NEHEMIA 12 - PATHIAN LEKHABU IRTHIANG C.L. Bible (BSI)

Ochai le Levihai irhming

¹ Sealtiela nâipa Zerubabela le Jesua kôla fe ochaihai le Levihai chu hihai hi an ni: Seraia, Jeremia, Ezra hai,

² Amaria, Maluka, Hatusa hai,

³ Sekania, Rehuma, Meremota hai,

⁴ Idoa, Ginethoia, Abija hai;

⁵ Mijamina, Maadia, Bilga hai;

⁶ Semaia, Joiariba, Jedaia hai;

⁷ Salua, Amoka, Hilkia, Jedaia. Hihai hi Jesua dam laia ochai le an urênghai laia hruaituhai an ni.

⁸ Hihai khêla hin Levihai: Jesua hai, Binuia, Kadmiela, Serebia, Judahai lômthu insîrna an hruaitu Matania hai le a urênghai chu

⁹ Bakbukia le Unoa le an urênghai khom a papâlin an irthûl ngai a ni.

¹⁰ Khan Jesua’n Joiakima a neia, Joiakima’n Eliasiba a neia, Eliasiba’n Joiada a neia.

¹¹ Joiada’n Jonathana a neia. Jonathana’n Jadua a neia.

Ochai irchi hruaituhai

¹² Khan, hihai hi Joiakima dam laia ochai, a ina ar luahai chu an ni: Seraia irchia mi Meraria hai, Jeremia irchia mi Hanania hai,

¹³ Ezra irchia mihai laia Mesulama hai, Amaria irchia mi Jehohanana hai:

¹⁴ Maluka irchia mi Jonathana hai, Sebania irchia mi Josefa hai:

¹⁵ Harima irchia mi Adna hai, Meraiota irchia mi Helkaia hai;

¹⁶ Idoa irchia mi Zekaria hai, Ginethona irchia Mesulama hai.

¹⁷ Abija irchia mi Zikria hai, Miniamina irchia mi, Moadia irchia mi Piltaia hai,

¹⁸ Bilga irchia mi Samua hai, Semaia irchia mi Jehonathana hai,

¹⁹ Joiariba irchia mi Matenaia hai, Jedaia irchia mi Uzia hai,

²⁰ Salaia irchia mi Kalaia hai, Amoka irchia mi Ebera hai;

²¹ Hilkia irchia mi Hasabia hai, Jedaia irchia mi Nethanela hai.

Ochai le Levi irchi irsinsiana bu

²² Levi irchihai chungchânga hin, Eliasiba, Joiada, Johanana, Jadua dam laia a ina ar luahai infelna a nia; khaangin ochaihai khom Persia rêng Daria inlal dênin irsinsiana an nia.

²³ Eliasiba nâipa Johanana dam lai dên khomin Levi nâihai in sûngkua irhming irziakna bua chuang a ni.

Tempila sin irsem dân

²⁴ Khan, Levi ulianhai chu: Hasabia, Serebia, Kadmiela, Jesua le Binuia, a urêng, Pathian mi Davida thupêk anga a pâl pâl irthûla, inpâk le lômthu insîr hranghai leh.

²⁵ Matania, Bakbukia, Obadia, Mesulama, Talmona, Akuba hai chu mikot kôla neinun siakhômna in le mikot hrungtuhai an ni.

²⁶ Hihai hi Jesua, Jozadaka, nâipa nâi Joiakima dam laia mi le ram optu Nehemia le Ezra ochai le lekha irziaktu dam laia mi an ni.

Nehemia’n kul a inhlan

²⁷ Jerusalem kul an inhlana khan, têngrep hai, perkhuang hai, belem hai le hlasaka lômthu hrila lôm taka inhlanna inkhôm hmang hranga Jerusalema hong hrangin Levihai chu an zong suakhaia.

