MATHAIA 3 - PATHIAN LEKHABU IRTHIANG C.L. Bible (BSI)

Baptistu Johana thuhril

¹ Kha lai khan baptistu Johana kha Judai ram ramchâra thuhrilin a honga.

² “Irlet roi, Irvân Ram anai tâk e!” a tia.

³ Ama hi kêng deipu Isaia’n, “Ramchâra mi khêk irhâi khan, ‘Rengpa lamlian siam unglân, A fena hrangin lam intûn siam roi,’ a ti,” tia a insîr kha.

⁴ Johana khan saringsei mul songkolin an nghâka, savun kongkhit a khita, a bu chu khâihmimse le ram khuaihlutui a ni.

⁵ Kha zoro lai khan Jerusalem le Jordan tuidung vêl ram murdia omhai khan ama kha an pan sup supa.

⁶ An sualhai an inpuanga, Jordan dunga khan a lei baptis-haia.

⁷ Khan, Farisaihai le Sadukai tamtak hong a hmu’n an kuang, “Mirûl irchihaio, ningmur hong tung hrang rengata zôk hrangin tu mo baptisma chang hranga nangni inthor?

⁸ Nin sualhai ata nin irlet ngêt a nih ti inlang hrangin sin tho roi.

⁹ ‘Abrahama irchi kêng ei ni,’ tia ningmurna rengata zôk hrangin irtûng no roi. Nangni ki hril, Pathianin hi lunghai khom hi Abrahama irchi’n a siam thei!

¹⁰ Atûn ata thing bul tina hreipui sia chian a ni ta. I ang thing khom ra saloi chu phûra meia tuapai chian an ti.

¹¹ Keima’n chu irlet entîrna hrangin tuiin nangni ki baptis ngaia; ki hnunga zuang hrangtu chu keima nêkin a roiinpui uala, a kekok chôi inruk khom ni ma ung.

¹² Ama’n chu Irtha Irthiang leh meiin nangni baptis a ti; a hruizôla bu kha zâp infâia, panga thun hrangin a mira kha a chôi tâka, a’rsîhai kha chu that theiloi meia hâl irhmang a ti,” a tia.

Jisua Baptisma chang thu

¹³ Kha zoro lai khan Galili ram ata Johana kuang, Jordan dunga baptisma chang hrangin Jisua kha a hong fea.

¹⁴ Johana khan, “Nangin kêng ni baptis hrang ni nia, ki kuang teh ni honga?” ti’n a sêla.

¹⁵ Khannisianlân, Jisua’n, “Atûn hin a sa ti chian ro, hianga Pathianin a inuam murdi ei tho zit hrang a ni,” a tia. Khanchu, Johana’n a sa a ti tâka.

¹⁶ Jisua kha baptisma a chang zoiin chu tui ata kha a suak zôi zela; a ta hrangin irvân ar honga, Pathian Irtha kha vasu anga suakin a chunga chuang a hmua.

¹⁷ Irngai ta, irvân ata hnuk irhâiin, “Hi hi ki nâipa, lungthung tak chu a ni, a chunga ki lôm tak tak,” a tia.