MIKA 7 - PATHIAN LEKHABU IRTHIANG C.L. Bible (BSI)

Israel tho’nsualna

¹ Ki chung a zîng bâka! fûrpui thei an irhmal khôm zoro laia om ang le grep lâk zoro laia grep irhmal la hrang ang ki nia: a ra irku fâk hrang om ma; ki hringna’n theipui hmin masa a irzuk a ni.

² Pathian uksak mi chu irnêng ata ar hmanga, mihriam laia mi diktak zel om mahai: thisen insua hrangin an inchân zita; mi tinin mâni urêng kha lênin an ivôr a ni.

³ thil saloi thôna hrangin an kut kha a theithiama, hruaituhaiin inphût an neia, roirêltuhaiin fâkinrûkna an ngêna, mi lianhaiin an inuam tak sual an hrila, an inthurual irhlôm a ni.

⁴ An laia mi satak kha buar ang a nia: mi dik tak kha sûl ilhling nei nêkin a siat ual: ni ivêngtuhai nikhua a fanga ni om nia ngei kha a hong tung ta, kha kha an lunginzîngna nikhua ni a ti.

⁵ Rual kha iam no’n lân, hruaituhaia iamna irnghat no roh: Ni rôpsuama om nu ata kha ni bâi mikothai kha vêng insa roh.

⁶ Nâipa’n pa irhming an siattira, nâinu’n a nu a doia, moiin a pi a doia; mihriam râlhai kha ama in sûng mihai dên an ni.

Rengpa’n saninhringna a zuan tung

⁷ Keima rêkin chu Rengpa tiang en ki ta; ki saninhringna Pathian kha nghâk ki ta; ki Pathian khan a ni irngaitua hrang a ni.

⁸ O ki râl, ni manêp mai no ro: ki tûk tika khom thoi nôk ki ti: inthima ki toi khomin Rengpa kha ki ta hrangin vâr ni a ti.

⁹ Rengpa chunga thil ki tho’nsual tâk sikin, a milung hoi loina tak tak kha pêl ki ti, ki chungchâng nin sîrpuia, ki ta hrangin roirêlna kha a tung mâka chu: vâra ni hruaisuak a ta, khan, a felna kha hmu ki ti.

¹⁰ Khanchu ki râl kuang, khôn mo Rengpa ni Pathian, titu khan kha kha hmu a ta, mualinphoina’n ama kha irkhu a ti. Ki mithai hin ama kha en a ta; atûn chu kholai dialdôk anga sirbe ni ta a ti.

¹¹ Ni kul banghai siamna nikhua hranga chu! kha nikhuaa khan thu’nkung kha hlatak dêna irzattir ni a ti.

¹² Kha nikhuaa khan Assuria ram le Aigupta khopui ata, Aigupta le vadung dên rakin, tuikhanglian le tuikhanglian kâr ata le tâng le tâng kâr ata kha ni kuang hong an ti.

¹³ Khaang dôra khom khan ram kha, a sûnga lênghai sik le an thiltho ra sika khan inramtir ni an ti.

Israel hrangin Rengpa khonzâna

¹⁴ Karmel tâng kâra ramhnuaia beidong taka om, nir chon dong belra pâl, ni mihai kha ni hêmvuak hmangin infa’n lân: tianlai ang khan Basan le Gilead infa’n om ri sehai.

¹⁵ Aigupta ram ata ni fe suak lai ang khan, a kuang thil irkhêl takhai inentir ki ti.

¹⁶ Nam tinin kha kha hmu an ta, an thilthotheina murdi kha inzakpui an ti: an hmûr hîp an ta, an mikuar sêt a ti.

¹⁷ Mirûl angin pil inliak an ta; irnênga inboka irvâka fehai angin an omna khur ata khan inthing pumin hong an ta: Rengpa ei Pathian kuanga khan chi pumin hong an ta, nangma sikin chi an ti.

¹⁸ Nang anga pualoina ngaidamtu le irchon dongtum la omsun, tho’nsualna lôipaitu Pathian tu mo om? A ninginmurna kha vong mai ma, lungkhamnaa a lôm tak tak ngai sikin.

¹⁹ Irhei kîr nôk a ta, ei chunga lungkhamna nei a ti; ei pualoinahai kha a ke hnuaia sirpha a ti: nangin an sualna murdihai kha tuikhanglian mong inthûk takhaia khan pai lût ni ti.

²⁰ Tianlaia ei puhai kuang chong nin kung tâka, Jakoba kuang thutak le Abrahama kuang lungkhamna kha hlensua ni ti.