ROIRÊLTUHAI 9 - PATHIAN LEKHABU IRTHIANG C.L. Bible (BSI)

Abimeleka

¹ Gideona nâipa, Abimeleka chu Sekem khuaa a nu ina khan a fea, a nu insûng mihai le a nu panamhai kuang,

² “Sekem mihai hin, Gideona nâi sômsarihaiin nin chunga roirêl ri seh mo nin ti, mi inkhat vaiin mo, hril roi, nin tia ni’n chu kei hi nin nâihai laia nin thisen irzompui omsun ki ni, nin inhriat mai hrang a ni” a tia.

³ A nu nuchahaiin Sekem mihai kuang kha thu kha an hrila, Abimeleka hnungzui chu an nuam tâka, “Kin urêngpa a ni tâk hi te,” an tia.

⁴ Khanchu, Baal-berith an biakna in ata tangka sum sômsari an pêka, kha sum leh khan Abimeleka’n mi inriang tak tak le mi hmanghmunboihai a hruaihaia, anni’n ama an zui tâka.

⁵ A pa insûng mihai omna Ofra khuaa khan a va fea, Gideona nâihai, a uhai sômsari chu lung inkhat chunga a that tôla, nâipangtak Jothama rêk chu ar bîka, that mahai.

⁶ Khanchu Sekem mi le Bethmilo mi murdi chu an irbukkhôma, Sekem kôla Saiso thing hnuaia Abimeleka chu rênga an siam tâka.

⁷ Kha kha Jothama an hrila, Gerizim tâng sîpa khan a fea, theitôpin a khêka, hiang hin a tia, ‘Sekem mihaio, ki thu hi irngai u ta, Pathian khomin nin thu a irngai hrang a ni.

⁸ Voikhat chu rêng inthang tumin thing murdi an irbukkhôma, oliv thing kuang, “Nang kin rêng ni hrangin om ro,” an tia.

⁹ Oliv thingin, “Pathian le mihriam chôiindômna hrangin an ni hmang tak, ki hriak hi suaksanin thinghai chunga hi tiang kha tiang ki isem vêl thei hrang mo?” a tia.

¹⁰ Theipui kung kuang, “Nang hongin lân, kin rêng hrangin om ro,” an tia.

¹¹ Khannisianlân, theipui kungin an kuang, “Ki thumna le ki ra satak hi suaksanin thinghai chunga hi tiang kha tiang ki isem thei hrang mani?” a tia.

¹² Khan grep hrui kung kuang, an fea, “Nang ngêt, hongin lân, kin rêng chang hrangin om roh,” an tia.

¹³ Grep hruiin, “Nangni rêng hrangin om ta inlân, Pathian le mihriam inlômtu, uain sômna hrang grep ra nei hrang mo ki la nia,” a tia.

¹⁴ Inhnungkhôn taka chu, thing murdi chu thing ilhlingnei kuang an fea, “Nang hi chu kin rêng ni ichang ngêt hrang a ni,” an tia.

¹⁵ Thing ilhlingneiin, “Rêng ni hrangin nin ni nuam tâkin chu ki kung hnuaia hin hong roi; nin hong nuam no’n chu ki ôn ilhling rengata mei hong suak a ta, Lebanon Sidar-hai kâng fâi zit a ti,” a tia.

¹⁶ Jothama’n a hril zêla, “Abimeleka rênga nin isiam hi dik le fel tak tho mo nin ni? Gideona chu a sintho irphu ang ngei ngaisângin, a insûng mi khom dik takin nin chôiindôm nuam mo?

¹⁷ Inhre roi, ka pa, Gideona’n Midian mihai kut ata nangni a sansuaka, thi irhuamin irnak a isong a ni kha.

¹⁸ Atûn hin chu, ka pa insûng mihai chunga nin doia, a nâipasal sômsari chu lung inkhat chunga nin thathaia, a siahlonu nâipa, ni irzirpui nâi Abimeleka hi Sekem khuaa mihai rênga nin hong isiam tâk a ni hi.

¹⁹ A vuan sûn hin Gideona le a insûng mihai chunga thil diktak le feltak nin tho’n chu Abimeleka chu lômtakin zui unglân, ama khomin nin chunga lôm ri se.

²⁰ Khaang khan a ni no’n chu, Abimeleka rengata mei hong suak sianlân, Sekem le Bethmilo mihai rengata mei hong suak sianlân Abimeleka chu kâng ri se,” a tia.

²¹ A upa Abimeleka a china sikin Jothama chu a rot intâna, Beer khuaa a va om tâka.

²² Abimeleka’n Israelhai chunga kum thum rêng a changa.

²³ Abimeleka le Sekem mihai chu Pathianin a’rdoitirhaia, Sekem mihaiin Abimeleka chu vârirlek takin an doi tâka.

²⁴ Gideona nâi sômsarihai chunga rông taka an that sikin an thisen phuba mophurna chu Abimeleka le ama thoptu Sekem mihai chunga a chum tâk a ni.

²⁵ Sekem mihaiin tâng sîpa Abimeleka lei inruang hrangin mihriam an siahaia, kha mihai khan tukhom kha tianga hong kai chu an lei long polhai ngai. Kha thurchi kha Abimeleka an inhrila.

²⁶ Khan, Ebeda nâipa Gaala chu a sangpahai leh Sekem-ah an hong; Sekem mihaiin an lei iam zoihaia.

²⁷ Khanchu, loihaia an fea, grep rahai an irhmala, kût an hmanga, an pathian ina an lûta, an fâkin an ina, Abimeleka chu khua an sâla.

