NAMBAR 6 - PATHIAN LEKHABU IRTHIANG C.L. Bible (BSI)

Nazarit-hai ta hranga dân

¹ Khanchu Rengpa’n Mosia a chongpuia,

² Israel irchihai kuang, hiang hin hril ro, an kuang, pasalin mani, nupangin mani, Nazarit ni hranga a bîk taka chonginkungna neiin Rengpa kuang a’rpêka ni’n chu,

³ uain le zû nghei a ta, grep ra ata siam, zû ite a iin hrang ni mah.

⁴ Nazarit mi a’rti sûng kârka chu grep rânga thilhai kha a ifâk hrang ni ma, grep ru le a kôr khom a ifâk thei hrang ni mah.

⁵ Nazarit chonginkungna hnuaia a om sûng chu, a sam mani, a hnerkamul mani khom epin a irvo hrang ni mah. Chonginkungna sika Rengpa ta hranga irpêkhlet a ni sikin, a sam le a hnerkamul a ihôi hrang a ni.

^6-7 A sam kha Pathian ta hranga a’rpêk ti entîrna ni a ta, khasikin a pa thina hmuna fein a iporinche hrang ni mah.

⁸ Nazarit mi ki nih a’rti kârka chu, Rengpa ta hranga irthiang a ni.

⁹ A kôla irningloia a thi an om thutin chu, a sam kha porche a ni sikin, sûn sari nghâk a ta, khanchu a sam le a hnerkamul kha voipai a ta; khanchu a hong irthiang nôk hrang a ni.

¹⁰ Khanchu sûn riat a hong ni tena chu, vasute inhni mani, phervali inhni mani chôi a ta, irtongna Biakbuk kotbâia khan ochai kuang hong chôi a ti.

¹¹ Ochai khan mithi sika ama thâr irthiangna hrangin inkhat kha sual irbôlna’n inhlan a ta, inkhat dang kha pum hâlirvôm thilinhlana khan inhlan a ti; kha ni khan chu a sam kha a irthiangtir nôk nih a ti.

¹² Matona a lei inhlan kha, a sam a porinche tâk sikin pom ni ta no ni. A thar vangin Rengpa kuang Nazarit mi ni theina hrangin a inhlan nôk hrang a ni. Tho’nsualna irbôl hrangin kêlbelrate kum khata mi thilinhlana hrangin chôi sa a ti.

¹³ Hi hi, Nazarit mi, ki ni a’rtihna bîk nikhua a’rkip tena tho hrang dân chu ni a ta; irtongna Biakbuk kotbâia khan hruai ni a ti.

¹⁴ Rengpa kuang demnaboi sa inthum inhlan a ta; kêlbelra tuaite kum khata mi pum hâlirvôm thilinhlan hrangin, kêlbelra irlate kum khata mi sual irbôlna hrangin le belrachal kha irngeina hrangin.

¹⁵ Khabana bai chol pol loi khamphulu khat; baidi le oliv hriak leh siam baitiam le oliv hriak pol baitiam irphân ni a ta, khanchu buhûm le uain thilinhlana inhlan sa a ti.

¹⁶ Ochai khan kha thilinhlanhai kha sual irbôlna le pum hâlirvôm thilinhlanin Rengpa kuang inhlan a ti.

¹⁷ Kêlbelrachal le khamphulua bai kha irngeina thilinhlanna hrangin Rengpa kuang inhlan a ta; buhûm le uain khom kha inhlan sa a ti.

¹⁸ Nazarit mi khan irtongna Biakbuk kotbâia khan a sam ep infâi ving a ta, irngeina thilinhlan hâlna meia khan hâlpai a ti.

¹⁹ Khanchu ochaiin kêlbelrachal hmê a dârsuama suang inhmin sai le khamphulua baitiam khat le chol pol loi baitiam irphân inkhat kha la sa a ta, Nazarit mi kuta khan pe a ti.

²⁰ Khanchu ochaiin ngaihoi thilinhlanna hrangin Rengpa makunga khan chôi a ta, khahai kha ochai dongtum thil irthianghai chu a ni, kêlbelrachal a rôp le a ke ochai dongtum ti bana chu. Khanchu Nazarit mi khan Uain kha in thei ta a ti.

²¹ Hihai hi a ni, Nazarit chonginkung dânhai chu, khannisian Nazarit mi’n a chonginkungna a innang khêla, thil dang inhlan sa a nuamin chu, a chonginkunghai kha irkiptir ngêt a ti.

Ochai satvurna chongchai

²² Rengpa’n Mosia a chongpuia,

²³ Arona le a nâipasalhai kuang, hi thu hmang hin Israel irchihai chu sat ni ivur hrang a ni:

²⁴ Rengpa’n sat nangni vurin, nangni donsui mai ri se;

²⁵ Rengpa’n nin chunga a hmêl invâr pe sianlân, nangni inren mai ri se.

²⁶ Rengpa chu nangni tiang zuang irhei sianlân, lungirngamna nangni pe ri se, tiin hril roh.

²⁷ Khanchu Rengpa’n, “Israel irchihai chunga khan ki’rhming hi satvurna’n an inpuangin chu, kei khomin satvurhai ki ti,” a tia.