ROM KHUAA MIHAI KUANGA TÎRTÔN PAULA LEKHATHON 10 - PATHIAN LEKHABU IRTHIANG C.L. Bible (BSI)

¹ Urênghaio, ki chipuihai kha saninhringin omhai sian tih hi ki inuamlam le Pathian kuanga ki ingên tak ngai a ni.

² Pathian ta hranga sathnem ki’rngai irkhêlzia kin hriat, inhriat infel loiin sathnem an irngai a ni.

³ Pathianin mi thiam an changtir lam inhre thiam mahaia, an lampui an hro ngita, Pathianin thiam an changtir dân hnuaia irpelût nuam mahai.

⁴ Krista chu dân famirkiptirtu a ni, a iam murdihai thiam inchangtira an om theina hrangin.

Mi murdihai hranga saninhringna

⁵ Mosia’n chu dân zôm sika thiamchang chungchâng thu, hiang hin a’rziak: “Dân zômtu chu hring a ti,” tiin.

⁶ Iamna sika thiam changna thu rêk chu, “Tu mo irvâna lui hranga?” (ama kha chung tiang ata tu mo Krista zuang hruai hrang tihna a ni.)

⁷ “Tu mo irnêng rîla zu fe hranga? (ama kha thina ata tu mo Krista a hong ihruai hrang tihna a ni) mo nin lungrîlin ti no roi,” a tia.

⁸ Khante, imo a iti? “Thu khan nang a nâi, ni bâi le ni lungrîla a om,” a ti. Thu ti hi iamna thu ei insîr hi a ni.

⁹ “Ni bâiin Jisua kha Rengpa a ni tiin ni thopa, thina ata Pathianin a kaithoi ti ni lungrîla ni iamin chu saninhringin om ni ti,” tiin.

¹⁰ Lungrîla iam chu thiam inchangtir an nia, bâia thop chu saninhringin an om sa ngai.

¹¹ Pathian Lekha thu’n, “Tukhomin a iam chu mualinphoi no nihai,” a iti a ni.

¹² Juda mani, Grik mani ite danglamna om ual mah; Rengpa inkhat chu an rênga Rengpa a ni; ama irlamtu murdi hrangin itinrêng a nei intam a ni.

¹³ “Tukhom Rengpa irlamtu murdi chu saninhring ni an ti,” ti a ni.

¹⁴ An iiam loi chu itin mo an irlam hrang? An inhriat loi chu itin mo an iiam thei hrang? A hriltu om loiin teh itin mo an inhriat hrang?

¹⁵ Tîr an ni no’n chu tu’n mo hril hrang? “Thil sa thurchi hong hriltu ke chu a va sa vang na!” ti irziak ang khan.

¹⁶ Khannisianlân, Thurchi Sa chu an rêngin iam zit mahai. Isaia ngei khomin, “Rengpa, kin thu’nsîr hi tu’n mo a iam?” a tia.

¹⁷ Khanchu, thu chu inhriat sikin iam a nia, thu kha chu Jisua Krista thu kha a ni.

¹⁸ Khante, an mikuarin an inhriat ngailoi tak tak ma ni? Inhriat e: “An irhâi chu ram tina an thanga, An thu chu kôlkung dênin an thang suak ta,” ti a ni.

¹⁹ Israel mihaiin an inhriat ngailoi ma ni? “Irchia tep kâiloihai chu nang inhnarsatir ki ta, Irchia vâr loihai sikin ning nang ni inmurtir ki ti,” tiin Mosia khan an sîr masaa.

²⁰ Isaia’n chu hâi nôk ualin: “Ni zong loihaiin an ni hmua, Ni’rlamloihai kuang ki inhriattira,” a tia.

²¹ Israelhai chungchâng thua chu, “He lâkloi le tehelzong mihai ta hrangin sûn misa tâkin ki bân ki phar ngai,” a tia.