ROIRÊLTUHAI 2 - PATHIAN LEKHABU IRTHIANG C.L. Bible (BSI)

Bokim khuaa Rengpa vântîrtôn

¹ Gilgal rengata Rengpa Vântîrtôn chu Bokim khuaa a zu fea, Israelhai kuang, “Aigupta ram ata nangni ki hong hruaisuaka, nin pahai kuanga pêk ki inkung rama khan nangni ki hong hruai intunga; ‘Nangni le ki thuthung hi insiat viat no ning,

² kha rama lei omhai leh khan thuthung nin siam hrang ni mak, an maichâmhai nin insiatpai hrang a ni’ ki ti kha; khannisian, ki chong zôm nuam loiin i thil mo nin itho tâk kha?

³ Khasikin, nangni ki hril, nin matona hi mihai hi inhnotsuak no ning, nin hrangin râl ni an ta, an pathianhai biak hrangin nangni val an ti,” a tia.

⁴ Rengpa vântîrtônin kha thu kha a hril zoiin chu Israelhai chu an chap mur tâka.

⁵ Khasikin, kha khua kha Bokim an ti tâk a ni. Kha khan Rengpa kuang thil an inhlana.

Josua thi thu

⁶ Josua’n Israel mihai chu an chîntirhaia; an mâni dongtum ram chita lua hrangin an fe seng tâka.

⁷ Josua dam sûng chu Israel mihaiin Rengpa sin an thoa, Josua a thi hnunga khom, Israel upahai, Rengpa sintho hmu phâktuhai dam sûng chu mipuihaiin a sin an la tho mai.

⁸ Rengpa siahlo Nuna nâipa Josua chu kum irzakhat sômkhat mi a niin a thia.

⁹ Hmâr tiang Gaas tâng, Efraima tâng rama ama ram ngêt Timnat-heres hmuna an phûma.

¹⁰ Upahai khom chu an thi zita, Rengpa lan hre ngailoi Israel ta hranga a sintho lan hre phâkloi rualthoithar an hong pung thiai maia.

Israelhaiin Rengpa biak nuam mahai

¹¹ Khanchu, Israelhaiin Rengpa nuamloi lam thilsual an thoa. Baalhai kha an biak zêl tâka.

¹² Aigupta ram rengata hruaisuakpu, an pahai Pathian, Rengpa chu an irheisana, an kôl vêla om pathianhai tiang an pana, an biak sa tâka. Rengpa chu a ning an inmurtira.

¹³ Rengpa irheisanin, Baalhai, Asterte-hai chubai an mûk tâka.

¹⁴ Khanchu, Israelhai chunga Rengpa chu a saterengin a ning an mur tâka, lei roktuhai an phûta, an râlhai an kôl vêla om nam danghai kuta a pêka, lei doi ngam ta mahai.

¹⁵ Irdoi hranga an fe suakna hmun tina a ihril ang ngeiin Rengpa’n changpuihai nuam ta maka, an lunginzîng tâk a ni.

¹⁶ Khanchu, Rengpa’n anni dengintheituhai rengata santu hrang hruaituhai a zong pehaia,

¹⁷ khannisian, an hruaituhai chong chu irngai nuam mahaia, Israelhaiin Rengpa chu an irheisana, pathian dang an irzûla, chubai an mûk mai ngai. An pahaiin Rengpa thupêkhai chu an zôma; khannisian an pahai omdân chu zôm nuam ngai mahai.

¹⁸ Rengpa’n hruaituhai a pêkhaia, Rengpa’n kha hruaituhai kha a ompuihai ngai, an dam sûng chu an râlhai kut ata a saninzôk ngai; anni dengintheitirtu le opbetuhai sika an inrûm chu Rengpa’n an ren nôkhai ngai.

¹⁹ An hruaitu a thi’n chu hnung tiang irletin, an pahai nêka siat ualin an om ngai; pathian dang biak le chubai mûk an uara, nam dang ti dân tinrêng an lâka, an tho insualna mâksan ual mahai.

²⁰ Israelhai chunga Rengpa chu a saterengin a ning an mur tâka, “An pahai zôm hranga ki thuthung kha, hi an irchihai hin an insiata, ki hê lak irngai nuam mahai.

²¹ Khasikin, Josua a thia, nam dang, a inhnotsuak loihai kha, kei khomin inhnotsuak ual ta no ning.

²² Hi mihai hi, an pahai angin ki lampui an zui mo zui loi mo fiana hrangin ki hmanghai hrang a ni,” a tia.

²³ Khasikin, Rengpa’n kha namhai kha inhnotsuak loiin an omtir tâka, Josua kuta khom pe ual loiin, a thi hnung tena khom inhnotsuakhai loiin an omtirhai zêl tâka.