ROM KHUAA MIHAI KUANGA TÎRTÔN PAULA LEKHATHON 1 - PATHIAN LEKHABU IRTHIANG C.L. Bible (BSI)

Chubai mûkna

¹ Paula, Jisua Krista suak, tirtôn hranga koi, Pathian Thurchi Sa hril hranga indangtu khan;

² Kha Thurchi Sa kha, Pathianin a deipuhai hmangin a Lekha irthianga a lei inkung tâka;

³ A Nâipa, ei Rengpa Jisua Krista thu chu taksa tiang ei suiin chu Davida irchia suak a nia,

⁴ a irthiangna irtha tianga chu sinthotheina’n Pathian Nâipa a nizia an langtira;

⁵ kha sika khan Pathianin nam tin laia mihai iama tak insôntir hrangin tirtôn nina sintum an inhlan a ni:

⁶ Nangni khom khaanga Krista mihai ni hranga koi nin nia:

⁷ Pathianin a lungthung le ama mi irthiang ni hranga a ikoi Rom khuaa mihai chubai nangni ki mûk a ni. Pathian ei Pa le Rengpa Jisua Krista kuang ata lungkhamna le irngeina nin kuang om ri se.

Paula’n Rom hro a’rzukna thu

⁸ Nin iamna thu ram tina an thang sup sup sikin Jisua Krista zâra nangni sikin Pathian kuang lômthu ki insîr phot bak a ni.

⁹ Ki chongchainahai khan nangni kin hriat mai ngai a ni, a dik taka a Nâipa Thurchi Sa insîrin ki lungrîl murdi’n a sin ki tho ngai, Pathian kha nin hriatpuitu a ni.

¹⁰ A sa a iti rua a ni’n chu atûn hin lua nangni ki hong hro theina hrangin Pathian ki ngên mai a ni.

¹¹ Nin det nôk ualna hrangin irtha tiang thilpêk nangni indongtir hrangin nangni hmu ki’rzuk tak tak a ni.

¹² Ki iamna le nin iamna irfa irhlôm hi ki irzuk a ni, ei irchangpui irhlôm theina hrangin.

¹³ Urênghaio, nangni hong hro ki tum maia, khannisian, inchum loina a lei om nôk ngai ti nin inhriat ki inuam a ni. Jentail danghai laia ra ki hmu ngai angin nin laia khom ra hrang hmu ki isabei a ni.

¹⁴ Grik mi le Oze mihai, mi vâr le mi’nmôlhai kuang lâkai ki nei:

¹⁵ Khasikin kêng nangni Rom khuaa omhai kuang khom Thurchi Sa hril hi ki irzuk tak tak a ni.

Thurchi Sa sinthotheina

¹⁶ Thurchi Sa hi inzakpui ma ung, tukhom, a iam murdi saninhringna hranga Pathian sinthotheina a nia; Judahai hrangin a ni phota, Jentailhai hrang khom a ni nôka.

¹⁷ Hi hin iamna sika vai Pathianin mi thiam a inchangtir lam a hong inlang ta a ni, Pathian Thu bu’n, “Iamnaa mi fel chu hring a ti” ti irziak ang khan.

Mihriamhai sualna

¹⁸ Irvân ata Pathian ningmurna kha mihriamhai Pathian uksak loina, sualna le felloina murdi chunga a zuang inlang a ni; an sualna sikin thutak kha a khâl khaka,

¹⁹ Pathianin an hriattir tâk sikin, Pathian thurchi inhriat hrang mihai chu an lungrîla inhriattirin a lei om tâka.

²⁰ A nina, mita hmu thei loi, a kumtuang sinthotheina le a Pathianzia kha rammual siam irphut ata a thil siamhai chu fel taka hmu theiin an langa. Irphilna hrang zel nei mahai.

²¹ Pathian chu inhriat chakin, Pathian angin chu chôiindôm mahaia, lômthu khom hril mahai; thil chanlamboi an ngaitua tâka; an lungrîl invêt chu an thim zoi ta.

²² Vâr an irti nâkin, a sân an invêt tâk a ni.

²³ Thi theiloi Pathian roiinpuina chu thi thei mihriam hai, va hai, sa ke minli neihai le thilhring irlim ang dênin an inchangtira, chubai an mûka.

²⁴ Khasikin, an milung irzuk lam thil porinchehai tho hrangin Pathianin ar heisanhaia, inzakpui hrang angin an iom tâk a ni.

²⁵ Pathian thutak nêkin milak an inthanga, a siamtu biak nêkin a isiam kha biakin a sin an tho tâka. A siamtu chu kumtuanga inpâkin om ri se. Amen.

²⁶ Khasika khan kêng Pathianin inzak taka an ihur kha phalin a irheisanhai tâk a ni; an nupanghai khomin an omlam dân kha paiin dân no angin an oma;

²⁷ an pasalhai khom nupang hmang lam dân pangai mâksanin, hurin an irhnarsa irhlôma, pasal le pasal saloi takin an lênga. An taksa ngeia an sual ra kha an ihmu a ni.

²⁸ Khanchu Pathian inhriatna dik kha an inthâ tâk sikin an ngaituana felloi tak anga om hrangin Pathianin a’rheisanhaia, an tho loi hrang hrang khom an tho tâk a ni.

²⁹ Fel loina chi tinrêngin an hong sip tâka, sualna hai, huatirhamna hai, mi that hai, irngôna hai, irhuangna hai le irkhôkmâkna haiin an sip ta.

³⁰ An irnuisoa, an irhrilsiata, Pathian an khôkmâka, an irlôi irhlôma, an irpâka, an irsonga, thil saloi thar an uar suak nôk maia; an nu le pa mahrip tho mahai,

³¹ tûte uksak mahaia, milung nei loi, chonginkung insiat, izirpui lungkhamna nei loi, inrenna nei loi an ni.

³² Khaang thil thotuhai chu Pathianin a inkung ang dêna thi inruk an nih ti an inhriat nâkin, nakhrâtin an tho maia, mi dang a thohai khom an la pompui sa ngai a ni.