OBADIA 1 - PATHIAN LEKHABU IRTHIANG C.L. Bible (BSI)

Rengpa’n Edom hrem a ti

¹ Obadia inlârna kha Rengpa Pathian khan Edom chungchânga hiang hin a ti. Rengpa kuanga irthokin thu kin inhriata, namhai laia khan palai tîr a ni: “Thoi unglân! irdoinaa Edom doi hrangin irthok ei ti,” tiin.

² Irngai ta, namhai laia khan nang kin chîntir tâk a ni; mi tinin a saterengin nang hmusit ta an ti.

³ O nang, lung kul sûng kâra oma, hmun irsâng luatu, ‘Tu’n mo hnuaia ni sukthâk hrang?’ ti lungrîltu, ni lungrîl lârirpâkna hin nang a ihuang tâk a ni.

⁴ Irmu angin irsâng taka vuang khomin lân, nir bu kha ârsi laia zep ni khom sianlân, khatak ata nang kai thapai ki ti, Rengpa’n a ti.

⁵ Ni kuanga inrûhai, mi phil hmanghai zâna honghai sianlân, (irhmangtir ni ini hrang kêng!) an indit dôrin an inrûk loi hrang ma ni? Ni kuanga Grep irhmaltuhai honghai sianlân, Grep irhmal hrang senkhat an imâksan loi hrang ma ni?

⁶ Esaua thilhai zong suak a ini tâk kêng! A’rchon kok thuphai kêlsuak a ni ta!

⁷ Nangma tianga kophai murdi’n ramri dênin nang an hong intunga; mi irngei taka ni iompuihai khan nang an hmanga, nang an inhnê tâk a ni! ni bai fâktuhai khan ni hnuaia châng an kama; amaa khan inhriat thiamna zel a iom loi a ni.

⁸ Kha nikhuaa khan Edom ata mi vârhai inboipai ki ti, Esaua tâng ata inhriat thiamna ki inboipai loi hrang ma ni? Rengpa’n a ti.

⁹ O Temana, Esaua tânga irthoka mi tin irhmangtira an om zitna hrangin, ni mi hrâthai kha a saterengin chi an ti.

Edom hrem nasan

¹⁰ “Ni urêngpa Jakoba irchihai ni thata, ni rok sikin, kumkhua’n mualinphoi le irhmangtirin om ni ti.

¹¹ Kiangtiang ni ngîr nia, mikhualhaiin a sum an lâkpai nia, nam dang mihai an kul mikota an lûta, Jerusalem chunga tâ an sân lai khan, nang khom anni laia kop angin ni om kha.

¹² Aniachu ni urêngpa siatna a tong nî khan thîr no’n lân, Juda nâihai chunga an irhmang ni khan râiinfân no’n lân; intak an tong ni’n lârirpâk takin chong ual no roh.

¹³ Ki mihai an vânduai nî khan an kul mikota lût no’n lân; an vânduai niin an tuangnahai kha thîr no’n lân, an vânduai ni’n an sum le puanhai chunga ni kutin inban ual no ro.

¹⁴ A mi senkhat irtan suakhai that hrangin lam suama lei ngîr no’n lân; intak nia a mi la omsunhai kha incheltirhai no roh.

Pathianin nam tinhai chunga roirêl a ti

¹⁵ “Nam murdi chunga Rengpa nikhua kha anai tâka: ni lei itho tâk ang dênin ni chunga itho nih a ta; ni itho lam ang ngeiin ni chunga a hong irlet hrang a ni.

¹⁶ Ki tâng irthianga siatna khilât, ki mihai iin tâk ang khan, nam murdihai khan an in mai hen hrang a nia, in paiin irlem zit an ta, irzir loi ang dênin om an ti.

¹⁷ Zion tânga rêk chu, irtansuakhai kha om an ta, irthiang a ti. Khan, Jakoba insûng mihai khan an irchon donghai kha chang an ti.

¹⁸ Jakoba insûng mihai kha mei ang ni an ta, Josefa insûng mihai chu meiri-al ni an ta, Esaua insûng mihai kha fapôl ni an ta, anni laia chok suak an ta, kâng irhmanghai zit an ti. Esaua insûng mihai kha damsuak zel om no nihai; Rengpa khan a ti tâka.

¹⁹ Sim tianga mihai khan Esaua tâng kha dong an ta; phâiram tianga mihai khan Filistia ram kha dong an ta: Efraima loi le Samari loi kha dong an ti. Benjamina-hai khan Gilead ram kha dong an ti.

²⁰ Kanaan mihai laia hi Israela irchi sal intâng mipuihai hin Zarefat ram dênin dong an ta; Sefarada rama Jerusalem kho mihai sal intâng khan sim tiang khopuihai kha dong an ti.

²¹ Zion tânga khan Esaua tâng rêl pe hranga sansuaktuhai hong kâi an ta; Khan, ram kha Rengpa ta ni a ti.