui Lukia hai, Jasona hai, Sosipatera hai hin chubai nangni an mûk.

²² Keima, Tertia, hi lekha thon irziaktu hin, Rengpa irhmingin chubai nangni ki mûk a ni.

²³ Ki tungna in pa, koiindang inkhôm dongtu Gaia hin, chubai nangni a mûk. Kho sum enkoltu Erasta le a urêngpa Kuarta khomin chubai nangni an mûk.

²⁴ Ei Rengpa Jisua Krista lungkhamna kha nin rênga kuang om ri se. Amen.

A mongna chongchai

²⁵ Pathian chu chôiindôm ei ti; Ama’n chu Jisua Krista thu, Thurchi Sa ei ihril le tiana thurîl irthup lei inpuang tâk ang khan nin iamnaa det takin nangni an dettir thei a ni.

²⁶ Atûn hin chu thu irthup ngai kha deipuhai Lekhaa a hong inlanga, tukhomin an iama an zôm theina hrangin kumtuang Pathian thupêk anga nam tin laia inhriattir a ni ta.

²⁷ Pathian omsun, vâr tak, Jisua Krista sikin kumtuangin roiinpuina om ri se. Amen.