MATHAIA 26 - PATHIAN LEKHABU IRTHIANG C.L. Bible (BSI)

Jisua that hrang lam an ngaitua

¹ Jisua’n kha thu murdi kha an sîr zoiin chu a irchutirhai kuang,

² “Sûn hni hnunga Ferkân kût a hong iom hrang a nih ti nin inhriat, Mihriam Nâipa hi hembe hrangin ipêk ni a ti,” a tia.

³ Khanchu, Ochai inlaltak Kaiafa ina irhmukhômna an neia,

⁴ inrûkin chela, that hrang lam an ngaituaa.

⁵ Khannisianlân, “Kût sûngin chu ni no ri se, khano’nchu vântâng laia buaina suak likna ti,” an tia.

Bethani-a Jisua sahriak polin a om

⁶ Khan, Jisua chu Bethani-a phâr Simona ina a oma.

⁷ Jisua bu a nêk laiin, nupang inkhat alabastar bûrin sahriak mirimhoi man tamtak hong chôiin, a luah a buak pea.

⁸ Irchutirhaiin an hmu’n chu an ning an mura, “I hranga a inchêk mo?

⁹ Hi mirimhoi hi man tamtaka zuarin, inrianghai kuang pe thei kêng a ini,” an tia.

¹⁰ Jisua’n an itihai kha an hriata; an kuang, “Itho mo hi nupangnu hi nin inbuai? Keima hrangin sin sa le enhoi tak a itho a ni.

¹¹ Inrianghai chu nin laia om mai an nia, khannisianlân, kei chu nin kuang om mai no ning.

¹² Hi sahriak, mirimhoi hi ki takpuma a ibuak hi, ni phûm hranga a ni sinsiam diam kêng a ini.

¹³ Thudik nangni ki hril, rammual pumpuia Thurchi Sa hi an hrilna kipa hi nu sintho khom hi, ama inhriatmaina hrangin insîr sa ngai an ti,” a tia.

Juda’n Jisua incheltir a tum

¹⁴ Kha zoi hnungin chu sômhleihnihai laia inkhat, Juda Iskariota an iti kha, Ochai inlalhai kuang a fea,

¹⁵ “Ama kha nangni incheltir ki ti, imo nin ni ipêk hrang?” a tia. Sum sômthum an tepa, an pêk tâka.

¹⁶ Khataka irthokin chu Juda khan Jisua chu an kuta a bâng theina hrang lam kha a zong mai tâka.

Jisua le a irchutirhai Ferkân kût an fâk

¹⁷ Bai chol koploi kût sûn masa taka khan irchutirhai kha Jisua kuang an honga, “Kho hmuna mo Ferkân kût khalâi ni otna hrang sinsiam inlân ni inuam?” an tia.

¹⁸ Ama khan, “Khopuia tu mo khat kuang va fe unglân, a kuang, ‘Irchutirtu khan ki zoro anâi tâka, ki irchutirhai leh Ferkân kût ni ina hmang kin ti duah, a ti’ va ti roi,” a tia.

¹⁹ Khanchu, Jisua’n thu a ipêk ang dên khan irchutirhai khan an thoa; Ferkân kût khalai kha an sinsiam tâka.

²⁰ Khohloia chu irchutir sômhleihnihai le khalai kha an ot suama.

²¹ Khalai an irhîl lai takin Jisua’n an kuang, “Nangni ki hril, nin laia mi inkhat hin nin cheltir a ti,” a ti pehaia.

²² Khanchu, irchutirhai kha a sân an kamanga, a kuang, “Rengpa kei mo ki ini?” an ti senga.

²³ Jisua’n an kuang, “Khalai ni otpuipu ngêt hin nin cheltir a ti.

²⁴ Mihriam Nâipa hi a thurchi an irziak ang takin a ife hrang a ni; khannisianlân, Mihriam Nâipa incheltir hrangtu chung chu a rik; kha mihriam kha chu irsiang no sian, a ta hrangin sa ual a ti,” a tia.

²⁵ An cheltirpu hrang Juda khan a sâma, “Rabbi, kei mo ki ini?” a tia. Ama khan, “Ni ti khate,” a tia.

