MATHAIA 28 - PATHIAN LEKHABU IRTHIANG C.L. Bible (BSI)

Jisua thoinôkna thu

¹ Sabat nî a hong heka, Pathian ni zînga khua a vâr hrang tônin, Magdala mi Mari le Mari danghai khan thân en hrangin an fea.

² Voikhat rengin hnîngnu a hong inhnînga, irvân ata Rengpa Vântîrtôn a zuanga, a khârna lung kha an hlumpaia, a chunga a toia.

³ A hmêl kha kôlirtêk angin a oma, a silkai khom ivur ang a ni.

⁴ Sipai a nghâkhai khan an chi hrai tâk sikin an inthinga, mithi angin an om ta.

⁵ Vântîrtôn khan nupanghai kuang, “Nangni chu chi no roi, Jisua an ihêmbetu kha nin izong a nih ti kin hriat.

⁶ Hin om ta mah, a iti ang khan a thoinôk ta. Hin hong unglân, a zâlna hi hong en roi.

⁷ Atûn inrang takin fe unglân, a irchutirhai kuang, ‘Thina irthokin a thoinôk ta, Galili rama nin matona a lei fe, kha khan hmu nin ti!’ tiin hrilhai roi. Nangni ki ihril hi inhre mai roi,” a tia.

⁸ Khanchu, ichi le raifânna sipin, thâna irthokin an fe lata, irchutirhai va hril hrangin an intân ta.

⁹ Voikhat rengin Jisua’n anni kha a’rtongpuihaia, an kuang, “Nin chunga irtharngamna om ri se,” a tia. Khan, a kuang an honga, a kezapha an intûka, chubai an mûka;

¹⁰ Jisua’n an kuang, “Chi no roi; fe unglân Galili rama fe hrangin ki urênghai van hril roi, kha khan ni hmu an ti,” a tia.

Thân nghâkhai thu’nsîr

¹¹ Nupanghai kha an fe laiin thân nghâk sipai senkhathai kha khopuia an kîr nôka, thil om lam murdi kha Ochai inlalhai an va hrila.

¹² Ochai inlalhai kha upahai leh an irhmukhôma, sum tamtak an pêkhaia,

¹³ an kuang, “Zâna kin in kârin a irchutirhai an honga, a ruak kha an hong inrûk kêng, tiin insîr roi.

¹⁴ Ramoptu khan kha thurchi kha a lei inhriat le khom thiam nin chang tih insîrpui kin ta, ite nin milung nin inbuaina hrang om ma,” an tia.

¹⁵ Sipaihai khan sum kha an lâka, hê an ibehai lam ang takin an tho ta. Khasikin atûn ten kha thurchi kha Judahai laia an la ihril inlum mai ngai a ni.

Jisua, a irchutirhai kuang a inlârna thu

¹⁶ Khan, irchutir sômhleikhathai kha Galili rama tâng inkhata Jisua’n fe roi a iti pehaina khan an fea.

¹⁷ Ama an hmu’n chu chubai an mûka, senkhatin iamzoi nohai khomsian,

¹⁸ Jisua’n a hong panhaia, anni kha a chongpuihaia, “Irnêng le irvâna irchamneina murdi ki kuang pêk a ni ta.

¹⁹ Khanchu, hmun tina mihai kuang fe unglân, ki irchutirhaiin siam unglân, Pa le Nâipa le Irtha Irthiang irhmingin baptis-hai unglân,

²⁰ Thu nangni ki ipêk murdi hi zôm hrangin irchutirhai roi. Khanchu, keima kumkhua’n, rammual mong dênin, nin kuang om mai ki ti,” a tia.