ROIRÊLTUHAI 13 - PATHIAN LEKHABU IRTHIANG C.L. Bible (BSI)

Samsona suak thu

¹ Israelhai chu Rengpa mit hmua thilsual an tho nôk tâka, kum sômminli sûng chu Filistia hnuaia Rengpa’n an omtirhaia.

² Khan, Zora khuaa Dana irchi, mi pasal inkhat, Manoa a oma, a dôngma chu a chinga, nâi rêng rêng nei mahai.

³ Nupangnu kuang Rengpa vântîrtôn a zuang inlâra, “Irngai ta, nâi nei thei loia ni iching hi, atûn chu inrâi ni ta, nâipasal nei ni ti.

⁴ Khasikin, irdîn takin omin lân, uain mani zû mani in viat no ro, Sa irthiangloi khom fa viat no roh.

⁵ Nâi ni vong, nâipasal ni inei hrang hi, a lu voiinkol loi hrang a ni. Pathian ta hrangin a suak ata Nazarit mi ni a ti. Ama’n Filistia mihai kut ata Israelhai sansuakna sin tho phut a ti,” a tia.

⁶ Nupang kha a fea, a pasal kuang, “Pathian mi ki kuang a zuanga, a hmêl chu Rengpa vântîrtôn hmêl ang a ni, a sân ichi a om. Kho tianga mi mani irdon ma ung, ar hming khom nin hril viat mah.

⁷ Irngai ta, nâi vong ni ta, nâipasal nei ni ti, uain mani zû mani in viat no ro, sâ irthiang loi khom fâk viat no ro, ni nâi nei hrang chu a suak rengata a thi dênin Pathian ta hranga Nazarit mi ni a ti, tiin a ni hrila,” a tia.

⁸ Manoa’n, Rengpa kuang a ngêna, O Rengpa, Pathian, mi ni zuang itîr kha zuang nôk ri se ba, nâi zuang suak hrang chu itin mo ki ienkol hrang, nir chu ri se,” a tia.

⁹ Pathianin Manoa ngênna kha a lei irngaia, khan nupang kha loia a toi laiin Pathian vântîrtôn kha a zuang inlâr nôka, a pasal Manoa chu om sa mah.

¹⁰ Khasikin, inrang takin nupang chu a pasal kuang an tâna, “Matona ki kuanga zuang, ki iti kha a zuang nôk tâk e,” a va tia.

¹¹ Manoa chu a thoia, a dôngma chu a zuia, mi chu a va hmua, “Nupang kuanga thuhriltu kha ni ni mo?” a tia. Ama’n, “Ki ni,” a lei tia.

¹² Manoa’n, “Ni thu anga thil a hong tung hnunga nâite chu itina enkol hrang mani, itin mo a hringnun a hong ini hrang?” a tia.

¹³ Rengpa vântîrtônin, “Ni dôngma itinrêng ki iti pe lam ang takin om ri se,

¹⁴ grep kung rengata thil ite a ifâk hrang ni ma, uain mani zû mani in viat no ri se. Ki ihril murdi kha zôm sianlân, thil irthiangloi khom fa no ri se,” a tia.

¹⁵ Manoa’n Rengpa vântîrtôn kuang, “La om ro, la fe no ro, kêltuaite la that ki ti,” a tia.

¹⁶ Rengpa vântîrtônin, “Ni khap khom unglân, nin bu anh suang chu fa no ning, hâlirvôm thilinhlan ni inhlan hranga ni’n chu Rengpa ta hrangin inhlan ro,” a tia.

¹⁷ Manoa’n Rengpa vântîrtôn kuang, “Ni thu anga thil a hong tung zoroa nang kin chôiindôm theina hrangin nir hming nin hril ro ba,” a tia.

¹⁸ Rengpa vântîrtônin, “Itho sika mo ki’rhming ni ni irdon, hril thei chi ni ma,” a tia.

¹⁹ Khanchu, Manoa’n kêlte chu a thata, bu le bâl thilinhlan leh hâlirvôm thilinhlana lungpui chunga khan Rengpa ta hrangin an hlan tâka. Thil irkhêl tak zuang om chu Manoa sangramhaiin an en maia.

²⁰ Lungpui maichâm rengata meikhû irvân tiang a fe’n chu Rengpa vântîrtôn chu meia khan irvân tiang a fe sa tâka.

²¹ Manoa-hai sangramin kha mei kha Rengpa vântîrtôn a nih ti an inhriat tâka, an hmâi irnêng sikin an kûn tâka. Vântîrtôn chu hmu nôk ta mahai.

²² Khan Manoa’n, a dôngma kuang, “Ei ithi ngêt hrang a ni, Pathian ei hmu tâk hi te,” a tia.

²³ A dôngma rêkin chu, “Rengpa’n ni that nuam ni sian chu hâlirvôm thilinhlan le bu le bâl thilinhlan kha pom no ni, hi thilhai khom hi nin hril no ni,” a tia.

²⁴ Khan, nupangin nâipasal a neia, ar hming Samsona a phuaa; nâi chu a hong liana, Rengpa’n sat a vura.

²⁵ Rengpa irtha’n Zora le Estaol kâra Mahane-dan hmuna khan Samsona chu a hong pôl irphut tâka.