²⁸ Jerusalem kôlvêl ata Netofa hai khua ata hla saktuhai an honga;

²⁹ Bethgilgal ata le Gebe-a le Azmaveta ram ata khom hla saktuhai khan Jerusalem kôla khan khophâi an sâta.

³⁰ Khan ochaihai le Levihai an irthiangtirhaia, mipuihai, kulhai, le a mikothai an irthiangtira.

³¹ Khanchu Juda mi ulianhai chu kul sûnga khan ki hruaihaia, thuhrila irzui dûl dûla fe hrang, pâl lian tak tak inhni ki siama, pâl khat chu sahrok paina lampui tiang kul chang tiang an fea;

³² khan, anni chu lôm takin Hosaia le Juda mi lianhai a chimrip,

³³ Azaria, Ezra, Mesulama hai,

³⁴ Juda, Benjamina, Semaia le Jeremia hai,

³⁵ Bekul chôi ochai nâi senkhathai le, Asafa nâipa Zakura, ama nâipa Mikaia, a nâi nôk Matania, ama nâipa Semaia, ama nâi nôk Jonathana, ama nâipa Zekaria;

³⁶ a urêng Semaia, Azarela, Milalaia, Gilalaia, Maaia, Nethanela, Juda, Pathian mi Davida itum ngai thilhai chôi ngai, Hanania haiin an zuia; khan lekha irziaktu Ezra’n a hruaihaia:

³⁷ Tuikuang lampui mikot an tungin, kul irphutna an maton tiang Davida khua luina tianga fe’n Davida in sak tiang an fea, sak tianga tui lampui dên thaiin.

³⁸ Khan lômthu hril hrang pôl danghai chu anni don hrangin an fea, keima’n mipui a chimriphai le meipui sêmna in irsâng saka, kul irsa dênin kin zuia;

³⁹ Efraima mikot chunga, Jeshana mikot chunga ngahai irlôina chunga, Hananela in irsâng le Hamea in irsâng chunga, kêlbelra mikot dên rakin: intângna in mikota khan an ngîra.

⁴⁰ Khanchu lômthu hril hrang pâlhai pôl hnihai chu Pathian ina an ngîra, kei leh roirêltu a chimriphai leh,

⁴¹ Bekul chôi ochai Eliakima, Maaseia, Miniamina, Mikaia, Elioenaia, Zekaria, Hanania hai;

⁴² Maaseia, Semaia, Eleazara, Jehohanana, Malkija, Elama, Ezera hai khom. Khan, hla saktuhaiin an hruaitu Jezrahia haiin inring takin an saka.

⁴³ Kha nî khan irbôlna a sate’n an inhlana, an râi a fân ta taka; Pathianin raifân theina a pêkhaia; nupang le nâipanghai khom an lôma; khanchu Jerusalem lômna chu ram hlatak ata an inhriata.

Tempila hmang hrang thil

⁴⁴ Kha nikhua khan chu tholômhai, ngaihoi thilinhlanhai, neinun vâng masa tak hai, sôma inkhat siana hmuna tentana hruaitu, dân ang taka an inkung, ochai le Levihai dongtum, khua tina a le’rchûtir hranga inkung an nia; Judahai chu sinthotu ochaihai le Levihai sikin an lôma,

⁴⁵ Davida le a nâipa Solomona thupêk angin, hla saktu le mikot hrungtuhai khom an Pathian sintho hrang dân le irthiangtirna dân chu an zôma.

⁴⁶ Tianlaia Davida le Asafa dam laia hlasak pâlhai hruaitu an oma, Pathian inpâkna le lômna hlahai an sak ngaia.

⁴⁷ Zerubabela dam lai le Nehemia dam laiin Israel murdihaiin hla saktuhai le mikot hrungtuhai chu a nitina an irhoipui lamin thu an neia: khan Levihai dongtum chu a dangin a siaa; khan Levi haiin Arona nâipahai dongtum an indanglamtir pehaia.