MIKA 5 - PATHIAN LEKHABU IRTHIANG C.L. Bible (BSI)

Bethlehem ata roirêltu Pathianin pêk an kung

¹ Sipai pâlhaio, irpan irhlôm roi, a nir huala, Israelhai hruaitu kha a bianga khianghrolin an izêm a ni.

² Khannisian nang Bethlehem Efrata, Juda rama sâng tamtakhai laia kopa a sân chîn khomin lân, nangma ata hi Israelhai roirêltu hrang kha ki ta hrangin zuang suak a ta; a zuang suakna kha tianlai ata le kumtuang ata a ni.

³ Khasikin nâiha irveitu khan a nei mâka chu anni kha irheisan a ti; khanchu a nâi la omsunhai kha Israela irchihai kuang kîr nôk an ti.

⁴ Ama kha chu ngîr a ta, Rengpa hrâtna’n a sâ rual kha infâ a ta, Rengpa a Pathian irhming roiinpuina ngei khan: khan, anni kha zôkin om mai an ta; ama kha irnêng mong dênin a iroiinpui hrang a ni.

⁵ Khan, hi mi hi ei irngeina ni a ta; Assuria mi kha ei rama hong a ta, ei rêng inhai a hong sir tika chu, ama doi hrangin belrapu sari le mi roiinpui kiriat inthang suak ei ti.

⁶ Assuria ram kha khandaiin insiattir an ta, Nimroda ram kha a lûtnaa khan insiattir sa a ti: khan, ama khan, ei rama Assuria mi a honga, ei ram ten a hong sir tika, ama ata khan ni sansuak a ti.

⁷ Jakoba-hai mi la omsunhai kha chi tamtakhai laia Rengpa ata irdo tâk ang le hloisûl chunga rotho angin om an ta; kha khan mihriam nghâk maka, mihriam nâipasalhai ngaisak ual ma.

⁸ Jakoba-hai mi la omsunhai kha namhai laia le chi tamtakhai laia khan ramhnuai sahai laia kâmkeibaknei ang le belra pâl laia kâmkeibaknei vânglai angin om a ta; kha khan a fe theng photin chu, a sirphaa, an pot thêra, a santu hrang khom tûte om mahai.

⁹ Ni kut kha nangma doituhai chunga irlek sianlân, ni râl murdihai kha inboipaiin om ri se.

¹⁰ Kha nikhuaa khan hiang hin ni a ti, Rengpa’n a ti, nangma ata ni sakorhai inboipai ki ta, ni tâlihai insiat ki ti:

¹¹ ni ram khopuihai kha inboipai ki ta, ni kulpui murdihai kha insum ki ti.

¹² Ni kut ata dôitheihai inboipai ki ta; pânzia entheihai nei ta no chi ni.

¹³ Nangma ata ni millim siam chophai le ni lungphunhai kha inboipai ki ta; ni kut suak thil kha biak ta no chi ni.

¹⁴ Nangma ata mi Asera-hai kha inpot suak ki ta: ni khopuihai kha insiat ki ti.

¹⁵ Khan, thu irngailoi namhai chunga khan ninginmurna le milung kângna’n phuba lâkna puiinhlingtir ki ti.