NEHEMIA 9 - PATHIAN LEKHABU IRTHIANG C.L. Bible (BSI)

Mipuihai sual irphuang

¹ Khanchu kha tha sûnga sûn sômhni minli nî chu Israel irchihai chu bu an ngheia, bora puan silin, irnêng tôn duangin an fea.

² Israel namhai chu nam danghai rengata a bingin an oma, an ngîra, an sualnahai le an pi le pu sin insiatnahai ngaidam an irzonga.

³ An omna hmun chita an ngîra, kha nikhua hmun minlia semin, hmunkhat chu Rengpa an Pathian dân bu an tepa; khan hmun minlia sena hmunkhat dang sûnga khan thupha an chôia, Rengpa an Pathian an biaka.

⁴ Khasikin, Levi hai dokâng irsânga khan Jesua hai le Bania hai, Kadmiela hai, Sebania hai, Bunia hai, Serebia hai, Bania hai, Kenania hai chu an ngîra inring takin Rengpa an Pathian chu an koia.

⁵ Khasikin Pathian biak hranga koihai chu; Levi mi, Jesua le Kadmiela hai, Bania hai, Hasabneia hai, Serebia hai, Hodia hai, Sebania hai, le Pethahia haiin, “Ngîr unglân, Rengpa nin Pathian chu kumtuanga hrangin inpâk roi. Chôiindômna le inpâkna murdiin a iphâk loi irhming roiinpui chu inpâkin om ri se,” an tia.

Mipui chongchaina

⁶ Israel mipuihai chu hiang hin an chongchaia, “Rengpa, nangma vai hi Rengpa ni nia, irvân le a sûnga om murdihai leh, irnêng le a sûnga om murdihai le, tuikhanglian le a sûnga om murdihai ni kut suak a nia; khan irvân tianga omhai khomin chubai nang an mûk ngaia.

⁷ Abrama chu tânga, Kaldai ram Ur khua ata hruai suaka, ar hming Abrahama tia phuatu, Rengpa Pathian ni nia;

⁸ khan, a milung khom iam om zoi a nih ti nin hriata, Kanaan hai, Hit hai, Amor hai, Periz hai, Jebus hai le Girgas hai ram chu pe hrangin, ar chihai laia thu ni thunga, hlo nin chuktira, mi feltak ni nia.

⁹ Aigupta rama kin pi le puhai intak tuangzia chu ni hmua, Tuikhanglian sen kôla an khêk irhâi chu nin hriata;

¹⁰ Faroa le a siahlohai murdi le a ram sûnga mi murdi laia irsinsiana le thilirkhêl nir langtira; lârirpâk takin an chunga sin an tho ti nin hriata, atûn ten hin irhming nin neitirhai tâka.

¹¹ Khan an matona tuikhanglian chu ni’rsentira, khanchu tuikhanglian kha tui kangin an fe thei tâka; khan a hong irzûltuhai chu, tui inthûk taka lung ei inthâk angin ni pai lûthaia.

¹² Khan, sûna chu sûmpuiin ni hruaia, zâna khom an fena hrang lampui an hmu theina hrangin meichokin ni hruaia.

¹³ Sinai tânga khan ni honga, irvân ata anni laia thu nin sîra, roirêlna dik takhai, dân diktak, thu’nkung le thupêk satak ni pêka.

¹⁴ khan irngam nî irthiang chu nin hriattirhaia, ni siahlo Mosia hmangin thupêk hai, thu’nkung hai, dânhai ni pêka;

¹⁵ an phîngchâm khopna hrangin irvân ata bai ni pêka, an tui inhrâl channa hrangin lungpui sûng ata tui ni sunsuaka, pêk ni inuamna ram chu ni pêka.

¹⁶ Khannisianlân anni le kin pi le puhaiin lârirpâk takin sin an thoa, an tukul a liana, ni thupêkhai pom loiin,

¹⁷ zôm khom zôm nuam mahai, an laia ni thil irkhêl thohai khom irngai nuam ta loiin; an tukullian songin, tehelzongin, an sal changna tianga kîr hrangin hruaitu an irthang ual a ni: khannisianlân, nang chu ngaidam hranga irsiam sai Pathian, mi lunginkham thei, Inrennaa sip, mi ingam, annihai khom irnghil nuamhai mak chea.

