NAHUMA 2 - PATHIAN LEKHABU IRTHIANG C.L. Bible (BSI)

Ninevi siat thu

¹ Sukkhoi irnôitu kha ni makunga a zuang chum e: kulpui kha enkolin lân, lampui kha enkol ro; ni kong inngartirin lân, ni sinthotheina kha hrât takin siam insa ro.

² Israelhai roiinpuina angin Jakoba-hai roiinpuina kha Rengpa khan an dingtir nôka: inrongtuhai khan anni kha an inrong zoi tâka, an Grep ônhai kha an insiat zoi tâk a ni.

³ A mi hrâthai pho kha thisen a nia, mi huaisenhai kha sen inlârin an irbela; an irsinsiamna nîa khan tâlihai kha kâpa thîr irtêkin a’rtêk zor zora, ufeihai kha irkhêl takin a’rtêk zor zor a ni.

⁴ Tâlihai kha kholaia an intân mur mura, lamlian irzathai khan an irsuk mer mura: meiser angin an inlanga, kôlirlek angin an intân zut zut a ni.

⁵ A mi lianhai kha a koi suaka: an fe’n rual kha an tûka; kul bang tianga pan kha an irhnota, thil irdîpna hrang an siama.

⁶ Vadung mikothai kha inhong a nia; rêng in kha inboipaiin a oma.

⁷ Khan, rêngnu Huzzabi kha korongboiin an rotpuia; a suaknuhai khan an rôp irchûmin vasu inkur ang dênin an chapa.

⁸ Tianlai ata kha Ninevi khua hi chu dîl ang a nia: khannisianlân an intân irhmanga; ngîr roi, ngîr roi, tiin an khêka; khannisian tûte irheikîr mahai.

⁹ Sumru sumhai kha lapai unglân, rângachak sumhai chu lapai pehai roi. Thil irtikkhôm le bungrua sa murdi roiinpuizia khan mong nî nei mah.

¹⁰ Inrongtirin a oma, a rong chiana, a iram a ni: an milung kha a zôi tâka, an irkhûkhai kha a ngara, An konghai khom a na zit tâka, an hmêlhai khom a dông zoi zit tâka.

¹¹ Tûte inchitir loia an oma, kâmkeibaknei chalhai, kâmkeibaknei puihai, kâmkeibaknei têhai an ichai vêlna, kâmkeibaknei irbu zôl le kâmkeibaknei têhaiin an fâkna hmun kha khôn mo a ini?

¹² Kâmkeibaknei chal khan a têhai ruk dôr an pot irnôia, kâmkeibaknei puihai hrang a sê thata, a khurhai kha saruakin an siptira, a’rbu zôlhai kha saruak inpot irnôiin.

¹³ Sipaihai Rengpa khan, “Irngai ta, nang ki doi a ni, a tâlihai kha hâl khu ûl ûl ki ta, ni kâmkeibaknei têhai kha khandaiin irhmangtir a ta: khan, irnênga ni sa sê hi inmongtir ki ta, ni palaihai irhâi kha inhriat ni ta no ni,” a tia.