Rengpa zânbu

²⁶ Khan, an fâk laiin Jisua’n bai a lâka, lômthu an sîr zoiin a khoia, a irchutirhai kuang a pêka, an kuang, “La unglân, fa roi, hi hi ki taksa a ni,” a tia.

²⁷ Kha hnung chu, khilât a lâka, Pathian kuang lômthu an sîr zoiin chu an kuang a pêka, an kuang, “In roi, nin rêngin;

²⁸ hi hi ki thisen mi tamtak sual ngaidamna hranga suak hrang, Pathian thuthung indetpu kha a ni.

²⁹ Nangni ki hril, ka pa Rama nangni leh uain thar ki in nî a tung mâka chu hi uain hi in nôk ta no ning,” a tia.

³⁰ Kha zoiin chu hla inkhat an saka, an sak zoiin chu Oliv tâng tiang an fe ta.

Jisua’n, Petera’n a iphil hrang thu a lei insîr

³¹ Khanchu, Jisua’n an kuang, “A vuan zân ngêt hin nin rêngin laizâm tho nin ta, ni masan zit nin ti, ‘Belrapu chu zêm ki ta, belrahai chu indarh zit an ti,’ ti irziak a ni kha.

³² Khannisianlân, kaithoia ki om hnungin Galili rama hong masa ki ta,” a tia.

³³ Petera khan, “An rêngin nang an irheisan zit khomin keima’n chu nang irheisan viat no ning,” tiin a sâma.

³⁴ Jisua’n a kuang, “Thudik nang ki hril, âr a khuang mân a vuan zân hin voi thum ni phil ni ti,” a tia.

³⁵ Petera’n a kuang, “Ni kuang thi a chuk khomin nang phil viat no ning,” a tia. Khaang dênin irchutir murdi khan an ti chita.

Gethsemani irhuana Jisua chongchaina

³⁶ Kha zoia chu, Jisua chu annihai leh hmun inkhat Gethsemani an itia khan an fea, a irchutirhai kuang khan, “So son ki va chongchai sûngin hi hin lei toi roi,” a tia.

³⁷ Petera le Zebedaia nâihai inhni kha a hruaia, irtha’nvâiin a kamang tak taka.

³⁸ An kuang, “Ki’rtha an vâi tak tak, thipui hrang ang dôr a ni. Hi hin om unglân, ni lei hrungpui sa roi,” a tia.

³⁹ Maton tiang a va fe viata, irnênga inbokin a chongchaia, “O ka Pa, thei a niin chu, hi khilât hin ni lôi hrâm sian, khannisianlân, keima ircham ni loiin nangma ircham cham ni ri se,” a tia.

⁴⁰ Kha hnung chu a hong kîr nôka, irchutir inthumhai kha a inin a hong hmuhaia, Petera kuang, “Itin mo nangni inthum hi te dârkâr khat lua nin ni ihrungpui viat thei loi?

⁴¹ Inthêmnaa nin lût nona hrangin irtûng chianin chongchai roi, Irtha’n chu a nuama, taksa’n a iphari loi a ni,” a tia.

⁴² A va fe nôka, a chongchaia, “Ka Pa, hi tuangna khilât hi ki in noa, khâipai thei a ni no’n chu, nangma ircham ni ri se,” a tia.

⁴³ A hong nôkin chu a irchutirhai kha a in ngêtin a hong hmuhaia; a sân an inmu a suak sikin.

⁴⁴ A mâkhai nôka, a voi thumna’n a iti ngai dên kha ti nôkin a chongchai nôka.

⁴⁵ Kha zoia chu a irchutirhai kuang a honga, an kuang, “Atûn ten inmusu’n nin la irngam chian mo? Irngai u ta, a zoro chu a hong tung ta. Mihriam Nâipa hi mi sualhai kuta an incheltir hrang a ni ta.

⁴⁶ Thoi unglân fe ta ei ti, en u ta, a nin chel hrangtu hi a hong nâi ta,” a tia.

