NEHEMIA 13 - PATHIAN LEKHABU IRTHIANG C.L. Bible (BSI)

Nam danghai ata irkiangna

¹ Kha nî khan chu mipuihai mikuar inhriatin Mosia lekhabu a tepa; hi lai hin Amon mihai, Moab mihai chu Pathian mihai inkhômnaa khan itiklai khomin an iom thei hrang ni mah ti a chuanga.

² Israel irchihai bai le tui khoma dôn loia, anni khomâksâm hranga Balaama an hmang sikin: khannisianlân kin Pathianin khomâksâmna chu satvurna an changtir pehaia.

³ Khanchu hiang hin a nia, dân an irngai zoiin chu Israel mihai laia lei irzêl tâkhai nam dang mihai an zenhaia.

Nehemia dân siam insathai

⁴ Khan matona khan kin Pathian in tentan sûnga hruaituin a siahaia, ochai Eliasiba, Tobia tianga kop angin.

⁵ Maton tianga Levihai, hlasaktu hai, mikot hrungtuhai dongtum, baidi thilinhlan, mirimhoi, bêlbûr bu, sôma inkhat, uain le sahriak le ochaihai hranga ngaihoi thilinhlan an isiana ngai tentan lian tak kha Tobia hrangin a sinsiam pea.

⁶ Khannisian, kha thil a om laia khan, Jerusalema om ma unga, Babulon rêng Artazerzia kum sômthum kum hni an lal kumin rêng kuang ki fea, sûn iza zoia phalna ki zonga

⁷ khanchu Jerusalema ki fea, Pathian in irkul kholâia tentan sinsiama Tobia hrang Eliasiba’n thil saloi a itho kin hriata.

⁸ Ki milunghoi thei ta maka: khasikin Tobia in sûnga bungrua murdi, kha tentan ata kha kin thekpai pea.

⁹ Thu ki pêka, tentanhai an irthiala; khanchu Pathian ina bêlbûrhai chu baithep thil inhlan le mirimhoihai leh ki lâk lût nôka.

¹⁰ Khan Levihai le, hla saktuhai chu an dongtum an pêkhai no sikin, a ni loi lam tiang an rot tah ti kin hriata.

¹¹ Khanchu roirêltuhai ki halhaia, “Itina mo Pathian ina khan a la irsam thei?” ki tia. Khanchu ki koibukhaia, an omna khan kin omtirhai nôka.

¹² Khanchu Juda nâihai murdi’n bu, sôma inkhat, uainhai, sahriak hai, tholôm bukkhômna khan an hong chôia.

¹³ Khan ochai Selemia le lekha irziaktu Zadoka le Levihai laia Pedaia hai chu tholôm siakhômna hruaitu hrangin ki siamhaia; anni leh irhlet hrangin Matania nâi Zakura nâipa Hanana a oma: iamom taka irngai mi a nia, a sintho chu a urênghai laia thil sem ngai a ni.

¹⁴ O kin Pathian, hi thua hin nin hre mai ro, ki Pathian in le sin thôna hrangin ki sintho insahai chu ni pai pe no roh.

¹⁵ Kha laia khan Judai rama irngam nia uain tui sinhai, bumût hong pêl hai, grep, theipui le puakrikhai inpêltir hranga sakuartunga an isiam lai ki hmua, annihai kha irngam nî sûn Jerusalema an hong tungpuia, khan fâk hrang zuar mihai khan a dik loizia kin hriattira.

¹⁶ Tura rama mi, khataka omhai khomin ngahai le hmangrua tinrênghai an hong lâka, irngam ni sûna Juda mihai leh Jerusalema an zuara.

¹⁷ Khanchu Juda mi lianhai kha ki halhaia, “Irngam nî porinchetira thil saloi nin itho hi imo a omzia?

¹⁸ Nin pi le puhai khomin hiang hin an lei thoa, kin Pathianin hi thil saloi murdihai hi kin chunga le hi kho sûnga hin a hong intungtir nin isôn loi ma ni? khaang dôra irngam nî porinchetirin Israel mihai laia ningmurna nin ni la intungtir pe mai,” ki tia.

¹⁹ Khanchu hiang hi a nia, irngam nî a hong ni nôkin chu Jerusalem kul mikot a hong inthim nôka, khanchu mikothai khâr hrangin thu ki pêka, irngam nî a hek mâka chu inhong loi hrangin thu ki pêka; irngam nia an thil hong pêlhai an lâk thei loina hrangin ki ruatharte dônhai mikot kin hrungtirhaia.

²⁰ Khanchu bepâr thohai le neinun zuar mihai chu voikhat, voihni vêl Jerusalem pên tiang an riaka.

²¹ Khanchu an dik loizia kin hriattirhaia, an kuang, “Ithoa mo kul kôla nin iriak? Hiang hin nin tho nôkin chu nin chunga ki kut la tha ki ti,” ki tia. Kha rengata chu irngam nî sûn chu hong ta mahai.

²² Khanchu Levihai chu irsinsiama, irngam nia irthiangtirna kul mikothai hrung hrangin thu ki pêka. O ki Pathian hi thua hin nin hre mai ro, ni lungkhamna zârin ni la hôiin lân.

²³ Kha zoroa khan Juda mi, Asdod, nupanghai, Amon nupanghai, Moab nupanghai, dôngma neihai ki hmua;

²⁴ an nâihai chu Asdod chongin an chonga, anni chong ti loiin chu Juda chong an irnghil ta.

²⁵ Khan annihai kha ki halhaia, khomâk ki sâmhaia, senkhathai chu ki vîkhaia, an samhai kin potpai pehaia, an nâinuhai chu an nâihai pasal an inneitirhai loi hrangin, an nâipasalhai khomin dôngma nei ta loi hrangin Pathian irhmingin khomâk ki’rsâmtirhaia.

²⁶ “Israel rêng Solomona khom khaanga thil sa tho’n a isual mo ni ma? khaang dôra tho khomin nam tamtak laia ama anga rêng om mahaia, a Pathianin a indit tak a la nia, Pathianin Israel ram murdi chunga rêngin a siama; khannisian ama ngêt khom kha ram dang nupangin an insiattir a ni.

²⁷ Khasikin ram dang nupang luaa kin Pathian chunga thil saloi thoin, nin thu kin izôm hrang ma ni?,” ki tia.

²⁸ Khanchu ochai inlal Eliasiba nâi, Joiada nâipa pasal khat chu Horan mi Sanbalata mâkpa a nia, khanchu ki makung ata ki’rzûlpaia.

²⁹ O ki Pathian, ochai sin le ochai sintho hranga thuthung le Levihai thuthung an porinchetir sikin inhre pehai mai roh.

³⁰ Khaang khan ram dang mihai ata ni’rthiangtirhai, ochaihai, Levihai sin thôna murdia sin tho hrang dân ki zêk pehaia.

³¹ A zoro ang taka thil inhlan hrang le, chîmu vâng masa inhlan hranghai le, o ki Pathian a satna lam takin nin hre mai roh.