ROM KHUAA MIHAI KUANGA TÎRTÔN PAULA LEKHATHON 11 - PATHIAN LEKHABU IRTHIANG C.L. Bible (BSI)

Israelhai chunga Pathian lungkhamna

¹ Khante, Pathianin a mihai kha a ipai thâk mo ei iti hrang? Pai thâk mak e. Keima ngei khom Israel mi, Abrahama irchi, Benjamina nam ki ni.

² Pathianin a phuta a inthang, a mihai kha pai thâk viat mah. Elija thurchi Pathian Lekha thua chuang kha nin inhriat loi ma ni? Ama khan Israelhai chungchâng Pathian kuang an tungtira:

³ “Rengpa, ni deipuhai an thata, Ni maichâmhai an inchimtira, Keima vai ki la oma, Kei khom ni thatpai an itum a ni,” tiin.

⁴ Khannisianlân, Pathianin itin mo a sâm kha? “Baala makunga khûksadel ngai loi mi sângsari keima hrangin ki la hôi mai a ni,” tiin a isâm a ni khate.

⁵ Atûn khom khaang dên khan Pathianin a lungkhamna sika a inthang suakhai tômte an la om.

⁶ A lungkhamna sika inthang suak an niin chu, a sintho sika ni thei mahai; khaang khan ni sian, lungkhamna kha lungkhamna ni thei no ni.

⁷ Itin mo a ini hrang tâk? Israelhai khan an izong kha hmu mahaia, Pathian inthang tômte vaiin an hmua, mi danghai rêng rêng chu an sêt zoi zit tâk a ni.

⁸ “Pathianin a vuan tena hin lungrîl inmusu irtha a pêka, mit hmu thei loi le beng inhre thei loi le ile,” ti irziak ang khan.

⁹ Khan, Davida khan, “An hruaithe kha an ta hrangin châng le bil ni sianlân, Tûkna le thuanna ni ri se;

¹⁰ An hmu thei loina hrangin an mit kha zîng sianlân, puak rikin irkul mai ri se,” a tia.

¹¹ An tûk sikin an itûk theng thaina hrang mani, ti nôk inlân? Tûk theng thai mak! An tûk sikin Jentailhai kuang saninhringna a zuang tunga, Israelhai irzukna hranga a ni.

¹² Khaang khan, an tûk luan rammual irchongna a nia, an hlosamna man Jentailhai irchonga a niin te, an hong kop irkip tena len vâng chu itin tak mo a ini hrang tâk!

Jentailhai Saninhringna

¹³ Nangni Jentailhai kuang thu ki insîr a ni. Keima hi Jentailhai hranga tirtôn ki ni sikin ki sinthôna sin hi ki inhlu a ni;

¹⁴ Ki chipuihai nangni kin hnarsatira, senkhat lua ki saninhring theina hrangin.

¹⁵ Anni pai thâkna lua rammual hi Pathian ruala siam nôkna a ni’n chu, anni lômlût nôkna chu thina ata hring nôkna ni no ni mo?

¹⁶ Bai tiam masa tak kha Pathian kuang inhlan irthiang a ni’n teh, a pumpuiin irthiangtir a ni. Khan, thing khom a’rzung a’rthiangin chu a ônhai khom a irthiang a ni.

¹⁷ Oliv thing ôn senkhat kha sât thâkin, nangni oliv dolhai kha oliv kunga khan zom nin nia; irzung sa kha nin thop sa tâka.

¹⁸ Ôn danghai ata kha irsor khom unglân a’rzung infâtu ni mak chêi, a’rzungin nangni a infa a ni.

¹⁹ Khan, nangma’n, “Ki izom hrang ônhai kha sât thâk kêng a ini,” ti ni ti.

²⁰ Ni ti indik; an iam no sikin ikhiakpaiin an oma, nang chu ni iam sikin izom ni ni, lârirpâkpui no roh, chi ual roh.

²¹ Pathianin a ôn takhai kha a hôi no’n chu nang khom nang hôi ual no ni.

²² Pathian satzia le ichiomzia hi ngaitua ta; a tûkhai hrangin ichi a oma, a satnaa ni om maiin chu, nangma ta hrangin chu a isa a ni, ni om mai no’n chu nang khom sât thâk ni ni ti.

²³ Khan, anni khom iamloia an om mai no’n chu izomin om nôk an ti, Pathianin anni kha a zom nôk thei a ni.

²⁴ Nang oliv dol ata sât thâk lua, suak dân pangai ang loia oliv thing saa zom ni ni’n chu oliv dik tak ôn kha thing dika khan zom ol ual ok a ti!

Israelhai indingtir nôkna

²⁵ Urênghaio, hi thu’rthup hi nin inhriat loi nuam ma ung; khano’nchu ki vâr dên lei irtina nin ti; Jentailhai an kop irkip mâka chu Israel mi senkhathai chunga hnangrakna la zuang tung bak a ti, ti hi.

²⁶ Kha tika khan kêng Israel mi murdi saninhringna an iom hrang a ni. “Zion ata Saninhringna kha a zuang isuak hrang a ni, Jakoba kuang ata Pathian ngaisak loina inboi a ti,

²⁷ Ama kha an kuanga ki thuthung hrang chu a ni. An sualhai ki lâkpai tika chu,” ti irziak ang khan.

²⁸ Thurchi Sa an hnôl sikin Judahai chu Pathian râl an nia; nangni dongtum a saa; Khannisian, Pathianin an thang sikin irchibulhai zâra a rual lungthunghai an ni.

²⁹ Pathianin mi, sat a ivur tâk le a inthang tâk chu sut nôk thei ni ta mah.

³⁰ Tiana khan chu Pathian thu zôm no sikin a lungkhamna nin dong ta a ni.

³¹ Khaang dênin, atûn hin nangni’n lungkhamna nin dong sikin anni khomin lungkhamna an dong sa theina hrangin atûn hin an la iiam loi a ni.

³² An rênga chunga lungkhamna an langtir nuam sikin Pathianin mi murdi iamloinaa a ikhum zit ta a ni.

Pathian inpâk roi

³³ Pathian irchongzia, a vârna le an hriatna kha an thûk bâka! A roirêl lam khom inhriat phâk loi zât, a lampuihai kha sui suak thei zât a ni no bâka!

³⁴ Pathian Thu bu khan, “Rengpa lungrîl chu tu mo an hriata, Tu mo a roizêknaa chang tâk?

³⁵ A thuan nôk hranga thilpêk, Tu mo om ngai?” ti hi.

³⁶ Thil murdi hi ama ata zuang om, ama sika le ama hranga om a ni. A kuang kumtuang roiinpuina kha om ri se. Amen.