ROIRÊLTUHAI 6 - PATHIAN LEKHABU IRTHIANG C.L. Bible (BSI)

Gideona

¹ Israel mihaiin Rengpa nuamloi lam thilsual an thoa; kum sari sûng Midian mihai thuhnuaia an omtirhaia.

² Midian mihai chu Israelhai nêkin an hrâta, khasikin Israel mihai chu tâng panga irbîk hrangin khur an invera, khurhaia an irbîka, kulhai an siama.

³ Khan, Israelhaiin chîmu thil an tho’n chu Midian mihai, Amalek mihai le Ramchâra om mihai chu an hong fea, an hong doihai ngai.

⁴ Riakbuk an siama, Israelhai chîmu songhai chu an insiat zela, Gaza dênin Israel rama khan fâk nêk om mak; belrahai, sehrâthai, sakuartunghai an lâkpai pehai ngai.

⁵ An sa pâlhai an hongpuihaia, puan inhai an hong chôia, khuai pung ang mai an ni, ram chu an hong insiat ngai a ni.

⁶ Khasikin, Israelhai chu om nalam inhre ta mahai. Israelhaiin Rengpa an koia.

⁷ Midian mihai sikin Israelhai dengthei irhâi chu Rengpa’n a lei inhriata,

⁸ Israehai kuanga deipu inkhat a tîra, “Israelhai Pathian Rengpa’n hiang hin a ti: ‘Aigupta ram rengata suaka nin om kha, nangni ki hong hruaisuaka.

⁹ Aigupta hruaitu le nangni dengintheituhai kut ata nangni ki hruaisuaka, hi ram hi nangni ki pêk tâk a ni.

¹⁰ Rengpa nin Pathian chu ki ni. Amor mihai rama om nin nia, an pathianhai chu biak no roi ki iti kha, ki chong zôm nuam mak chêi,’ a ti e,” a tia.

¹¹ Rengpa vântîrtôn chu Ofra khuaa a fea, Abiezera mi Joasa saiso thing bula khan a toi tâka; Joasa nâipa Gideona’n uain in-ôtna khura Midian mihai hmuloi hrangin bu a chîla.

¹² Rengpa vântîrtôn chu a zuang inlâra, a kuang, “Nang mi hrât huaisen, Rengpa chu ni kuang a om,” a tia.

¹³ Gideona’n, “Ka pu, Rengpa hi kin kuang a omin te hi thilhai hi itina mo kin chunga a ichum? kin pahaiin a sintho roiinpui tak tak an ni inhril kha khôn mo a om tâk? Rengpa’n Aigupta ram rengata a ni hruaisuak mani? Atûn hin chu, Rengpa’n a ni pai tâka, Midian mihai kuta a ni pêk tâk a ni hi te,” a tia.

¹⁴ Rengpa’n ama chu a ena, “Ni hrât zap hi te, Israelhai chu Midian mihai kut ata hi sansuak ta ro, nang ki itîr mo ni ma?” a tia.

¹⁵ Gideona’n, “Ka pu, itin mo Israelhai chu ki sansuakhai hrang? Manasea irchi laia hrâtloi tak sûnga mi ki nia, kin insûngkua laia khom nâipang tak ki ni,” a tia.

¹⁶ Rengpa’n, “Nang ompui mai ki ti, Midian mihai chu mi inkhat ang dôrin ol takin inhnê ni ti,” a tia.

¹⁷ Gideona’n, “Lung nin khamin lân, Rengpa chu ni nih ngêt ti inhriatna hrang ni tho pe roh.

¹⁸ Fe pat no’n lân, thilpêk hong lâk ki ta, ni ke bula hong chôi ki ti,” a tia. Ama khan, “Ni hong tung mâka chu hin lei om mai ki ti,” a tia.

¹⁹ Gideona chu ina a lûta, kêltuai a thata, chol polloi bai her sôm a chôi saa. Kêl hme chu baltia a siaa, a tui chu a bêla a siaa. Saiso thing hnuaia Rengpa Vântîrtôn kuang a chôia.

²⁰ Rengpa vântîrtônin, “A hme le bai chol polloi kha lung chunga khan sia’n lân, a tui kha buak ro,” a tia. Khaang khan Gideona’n a thoa.