¹⁸ Sehrâtte irlim an siama, “Hi hi a ni, Aigupta rama nang a hruaitu Pathian chu,” an tia, ningmur om tak thil an tho lai khomin,

¹⁹ ni phûkdâina khan ramchâra nin thâ mak chea; lampuia hruai hrang khomin sûna sûmin masan maka, anni êl hrang le an fena lampui irhmu hrangin mei anga vârin zâna a êlhaia.

²⁰ Annihai irchutir hrangin irtha diktak ni pêkhaia, Mana hai le nin fâhaia, dangchârhai tui ni pêka.

²¹ Ramchârna hmun khan kum sômminli nin fâhaia, ite irsam loiin; an silkaihai khom inrô loiin, an kehai khom invûng loiin.

²² Ram le namhai khom ni pêka, an dongtumhai ni sem pea: khanchu Sihona ram, Hesbon rêng ram le Basan rêngin Oga ram an luaa.

²³ An irchihai khom irvâna ârsi nêkin nin punga, an ilua hrang ram an pi le puhai kuanga ni lei ihrilna rama nin tunghaia.

²⁴ Khanchu an irchihai khan ram an lua tâka, khan kha rama om Kanaan mihai chu an intema, an nuam taka lohaiin an rênghai le a mipuihai kha an kuta ni pêka.

²⁵ Kul nei khopuihai, ram satak tak an lâka, thil sa tinrênga bitin an luaa, tuikuang tuk saihai, grep irhuanhai, oliv irhuanhai le theikung dang tamtak an neia: khanchu an fâkin, an khopa, an hong mara, ni satna sikin hoi takin an oma.

²⁶ Khannisian an irhmôla, nang an tehel pea, ni dânhai mâksanin, nangma tianga hong nôk hranga hriltu deipuhai an thata, ningmurom thilhai an thoa.

²⁷ Khasikin anni dengintheitirtu an râlhai kuta ni pêka; an chardong laia nang an insam kha irvân ata ni len hriata; phûkdâi takin an râlhai ata sansuak hrangin mi’nzôkpu ni pêka.

²⁸ Khannisian râl irvei loiin an om zoiin, ni mithmua thil saloi an tho nôka; khasikin an râlhai kuta ni pêkhaia, khanchu an chunga thu an neia; an kîra nang an koi lai khan, irvân ata ni len hriata, voi iza ni phûkdâi sikin ni sansuakhaia;

²⁹ ni dâna ni hruai lûthai theina hrangin nir chutirhaia; khannisian lârirpâk takin sin an thoa, ni thupêkhai pom loiin ni roirêlna sêlin thilsual an thoa, an zôma hringpui nêkin an tukullianin irngai nuam mahai.

³⁰ Khannisian kum tamtak anni chu ni donhaia, irtha tianga deipuhai hmangin nir chutirhaia; khannisian an mikuar sêt angin an oma; khasikin kha rama mihai kuta khan ni pêk ta.

³¹ Khannisianlân ni lungkhamna zârin a hekna chu intungtir pehai mak chea, mâk khom masanhai loiin; Pathian lungkham thei taka sip ni ni sikin.

³² Khasikin, kin Pathian, roiinpui, itinrêngthothei le ichiom, thuthung dêna lungkhamna inlangtu khan kin rênghai kin mi lianhai, kin ochaihai, kin deipuhai, kin pi le puhai le ni mihai murdi chunga Assuria rênghai inlal lai ata atûn tena dengtheina hong omhai hi a mai maiin insâp no’n lân.

³³ I khomnisian, kin chunga thil hong omhai hi nang chu ni fela; dik takin thil ni thoa, keini’n chu dikloi takin kin oma:

³⁴ kin rênghai, kin milianhai, kin ochaihai, kin pi le puhai khomin ni dân zôm mahaia, ni thupêk le ni thu inhriattir, anni irchutirna khom pom nuam mahai.

³⁵ An chunga ni isa pehai hrai hi, an ram khom ram liantak le satak ni ipêk khan ni sintho loiin, an sintho indik loihai mâk nuam loiin.

³⁶ Irngai ro, atûn hin chu suak kin ni tâka, a sûnga thil sa le thil ra tamtak kin pi le puhai fâk hranga ni ipêkna rama hin suak kin nia.

³⁷ Kin sual sikin kin chunga rêng hrang ni indanghai lakin an irchongpuia: kin taksa le kin sa chunga khom anni thu tak a ni tâka, kin ikamang zoi a ni ta.

Mipuihai chonginkung irziak

³⁸ Khahai sika khan thu det kin inkunga, kin irziak; kin milianhai, kin Levihai le kin ochaihaiin an ni indetpui a ni.