NAMBAR 9 - PATHIAN LEKHABU IRTHIANG C.L. Bible (BSI)

Ferkân kût serna thu

¹ Rengpa’n Aigupta ram ata an suak hnungin, kum hnina a tha khatna khan, Sinai ramchâra khan Mosia kha a chongpuia,

^2-3 “Hi tha sûn sôm hleiminlina, misa tâk ata irthokin Israel irchihaiin Ferkân kût chu a dân le a balam ang takin an ihmang hrang a ni,” a tia.

⁴ Khasikin Mosia’n mipuihai chu Ferkân kût hmang hrangin a hrilhaia.

⁵ Rengpa’n Mosia kuang a ihril lam ang takin a tha khatna, sûn sôm hleiminlina misa a tâk rengata Sinai ramchâra khan Ferkân kût chu an hmang tâka.

⁶ Khannisian mi senkhat mithi ruak sika irthiangloi an lei oma, kha ni khan Ferkân kût khom chang thei mahaia. Khanchu kha ni khan Mosia le Arona kuang an fea.

⁷ Khanchu a kuang, “Mithi ruak sikin irthiang loiin kin oma, khannisian i sikin mo Israel irchihai laia a zoro taka Rengpa kuang thilinhlan kin inhlan hrang hi nin ni ikhap?,” an tia.

⁸ Khanchu Mosia’n an kuang, “Rengpa’n nin chungchâng thua hin i zât thu mo a ni ipêk ti hih la nghâk viat hi roi,” a tia.

⁹ Rengpa’n Mosia a chongpuia,

¹⁰ “Israel irchihai kuang, nangni laia mi khom, nin irchihai laia mi khom mithi ruak sika irthiang loiin inzinin an lei oma, khannisian Ferkân kût kha an hmang nuama ni’n chu,

¹¹ tha khat zoia hmang hrangin phal pehai ni ta, a tha hnina sûn sôm hleiminli nikhua maton taka hmang an ti, bai chol pol loi bai le hloihna khâ leh an ifâk hrang a ni.

¹² Zîng khovâr nôka fâk hrang ite an ihrê hrang ni ma, a ru khom an inkhiak hrang ni ma, Ferkân kût dân le balam ang takin an itho hrang a ni.

¹³ Khannisian irthiang chaka, inzinna khom nei loia Ferkân kût chang loitu chu a’rchihai lai ata sâtpaiin om a ta, a zoro taka Rengpa kuang thilinhlan chu an hlan no sikin, a sualna man chu ama’n pêl a ti.

¹⁴ Khanchu nam dang mi nin kuanga om Rengpa ta hranga Ferkân Kût chang sa nuam a ni’n chu, Ferkân Kût dân le balam ang takin a itho hrang a ni; hi rama mihai le nam danghai ta hrangin dân inkhat nin inei hrang a ni.

Sûm irkiang

^15-16 Khanchu Biakbuk an indingtir nî khan, sûmzîngin a tuama, zâna chu sûm kha mei angin an langa.

¹⁷ Sûmin Biakbuk kha a’rkiangsan rikipa, Israelhai khan fezâi an rêl ngaia; khan sûm kha a’rngamin chu Israelhai khan riakbuk an khuar ngaia.

¹⁸ Rengpa thupêk angin Israelhai khan riakbuk an mâksan ngaia, Rengpa thupêk ngêtin riakbuk an khuar nôk ngai; Biakbuk chunga khan sûm kha an bok sûng chu, riakbuka khan an om ngaia.

¹⁹ Biakbuk chunga khan sûm kha zoro sôttak a omin chu, Israelhai khan Rengpa thu kha zômin fe ngai mahai.

²⁰ A kâra chu sûm kha Biakbuk chunga khan sûn sôtnote vai a om ngaia, khan Rengpa thupêk angin an inzin suak ngaia.

²¹ Khan a kâra chu, sûm kha khohloi ata zîng khovâr ten vai a om ngaia, sûm kha a’rkiang tena chu, anni khom an inzin suak zoi ngai.

²² Biakbuk chunga khan sûm kha sûn hni mani, tha khat mani, kum khat mani khom a oma ni’n chu, khataka khan Israel irchihai khom omhmun an khuar ngaia, inzin ngai mahai; khannisian a’rkiang tena chu an inzin suak ngai.

²³ Rengpa thupêkin omhmun an khuar ngaia, Rengpa thupêkin an inzin suak ngai, Mosia hmanga Rengpa thupêkin Rengpa thucha an zôm ngai.