ROIRÊLTUHAI 18 - PATHIAN LEKHABU IRTHIANG C.L. Bible (BSI)

Mika le Dana irchihai

¹ Kha lai khan Israel rama rêng la nei mahaia. Israel laia ram lua hrang an irsem lai khan Dana irchihai chu ram lua hrang chang sa mahaia, ram lua hrang an zong irvêl mai a ni.

² Khasikin, Dana irchihaiin an irchihai lai ata mi pasal sa ringa an inthanga, Zora le Estaol khua ata ramsa zonga envêl hrangin an tîra. Efraima tâng ram an hong tungin Mika ina an fea, an riak tâka.

³ Mika ina Levia irchi ruatharte chong irhâi chu an inhriat tâka, an va pana, “Hi hin imo ni itho? Tu’n mo nang an hong ihruai?” an tia.

⁴ Ama’n a sâma, “Mika ina ki honga, ochai hrangin a ni inkung a ni,” a tia.

⁵ Anni’n a kuang, “Kin fena hrang hi hlo kin ichuk hrang mo, chukloi hrang? Pathian ni zong pe ro,” an tia.

⁶ Kha ochai khan an kuang, “Irtharngam takin fe roi, Rengpa’n nin fena hranga hin nangni a hruai mai,” a tia.

⁷ Khanchu, mi pasal ringahai chu an fea, Lais khua an va tunga. Sidon mihai ang takin kha khuaa mihai chu hoi takin an om ti an hmua. Mi nunirnêm om mai mai, tûte’n inbuaihai loi, itinrênga irfakhop an ni. Sidon khua ata chu hlatak a nia, mi dang tu leh khom irkopna rêng rêng nei mahai.

⁸ Mi ringa chu Zora le Estaol khuaa mihai kuang an kîr nôka, kha khuaa mihaiin an kuang, “Imo nin hril hrang nin neia?” an tia.

⁹ Anni’n, “Thoi roi, Lais khua chu hong doi ei ti, a ram kin hong hmua, ram satak a ni. Hi hin om mai mai no roi, irhnot unglân, hong lâk ei ti.

¹⁰ Nin hong fe photin chu hoitaka om mihai kha hong hmu nin ta, a ram lak chu a liana, Pathianin nangni a pêk tâk a ni, hnuaia thil om chu tinrênga irsam nona hmun a ni,” an tia.

¹¹ Khanchu, Dana irchihai, hriamhrei chôi mi irzaruk chu Zora le Estaol khua ata an irthoka, an suaka.

¹² Judai rama an hong fea, Kiriath-jearim-ah riakbuk an khuara; khasikin kha khua kha Mahane-dan ti irhming a irput mai tâk a ni.

¹³ An fe zêla, Efraima tâng ram, Mika in chu an hong tunga.

¹⁴ Lais le a vêla ram hong envêltuhai mi ringa khan an rualhai kuang, “Hi in inkhat sûnga hin thing millim sumrua inluanhai a om ti nin inhriat mo? Millim danghai le Efod khom a om, itin mo tho inlân sa ni?” an tia.

¹⁵ Levia irchi ruatharte omna Mika ina khan an fea, kha ruatharte kha, “Ni dam mo?” an tia.

¹⁶ Mikot kôla khan hriamhrei chôiin Dan irchihai chu mi irzaruk an ngîra.

¹⁷ Mi ringa ram envêltuhai chu kha ina khan an lûta; khan ochai chu mi irzaruk irdoina tukfam irbelhai laia mikot bula khan a ngîra.

¹⁸ Mi ringahaiin Mika ina thilser omhai chu an lâk laiin, ochaiin, “Imo nin itho?” a tia.

¹⁹ Mi ringahaiin, “Dâihrek ro, chong no ro, kin kuang hongin lân, kin ochaia chang ro, Israel nam pumpui laia ochai chang chu sûngkhat ochai mai mai ni nêkin ni inuam ual hrang mo ni ma?” an tia.

²⁰ Ochai chu a sân a râi a fâna; khanchu, thil serhai chu ama’n a chôia, an laia khan a fe sa tâka.

²¹ An hongna lama an kîra, an nâihai le insûng sahai leh ile khan an suak tâka; a fe masahaiin an neinunhai chu an fepuia.

²² Mika in ata hlatak an fe hnungin, Mika tualbômhai chu an irbukkhôma, Dan irchihai chu an va inhnotsuakhai tâka.

²³ Dana irchihai chu an va inhnotsuaka, an khêka. Dana irchihai chu an hong irheia, Mika kuang, “Imo a ini tâk, mi an tam bâka?” an tia.

²⁴ Mika’n, “Imo a ini tâk nin tia; ki ochai nin ni suta, pathian ki isiamhai chu nin inrûka, ite nin imâksan om ma,” a tia.

²⁵ Dana irchihaiin, “Thu dang ite hril no ro, hi mihai hin an ning an murin chu, nang doi an ti. Nin insûngkua murdi hringna inchân rôi an ti,” an tia.

²⁶ An fe zêla, Mika’n keima nêkin an hrât ual daih a nih ti an hriatin, a kîr nôk tâka.

²⁷ Mika millim siam le a ochai chu an hruaia, Lais an va tunga, hoitaka om mai maihai chu an doia, khandaiin an sât thathaia, khua chu an hâla.

²⁸ Sidon khua ata a satea hla a ni sikin hong sansuaktu hrang lak tûte om mahai; tûte le khom irkopna rêng rêng nei mahai; Beth-rehob bul irhôra om a ni. Khan, khua chu an siaminsat nôka, khataka khan an om tâka.

²⁹ An irchibul Dana, Israela nâi irhming chôiin kha khua irhminga khan Dana an phuaa, ar hming masa chu Lais a ni.

³⁰ Dana irchihaiin thing millim sumrua inluan chu an biak tâka. Mosia nâi Gersoma nâipa Jothama chu ochaia an hmanga; kha mi irchihai chu suaka intâng ten khan Dana hai ochaia an changa; Mika millim siamhai chu a om mai tâka.

³¹ Khanchu, Mika’n a isiam millim siam chop kha Silo khuaa Pathian in a om sûng ten kha a oma.