MIKA 3 - PATHIAN LEKHABU IRTHIANG C.L. Bible (BSI)

Mika’n Israel hruaituhai a hril mualinphoi

¹ O nangni, Jakoba-hai hruaituhai le Israel sûngkuaa roirêltuhaio, irngai unglân, nangni ki ngên a ni: roirêl dân kha nin inhriat hrang ni no ni mo?

² Thil sa nin khôkmâka, thil saloi nin irngai poimoa, an vun nin hlîkpaia, an ru ata taksa nin khok thâka;

³ Ki mihai hme nin fâk saa; an vun an hlâipaia, an ru an inkhiakpaia: a ni, bêla suang hrang angin an irchan chita, hmê irtok bêl sûnga hme irchan chit ang dênin.

⁴ Kha tika chu Rengpa insam an ti, khannisianlân anni kha sâm no ni: a ni, kha tika chu an thil thoa an itho insa loizia ang takin, annihai ata a hmâi thup a ti.

⁵ Pêk hrang neihai kuang, irtharngamna tia khêka, pêk hrang nei loihai irdoina om a ti, tia insîrtu deipuhai khan ki mihai an huanga, an chungchâng thu Rengpa’n hiang hin an sîr:

⁶ Inlârna nin hmu loina hrangin nin kuang zân hong tung a ta; pânzia nin en thei loina dôrin nin kuang inthimna zuang om a ta; deipuhai hranga khan nikhua liam a ta, sûn khom an chunga khan nikhua’n thim ni a ti.

⁷ Hmutheituhai kha inzak an ta, pânzia entheihai kha mualinphoi an ti; a ni, an rêngin an bâi hîp an ta, Pathian sâmna om maka.

⁸ Khannisianlân Jakoba-hai kuang an tho’nsualna inhriattir hrang le Israelhai kuang an sualna inhriattir hrangin Rengpa irtha sika thilthotheinahai roirêlnahai le hrâtnahai khan ki isip tâk a ni.

⁹ Nangni Jakoba-hai sûngkua hruaituhai le Israel sûngkua roirêltu, roirêlna dik intira, dikna tinrêng irlettir paituhaio, hi hi irngai unglân nangni ki ngên a ni.

¹⁰ Zion kha thisenin an sina, Jerusalem kha siat zoina’n.

¹¹ Khataka hruaituhai khan fâkinrûkna sabeiin roi an rêla, khataka ochaihai khan hlo sabeiin an irchûtira, khataka deipuhai khan sum sabeiin pânzia an ena: khaang dôr khom khan Rengpa kha ei laia a iom loi ma ni? Thil saloi ei chunga zuang tung no ni tiin Rengpa chunga nin irnghat a ni.

¹² Khasikin Zion kha nangni sika khan, loi anga lâk nôk ni a ta, Jerusalem kha thil siat om khôm ni a ta, biak in omna tâng kha ramhnuai hmun irsâng ang ni a ti.