NAHUMA 1 - PATHIAN LEKHABU IRTHIANG C.L. Bible (BSI)

Ninevi chunga Rengpa ninginmurna

¹ Ninevi khua puakrik kha, Elkos mi Nahuma’n inlârna a ihmu thu chu,

² Rengpa kha nunse Pathian le phuba lâk hmang mi a ni; Rengpa khan phuba a lâka, ninginmurna’n a isip a nih; Rengpa khan a doituhai chunga phuba a lâka, a râlhai ta hrangin ningmurna a irtingtir a ni.

³ Rengpa chu a milung ar uaia, a satêrenga thil thothei a nia, mi sual chu thiam inchangtir zel no ni; Rengpa khan kêllaiher le phâivopuia lampui a nei, sûmhai chu a ke vâiphin a ni.

⁴ Tuikhanglian kha a halirchua, an kang inchârtira, tuidung tinrênghai khom an kangtir zoia: Basan ram le Karmel tâng kha a châr zoia, Lebanon tâng pârhai kha a ichuai a ni.

⁵ Tâng lianhai kha ama sikin an inhnînga, tâng chînte tehai kha a hong zora; a makunga khan irnêng hi an thinga, rammual le a sûnga om murdihai leh khan,

⁶ A milung hoiloina makunga khan tu mo ngîr thei hranga, a ninginmurna irkhêl tak khan tu mo om thei hrang? A ninginmurna kha mei anga bunpai a nia, lungpuihai kha a irnôitir chit a ni.

⁷ Rengpa kha a saa, chardong nia kul det a ni; amaa an iamna irnghattuhai kha an hriat.

⁸ Ama doituhai rêk chu tuilian irkhêl tak hmangin inboitir zit a ta, a râlhai kha khua inthima irzûl lût a ti.

⁹ Rengpa doiin imo nin ingaitua? Irhmang ripna nangni a intungtir hrang a ni; phuba la nôk nang ta no ni.

¹⁰ Ilhling râng anga omin, An uain in khan inchie indui ual angin om khom sian, ilhlingbuk angin le fapôl châr anga irhmangtir zit la ni an ti.

¹¹ Nangmaa suak mi inkhat Rengpa irdoipuia thil sual ngaituatu, pualoina chong irbepuitu a om,

¹² Rengpa khan hiang hin a ti: “An hrât thei dôrin hrâthai khomsian, tam khom tamtak nihai khom sian, kha tena khom khan sâtpaiin om an ta, irhmang an ti. Nang lei intaktir ta khom inlân, nang intaktir ta no ning.

¹³ Atûn chu ni kuang ata a ringkol kha inkhiakpai ki ta, nangma khitna hruihai kha insatpai zit ki ti.

¹⁴ Rengpa khan ni chungchânga thu a pêka, nir hming irput hrang irchi nei no chi ni. ni pathianhai in ata millim siam chop le millim sûnhai kha inboipai ki ta; ni thân siam ki ta; ni sual sikin,” tiin.

¹⁵ Tânghaia thurchi Sa intunga, irngeina thu tânginsampuitu ke kha en ta! O Juda, ni kûthai kha serin lân, ni thu’nkunghai kha sua ro: mi pualoi khan nang paltan nôk ta no ni; irhmangtir chit a ni tâka.