²⁸ Ebeda nâipa Gaala’n, “Sekem mihai hin imo an inhriata? Itho mo Abimeleka sin nin itho pe? Gideona nâipa kha mo ni ma? Zebula lak hi a thu thua om a nia. Nin pu Hamora irchihai sin hi tho ual roi ba.

²⁹ Hruaitu ni inlân chu Abimeleka hi inhnotsuak ngêt ki ti. Abimeleka, sipai lâk sa’n lân, hong suak ro, irdoi ei ti, ti ngêt ki ti,” a tia.

³⁰ Khua hruaitu Zebula’n, Ebeda nâipa Gaala thuhril an hriatin chu a sân a ning an mur tâka.

³¹ Abimeleka kuanga inrûktein palâi Aruma-ah a tîra, Sekema Ebeda nâipa Gaala le a urênghai an honga, khuaa mihai hi ni chunga irdoina siam hrangin an inphûthai tâk.

³² Khasikin, zân zâna hongin lân, ni mihai kha hong hruaiin lân, rama lei inruanghai hrangin thupinrûkhai roh.

³³ Zîng taka thoiin lân khopui chu hong irhualrup zel unglân, nangni doi hrangin Gaala le a mihai hong suak chu nin nuamlam ang takin lôhai roi,” a tia.

³⁴ Khanchu, Abimeleka chu a mihai leh a zân zânin an irthoka, an suaka, hmun minlia irsemin Sekem khua chu an irhuala.

³⁵ Ebala nâipa Gaala chu a hong suaka, kul mikota khan a ngîra. Abimeleka le a mihai chu an irbîk inrûkna ata an hong suaka.

³⁶ Gaala khan mipuihai a hong hmu’n chu Zebula kuang, “En ta, tâng rengata mipui an hong suak,” a tia. Zebula’n, “Tâng irhlîm so mihriam mani tiin ni ihmu’nsual ni a ti,” a tia.

³⁷ Gaala’n, “En ta, tâng bula so! mi an hong suak ngei so te, pôlkhat dang khom Meonenim rengata an hong so te,” a tia.

³⁸ Zebula’n hi ang hin a ti tâka: “Abimeleka hi tu mo a ini, a sin kin itho pe hrang? tia ni ihrilna chongbâi kha khôn mo a om tâk? Ni ihmumâkhai tak tak kha an ni so. Suakin lân, va doihai ta ro,” a tia.

³⁹ Gaala’n Sekem mihai chu a hruaisuaka, Abimeleka chu a doia.

⁴⁰ Abimeleka’n a’rzûla, an tân tâka. Kul mikot bul dênin mi tamtak pop chitin an irtet phura.

⁴¹ Abimeleka chu Aruma khuaa om a nia. Zebula’n Gaala le a urênghai chu Sekem rengata an hnotsuaka, om thei ta mahai.

⁴² Tûk nôka chu Abimeleka’n Gaala le a urênghai chu Sekem khua pên tiang an intân suak hrang ti an hriatin,

⁴³ a mihai chu a hruaihaia, pâl thumin a sena, pên tiang a lei inruanga. Mihai chu an hong suaka, a thoia, a doi tâka.

⁴⁴ Abimeleka le a mihai chu kul mikot bula inrang takin an intâna, an va nghâka, a rualhai pâl hnihai’n pên tianga lei suak tâkhai kha an irzûlhaia, an that zita.

⁴⁵ Abimeleka’n khua chu sûn sôtin a doia, a lâk tâka. A sûnga mihai chu a thathaia, khua chu an siata, michi a phul zuta.

⁴⁶ Sekem khuaa hruaitu lian ual ualhai chu Baal-Berith biakna in kul kilkhôra khan an intân khôma.

⁴⁷ Khuaa hruaitu ual ualhai an intân khôm thu chu Abimeleka’n a lei inhriata.

⁴⁸ Zalmon tânga khan Abimeleka chu a hong luia, a mihai murdi’n an zuia, Abimeleka’n hrei lian a lâka, thing ôn a tuk thâka, a dâra a’rputa; a mihai kuang, “Ki itho lam ang takin nangni khom tho roi,” a tia.

⁴⁹ Abimeleka mihai murdi chu thing ôn an lâk chita, Abimeleka itho angin kul kilkhôra khan an sia zêla, kul kilkhôr chu an hâl khum tâka; khuaa hruaitu ual ualhai khom chu an thi zit tâka, pasal le nupang tepin sângkhat vêl an thi.

⁵⁰ Abimeleka chu Thebes khuaa a fea, a’rhuala, a lâk tâka.

⁵¹ Khuaa khan in irsâng inkhat, iamom tak hi a oma. Kha khan mi murdi nupang pasal, khuaa hruaituhai leh an hong intân khôma, an irkalkhum khaka, in irsâng sîp inzôla khan an hong luia.

⁵² Abimeleka chu in irsâng bula khan a hong fea, lampui chu hâl tumin a va nâia.

⁵³ Nu inkhatin bu nôina lung chunginta ual hi a lua a zu’nthâka, a lubûr chu a koi tâk.

⁵⁴ Ruatharte, a râltukfam pêlpu chu, a koi lata, “Ni khandai kha lan lân, ni that ro, mi’n nupang ithat kêng tina duai an ti,” a tia.

⁵⁵ Ruathartepa khan a that sabak tâka. Israel mihaiin Abimeleka a thi tah ti an inhriatin anni khua in tiang an kîr nôk tâka.

⁵⁶ Khaang kha a pa le a urêng sômsari chunga a thilsual tho sikin Pathianin an tuangtira.

⁵⁷ Sekemmihai khom an thilinsual thôna sikin, Pathianin a intuangtirhaia, Gideona nâipa Jothama khomâksâm chu anni chunga a tung tâk a ni.