NEHEMIA 8 - PATHIAN LEKHABU IRTHIANG C.L. Bible (BSI)

Mipuihai laia Ezra’n Dân bu a tep

¹ Khan, mi murdi an rênga inrualin tui mikot hmâi tiang hmun irzatna lai taka an irbûma; khanchu lekha irziaktu Ezra chu Rengpa’n Israelhai zôm hranga a thupêk, Mosia dân bu chu hong chôi hrangin an tia.

² Khanchu tha sarina sûn khat nî chu ochai Ezra’n ar bûmhai nu le pa an hriat theihai laia khan dân bu kha a hong chôia.

³ Khan khataka mi chu tui mikot hmâi hmun irzatna taka nupang le pasal le an hriat theihai laia zîng ata sûn sôt a tepa, mi murdi’n kha dân bu thua khan an mikuar an sung chita.

⁴ Khan khaang hrang piala an isin thing dokâng irsânga khan lekha irziaktu Ezra chu a ngîra; a sîr chang tiang khan Matithia, Sema, Anaia, Uria, Hilkia, le Maaseia hai an ngîra; a vei tiang khan Pedaia, Misaela, Malkija, Hasuma, Hasbadana, Zekaria le Mesulama hai.

⁵ Khan Ezra’n mi murdi mithmu laia lekhabu irzuat kha a sûta. A hong sûtin chu mi murdi an ngîr vinga:

⁶ Khanchu Ezra’n Rengpa Pathian roiinpui tak chu an pâka. mipui tam dôrin an bân an phara, “Amen, Amen,” tiin an chôiirsânga; khanchu an kûna, an hmâi hnuai intônin Rengpa chu chubai an mûka.

⁷ Khan Jesua hai, Bania hai, Serebia hai, Jamina hai, Akuba hai, Sebethaia hai, Hodija hai, Maaseia hai, Kelita hai, Azaria hai, Jozabada hai, Hanana hai, Pelaia hai, le Levi haiin mipuihai chu dân an hrilfia pehaia; mipuihai chu an omna hmuna an om maia.

⁸ Khan lekhabu, Pathian dân bua mi kha fel takin a tepa; a omzia a hrilfiaa, an itep sai kha an hriat infeltirhaia.

⁹ Khan ram optu Nehemia le ochai lekha irziat thei Ezra le mipui irchutirtu Levi haiin mipuihai laia khan, “A vuan hin Rengpa nin Pathian hrangin sûn irthiang a nia; nin milung indûk no unglân, chap khom chap no roi,” an tia. Dân thu kha an inhriatin chu mipuihai an chap chi chiana.

¹⁰ Khanchu an kuang khan, “Fe unglân, thil thâi fa unglân thil thum in roi, ite suang hrang boihai hrangin thonhai unglân, a vuan hin Rengpa ta hrangin sûn irthiang a ni, nin milung insiat no unglân; Rengpa chunga lômna kha nin hrâtna a ni,” a tia.

¹¹ Khanchu Levi haiin, “Dâihrek roi, a vuan hin sûn irthiang a ni; nin milung inzîngtir no roi,” mipui murdi chu dâihrekin an irngaia.

¹² Khanchu a thu hrilfia kha an inhriat thei sikin mipuihai kha fâk hrang le in hrang, mihai thon hrang le raifân taka omin an chîn thei ta.

Kairêng kût an hmang

¹³ Khanchu, sûn hnina nî chu mipuihai laia a ina ar luahai le ochaihai, Levi hai chu dân thu irchu hrangin lekha irziaktu Ezra kuang an fea.

¹⁴ Rengpa’n Mosia kuanga zôm hranga a thupêk dân chu tha sarina kût lai taka Israel irchihai irngamna hmuna, omna thu irziak an hmua.

¹⁵ “Tânga fe unglân, oliv ônhai, irhmûi ôn zârhai, le tûm ôn hai, thing lianpahai irngamna hmun sinna hrangin va la roi,” tiin an khua le Jerusalem khuaa inpuangin a om hrang thu an tepa.

¹⁶ Khanchu mipuihai kha an fea an va lâka, mihaiin an in sûnga, an mikota, Pathian mikota, Tui mikot hmun lianna takhaia, Efraima mikot hmun irzatna haia, irngam hmun an sina.

¹⁷ Sala zôk irbukhaiin ngam hmun an sina, kha hmuna khan an oma; Nuna nâipa Jesua zoro rengata, kha nî sûn dênin Israel irchihai khan khaang khan tho ual ngai mahaia. Khanchu lômna liantak a hong ni pehaia.

¹⁸ A sûn tin a’rphut ata a tôp dênin Pathian dân bu a tepa, khan sûn riat nî chu kût hek nî a nia, thupêk angin ir-up taka inkhômin an ichîn ngai a ni.