NEHEMIA 4 - PATHIAN LEKHABU IRTHIANG C.L. Bible (BSI)

Nehemia’n a sêltuhai an hnê

¹ Khannisianlân hiang hin a nia, Sanbalata’n kul kin sin ti an hriatin chu, a ning an mura, a sate’n a milung hoi pe maka, Judahai a’rzûl tôlhaia.

² Khanchu a urênghai le Samari sipaihai makunga thu a hrila, “Hi Juda mi siat le sahai hin i zât mo an itho? khopui siam insa nôk an itum ma ni? An irbôl thei hrang mo an isôn? Sûn khat sûnga hin hlo mo chuk thei nihai? Sahrok om khômna vai a sa tâk hi, lung kâng zoi saihai hi, an indingthar thei nôk hrang mo?,” a tia.

³ Khan a kuang Amon mi Tobia khan, “Hong inding ngân ri sehai; Sihal khom luihai sian, an lung irkulnahai chu chim pehai ta no ni mo,” a tia.

⁴ O kin Pathian irngai ro, êsêlin kin iom a ni; an ni insîr insiatnahai hi anni chunga irlet pehaiin lân, anni khom kho rama mo intângtirhaiin lân;

⁵ an insiatnahai irkhû no’n lân, an sualnahai chu irnghil pehai no ro; kul siamtuhai chunga an ning an mur kêng a ni.

⁶ Khanchu kul kha kin sina, ar sâng lam chimripin kul lian dôrin kin irsua vinga; mipuihaiin sin hrâtna lungrîl an irput maia.

⁷ Khannisian hiang hi a nia, Sanbalata, Tobia, Arab mihai, Amon mihai le Asdod mihaiin Jerusalem kul chu siam insa a ni mai ti le a siatna lai kin pho mai ti an inhriatin chu, an ning an mur pehai uala;

⁸ khanchu Jerusalem kha hong doia buaina siam hrang an irti nôk tâka.

⁹ Khannisianlân annihai zârin kin Pathian kuang kin chongchaia, a sûn a zân, an ni hrung hrangin kin irbea.

¹⁰ Khan Juda khan, “Sinthotu sahai an irzala, sahrok lak a tama, kul chu kin isin siam thei ta loi hrang kêng,” a tia.

¹¹ Khan kin râlhai lakin, an laia kin hong fea, kin thathaia, sin kin mâksan mân chu inhre no nihaia, ni hmu thei no nihai an lei ti tâk sikin.

¹² Khannisianlân, Juda mi an kôla omhaiin, kin kuang an honga, kin râlhaiin an ni ikhitna laihai chu an ni hril mai ngaia.

¹³ Khasikin kul siatna ar hnuaina lai taka, hmun irthôlna taka mipuihai chu an in sûng mia irpâlin, an khandai, an ufeihai, an thal ngulhai chôiin irbîk hmun an zonga.

¹⁴ Khan ki hong en vêla, ki thoia, mi sahai le roirêltuhai, mipui danghai laia, “Annihai so ite chihai viat no unglân, Rengpa roiinpuitak le ichiom tak chu inhre maiin, nin urênghai, nin nâihai nin dôngmahai, nin in inzôk tumin doihai roi,” ki tia.

¹⁵ Khanchu hiang hin a hong nia, kin râlhaiin an len hriat ti le an sintho tum chu Pathianin ite bê’n bê mah ti an inhriatin chu, kul tianga mâni sin thôna hmuna kin fe nôka.

¹⁶ Hiang hin a nia, kha rengata chu kin ruathartehai a chimripin sin an thoa, a danghaiin ufeihai, pho, thalngul, rôpphohai an dôna; khan roirêltu’n Juda in mihai, kul siamtu murdihai an sanhai maia.

¹⁷ Kul siamna hrang hmangrua pêlhai khomin, an kut kiang khat tiang sin an thoa, kiang khat tiang hriamhrei an chôia;

¹⁸ a siamtuhaiin an khandai an vong chita; khaang dôra intak tuangin an sina, khan bekul tum hrangtu khom an kôla omin.

¹⁹ Khan mi sahai le roirêltuhai le mipuihai laia, “Sin hrang a tam hraia, kula hin irthekindarin an sinnahai lak a’rhla za zapa;

²⁰ Bekul irhâi nin inhriatna hmun taka chu kin kuang hon tân unglân; ei Pathianin ni doipui a ti,” ki tia.

²¹ Hiang hin sin chu kin thoa; khan a chimripin chu a zîngbup ata ârsi ar lang mâka chu ufei an chôi maia.

²² Kha lai taka khan, mipuihai laia, “Zâna an ni hrunga, sûna sinthoin tukhom an siahlohai leh Jerusalem sûnga riak ving ri sehai,” ki tia.

²³ Khaang khan keima khom, ki urênghai khom, ki ruathartehai khom, a ni zuia ni hrunghai leh, tûte’n kin tukrivô irkhek loiin hriamhrei irbel pumin tui tiang khan kin irvâk ngai a ni.