²¹ Rengpa vântîrtônin a khianghrol hmorin sa le bai chol polloi kha a intôna; lung ata mei a hong suaka, sa le bai chu a kâng irhmang zit tâka. Rengpa vântîrtôn chu a fe irhmang pat tâk.

²² Gideona’n Rengpa vântîrtôn ngêt a nih ti an hriat tâka, “E! O Rengpa Pathian, Rengpa vântîrtôn leh hmâi ir-en ngitin kin irhmu tâk kêng,” a tia.

²³ Rengpa’n, “Charindong no ro, irtharngam takin om ro, thi no chi ni,” a tia.

²⁴ Kha hmuna khan Gideona’n Rengpa ta hrangin maichâm a siama, Rengpa Salom a phuaa. Abiezer rama Ofra khuaa khan, atûn ten a la om.

²⁵ Kha nî zâna khan Rengpa’n a kuang, “Ni pa sehrâtchal le sehrâtchal dang kum saria irchangtak hong kaiin lân, ni pa isiam Baal maichâm chu insiatin lân, a kôla pathian phun khom kha phôipai roh.

²⁶ Hi irnêng pônga hin ni Pathian Rengpa ta hrangin maichâm iamom tak siamin lân, sehrâtchal inhnina kha hâlirvôm thilinhlannaa inhlan ro; a hâlna thing chu, ni iphûrpai Aseri thing kha hmang ro,” a tia.

²⁷ Khanchu, Gideona’n a siahlo sômkhat a hruaia, Rengpa ihril angin a thoa. A insûngkua mihai le a khuaa mihai a chi sikin sûna chu tho mah, zâna a tho tâka.

²⁸ Zînga chu mihai an hong thoia, Baal maichâm chu a lei chima, a kôla Aseri irlim thing phun khom a kiak an hmua; maichâm thara khan sehrâtchal inhnina kha hâlirvôm thilinhlanna khan inhlan an hmua.

²⁹ “Tu itho mani?” an tia. An zong irvêla, “Joasa nâipa Gideona itho a ni,” ti an inhriata.

³⁰ Khanchu, khuaa mihaiin Joasa kuang, “Ni nâipa kha hong hruaisuak ro, kin ithat hrang kêng. Baal maichâm an siata, a kôla Aseri irlim irphûm khom a tanpai a ni,” an tia.

³¹ Khannisian Joasa’n khaanga tîtuhai kha a sâma, “Baal hi nin thop mo, san hrang nin itum ma ni? Baal thop murdi chu nangtûk zîng renga hin thatpai an ini hrang a ni. Pathian a ni tak takin chu a maichâm an insiat lai khan ama le ama a irhrung hrang a ni kha te,” a tia.

³² Khasikin, kha nî khan Gideona chu Jerubaala an phua tâk a ni, kha kha “Baalin doi ri se,” tihna a ni. Baal maichâm an siat pe sikin, Baalin hong doi ri se, an tihna a ni.

³³ Midian mihai, Amalek mihai, ramchâra omhai chu an irbukkhôma, Jezreel irhôra riakbuk an khuara.

³⁴ Rengpa irtha chu Gideona chunga a oma, Abiezera mihai koi khômna’n bekul a tuma.

³⁵ Manasea mihai, Asera mihai, Zebulun mihai le Naftalia mihai kuang khom palâi a tîrhaia, ama an hong irtongpuina hrangin an honga.

³⁶ Gideona’n Rengpa kuang, “Israel mihai sansuak hrangin hmang ni ni nuamin chu,

³⁷ en ro, hruizôla belra mul hi sia ki ta, belra mula vai hin irdo a tâka, a kôl vêl irnêng a chârin chu, ni ihril angin Israelhai hi nangma ni hmangin saninzôkhai thei ki ti, ti inhria ki ti,” a tia.

³⁸ Nangtûk zînga a thoiin chu belra mul kha an hera, belra mula irdo chu khilât khat a suaka.

³⁹ Gideona’n Pathian kuang, “Ki chunga ningmur no ro duah, voikhat vai lei hril nôk viat rong, enfiana hi Belra mula hin ni pêk nôk ro: A vuan zân chu belra mul hi hul sianlân, a kôl vêla irnêng hi chu dui ri se,” a tia.

⁴⁰ Kha nî zân khan Pathian belra mul chu an hula, irnêng chu dui norin irdo’n an phâtira.