ROIRÊLTUHAI 3 - PATHIAN LEKHABU IRTHIANG C.L. Bible (BSI)

Israelhai rama nam dang la omhai

¹ Israelhai Kanaan rama râl doinaa chang phâkloihai fiana hranga hi nam senkhathai hi Rengpa’n an omtirhai a ni.

² Israel irchi, thoiintharhai, irdoinaa la chang ngai loi mihaiin irdoina an irchu theina hrangin an omtirhai a ni.

³ Kha namhai kha chu: Filistia rêng ringa hai, Kanaan mi murdihai, Zidon mihai, Lebanon tâng, Baal Hermon le Hamath khua lûtnaa om Hiv mihai an nih.

⁴ An pahai kuanga Rengpa thupêk, Mosia a ihril kha, Israelhaiin an zôm mo zôm mahai moh ti inlang infelna hrangin hi mihai hi a inkung a ni.

⁵ Israelhai chu Kanaan mihai, Hit mihai, Amor mihai, Periz mihai, Hiv mihai le Jebus mihai laia an oma.

⁶ Kha mihai leh khan nupang pasal an irnei pola, an pathianhai chu an biak nôk tâka.

Othniela roirêltu

⁷ Khanchu, Israelhaiin Rengpa nuam loi lam thilsual an thoa, an Pathian Rengpa chu an mâksana, Baalhai le Aseri-hai chu an biak tâka.

⁸ Khasikin, Rengpa chu Israelhai chunga a ning an mura, Mesopotamia ram rêng Kusan-risathaima an hnêtira, Israelhai chu a thuhnuaia kum riat an oma.

⁹ Israelhaiin Rengpa chu an koia, Kaleba sangpa, Kenaza nâipa Othniela chu Rengpa’n Israelhai sansuak hrangin a tîra.

¹⁰ Rengpa Irtha chu a chunga a oma, Israelhai hruaitu a hong ni tâk. Irdoi hrangin a fe suaka, Rengpa’n Mesopotamia rêng Kusan-risathaima chu an hnêtira, a kut ata Israelhai chu a sansuakhai tâka.

¹¹ An ram chu kum sômminli sûng irngeina a oma, Kenaza nâipa Othniela chu a thi tâka.

Ehuda

¹² Israelhaiin Rengpa nuam loi lam thilsual an tho nôka. Rengpa’n Moab rêng, Eglona chu Israelhai nêkin an hrâttir tâka.

¹³ Eglona’n Amon mihai le Amalek mihai a’rrualpuihaia, Israelhai chu a beia, an hnêa, tûm thing tamna khopui Jeriko chu a lâka.

¹⁴ Israelhai chu Moab rêng Eglona hnuaia kum sôm kum riat an oma.

¹⁵ Khannisianlân, Israelhaiin Rengpa chu an koia, santu hrang a pêka. Kha mi kha Benjamina irchi, Gera nâipa, Ehuda, vei tianga hmang mi a ni. Israel mihaiin Moab rêng Eglona pêk hrangin thilpêk an inchôitira.

¹⁶ Ehuda’n chem ngaih tak mûk khat vêla sei a siama, a puan hnuaia a chang tianga a teêl tiang khan a thup zêta.

¹⁷ Moab rêng Eglona chu mi mar tak hi a nia, Ehuda’n thilpêk chu a pêka;

¹⁸ thilpêk a pêk zoiin chu thilpêk chôituhai chu in tiang a tîrhai tâk.

¹⁹ Gilgal kôla lung khur rengata Ehuda chu a kîr nôka, Eglon kuang a fe nôka, “Mahripom rêngpa, nangma kuang thu’rthup intung hrang ki nei,” a tia. Rêngin a siahlohai kuang, “Ni suaksan zit roi duah,” a tia. Khanchu, an suaksan tâka.

²⁰ Rêng kha a chontan chung taka a sôl inchanna hmun dâina khan a bing dokin a lei toia. Ehuda’n, “Ni kuang Pathian chongbe insîr hrang ki nei,” a tia. A toina hmun ata a lei thoia.

²¹ Ehuda’n a vei kutin a chang tianga chemte kha a kêldoka, a phînga khan an vit tâka.

²² Chemte chu a tum khîta, a fong khom a lût sa sikin phôipai mak; a hnung tiang chemte hmor chu a tertota.

²³ Ehuda chu pên tiang a suak pata, chontan chung tak inkhâr chu a khâra a kalkhak tâka.

²⁴ A suak hnungin chu, rêng siahlohai chu an honga, chontan mikot chu a’rkalkhaka. ‘A chontan sûngrîla irsinsiam hranga fe ni a ti,’ an tia.

²⁵ Zoro sôttak an nghâka chontan inkhâr chu inhong ta maka, khanchu châbi an lâka, inkhâr chu an inhonga, an pu chu a thia, hnuaichanga a’rhlum raka.

²⁶ An buai sup sup lai takin Ehuda chu a suaka, lung khur a fe irkâna, Seira-ah an tân pat tâka.

²⁷ Ehuda chu Efraima tâng ram a hong tungin chu bekul a tuma, Israelhai chu tâng ram rengata a kuang an zu fea, ama’n a hruaihaia.

²⁸ An kuang, “Ni zui roi, nin râl Moab mihai chu nin kuta Rengpa’n a pêk tâk,” a tia. Ehuda chu an zuia, Jordan vadung irkânhai Moab mihai chu an lâk kîrhaia, tûte a kâi irman om mahai.

²⁹ Kha zoroa khan Moab mi sîngkhat vêl, mi hrât le mi nakngol ngot an thata, inkhat lua a zôk om mahai.

³⁰ Kha nî khan Israelhaiin Moab mihai chu an inhnê ta. Ram chu kum sômriat irngeina a lêng ta.

Samgara

³¹ Khan ama hnunga Anata nâipa Samgara khomin Filistia mi irzaruk chu sehrât sunna hmolin an zuithathaia, Israelhai chu a sansuakhai.