ROIRÊLTUHAI 5 - PATHIAN LEKHABU IRTHIANG C.L. Bible (BSI)

Debori le Baraka hla

¹ Kha nî sûn khan Debori le Abinoama nâipa Baraka’n hiang hin hla an sak:

² Hruaituhaiin Israelhai mâ an hruaia, mipuiin raifân takin an zui dûl dûl mai hi, irzuk takin Rengpa chu inpâk roi.

³ Rênghaio, irngai roi, Hruaituhaio, nin mikuar lei sung roi, Rengpa inpâkin hla sak ki ti. Israelhai Pathian Rengpa chu chôiirsâng ki ti.

⁴ O Rengpa, Seir tâng ni mâksana, Edom ram ni suaksan khan irnêng kha an hnîng dûm dûma, Irvânhai khom rua a zuang zunga, A ni, Sûmhai khan rua an thotira.

⁵ Rengpa makunga hin tânghai an inthinga, Sinai tâng ten khom, Israelhai Pathian Rengpa makunga khan.

⁶ Anata nâipa Samgara le Jaeli dam laihai khan, lamlianhai kha a ping khaka, Khualinzin mihaiin lam irthep irkualin kêng an fe ngai.

⁷ Debori a hong mâna, Israel nu a hong thoi mân khan, Om mahai, Israel laia om mahai tûte.

⁸ Mihaiin pathian dang biak an inthang, Ei rama hin irdoi a suak tâka, Israel mi sîngminli laia pho le ufei chôi nin om mo?

⁹ Kin renhai bâka, Israel hruaituhai, irzuk taka zuituhai khom chu: Rengpa chu inpâk roi.

¹⁰ Sakuartung chunga chuang ngaihaio. Nangni toihmun irsâ taka toihai khomin lamintûn zongtuhai leh hin hi thu hi inpuang roi.

¹¹ Tuikhura irhâi irsê sup sup khan, Rengpa sintho satzia an hril, Israel rama thil roiinpui a itho chu an insîra. Kul mikothaia khom an irbukkhôm tâka.

¹² Har ro, har ro, Debori, har ro, hla lei sak ta, Abinoama nâipa, thoi ta, Baraka, thoi roh. Râl tamtak sala hruai dût dût ro.

¹³ Mi lian rualhai khomin an zui saa, Râl doipui hrangin Rengpa mihai an zuang chuma.

¹⁴ Efraima ram rengata tuidung tamna tiang an pan, An urêng Benjamina-haiin an hong zuia. Makira mihai mi lianhai an zuang chuma, Zebulun rêng ulianhai leh ile an zuang chum.

¹⁵ Isaka mi lianhaiin Debori an zuia, Isaka angin, Baraka khom: Irhôr tianga khan ama leh an intân lûta, Reubena mihai laia chu irthêrin an oma, Fe hrang thu chu siam infel thei mahai.

¹⁶ I sika mo belra rual koina theihle tum irngaia, Belra pâl kâra nin itho mai? Reubena mihai lak irsen an oma, Fe hrang thu chu siam irfûk thei mahai.

¹⁷ Gada mihai chu Jordan râla an om daih tâka, Dan mihai chu irkuanga an la om maia, Asera mihai khom tuipui muang tianga, Iva panga an om mai.

¹⁸ Zebulun le Naftalia mihai rêkin chu thi vângin râl an doia.

¹⁹ An rênghaiin an hong doia, Khanchu, Kanaan rênghaiin Megido vadung kôl Tanak-ah khan an irdoia. Khannisian, râllâk sum lâk hrang nei mahai.

²⁰ Vâna ârsihai khomin an hong doia, Ârsihaiin an hmun rengata Sisera chu an hong doia.

²¹ Kison tui lianin anni chu a hnôl irhmang zita. Tianlai Kison vadungin a tâna. O ki’rtha hrât takin fe mai roh.

²² Sakorhai chu an irchôma, An ke tinhai leh hnuai inrâkin an irchôm an irchôma.

²³ Rengpa vântîrtônin, “Meroz chu khosâl inpêl ro,” a tia. “Khataka omhai chu natakin khosâlna inpêl roh. Rengpa changpui hrangin an hong no sikin, râl an idoi nuam loi a ni,” a tia.

²⁴ Nupang murdi laia hin Jaeli Ken mi Hebera dôngma hi mi vânnei tak ni a ti.

²⁵ Sisera’n tui a zonga, dût an intira, Khuri sataka dût inkang a hong chôia, a pêka.

²⁶ Nupangnu khan puan in kilna a hong chôia sinthotuhai sekchôi a hong chôia, Sisera chu a sekchôi leh khan a lua a zêm inlûta, A bangbarêp taka a hêma, a hêm that chak tâka.

²⁷ A’rkhûka a’rthep rupa, an rîla, a ke bula a that raka. A thi zel ta.

²⁸ Sisera nu’n a tukver ata a lei thîra, a zu koia. ‘Itho mo a thîr sakortâli a hong tung inhnung bâka? Itina mo a sakorhai chu an ir-ôi bâka,’ a tia.

²⁹ A rualnu vâr takhaiin a lei inthêma, Ama le ama lungirngamna chong ar sak tâka.

³⁰ “Ni man belsa hrang an zong ni ngêt a ti, râllâk sum irsem ngêt hi an zong, Dôngmate inkhat le inhni man belsa hrang an irvâk ni a ti, Sisera chôi pe hrang puan satak an izong vêl ni a ti. Rêngnu sil hrang an izong ngot ni a ti,” tiin.

³¹ O, Rengpa ni râlhai khaang khan thihai sian, Ni rualhai rêk chu, misa suak angin vâr phut ri sehai tiin. Kum sômminli sûng chu an rama irngeina a lênga.