Jisua an chel

⁴⁷ A la chong lai takin irchutir sômhleihnihai laia Juda kha a hong tunga, ama pâla khan Ochai inlalhai le Dân irchutirtuhai le vântâng ulian itîr tamtakhai, khandai le hêmvuak chôiin an hong tung tâka.

⁴⁸ An cheltir hrangtu khan irsinsiana hrang a lei hril diam tâka; “A biang ki itum tak kha ama ni a ti; chel zôi roi!” tiin.

⁴⁹ Juda kha Jisua kuang a theng thaia, a kuang, “Irchutirtu, ni chunga irtharngamna om ri se,” tiin a biang a tuma.

⁵⁰ Jisua’n a kuang, “Mala, ni itho hrang chu tho lat roh,” a tia. Khanchu, an honga, Jisua chu an chel tâka.

⁵¹ Jisua kuanga omhai laia inkhatin a khandai a phôia, Ochai inlaltak siahlo mikuar kha a sât thâkpai pea.

⁵² Jisua’n a kuang, “Ni khandai kha a siana hmuna se nôk ta roh. Khandai inlekhai chu khandai ngêta thi an ti.

⁵³ Vântîrtôn sângruk le hmun sômhleihni nêka tam ni zuang tîr pe zôi hrangin ka Pa ki ingên thei loi mo nin ni isôn ma ni?

⁵⁴ Khannisian, ngên ta inlân Pathian lekha thu kha itin mo a hong itung thei hrang?” a tia.

⁵⁵ Khanchu, Jisua’n mipuihai kuang khan, “Khandai le hêmvuak chôiin inru chel hrang anga ni chel hrangin nin ihong mo? Tempila a nitin mi ki’rchutir ngaia, ni chel mak chêia.

⁵⁶ Khannisianlân, deipu lekha thuhai kha a hong tung theina hrangin hihai murdi hi a hong iom a ni,” a tia. Khannisianlân, a irchutirhaiin ama kha an mâksana, an rot zit tâka.

Jisua roirêltuhai makunga a ngîrna thu

⁵⁷ A cheltuhai khan Jisua kha Ochai inlaltak Kaiafa ina Dân irchutirtuhai le upahai lei irbuk khômnaa khan an hruaia.

⁵⁸ Petera khan hla vit ata Ochai inlaltak in tual dênin a zuia. In tual sûnga a lûta, an roirêl mongna ten hmu tumin siahlohai laia a toi saa.

⁵⁹ Ochai inlalhai le Dân irchutirtuhai le Sanhedrin mi murdihai khan Jisua an that theina hrangin milakin hnôlna an zong, an zonga.

⁶⁰ Khannisianlân, hmu mahai, mi tamtak hongin a chungthua milak hril khomhai sian a hnungkhôn taka mi inhni an honga,

⁶¹ “Hi mi hi Tempil insiata, ‘Sûn thum sûngin sin zoi nôk thei ki ti,’ a ti,” an tia.

⁶² Khanchu, Ochai inlaltak kha a ngîr suaka, a kuang, “Hihai nang isêlna hi ni isâm thei loi mo? Nang an isêlna hi itin mo?” a tia.

⁶³ Jisua kha a dâihreka, Ochai inlaltak khan, “Pathian hring irhmingin nang ki ti; Krista, Pathian Nâipa chu ni ni lele mo ni hril roh,” a tia.

⁶⁴ Jisua’n a kuang, “Ni ni ti mai tâk khate. Khannisianlân nangni ki hril: nakana chu, atûn ata Mihriam Nâipa hi Itinrêngthothei chang tianga toia, irvân sûm chunga zuang la hmu nin ti,” a tia.

⁶⁵ Khanchu, Ochai inlaltak khan a puansilhai an pot thêra, “Pathian a hril insiat tah ti inhriatpuitu dang nang ta mah, Pathian a hril insiatzia chu nin inhriat ta!

⁶⁶ Itin mo nin insâp?” a tia. Anni khan, “Thi hrangin a ruk,” an tia.

⁶⁷ Khanchu, a hmâia an inchila, an zêma; senkhatin,

⁶⁸ “Nin hril roh. Krista! tu mo nang a zêm!” tiin an inbêna.

Petera’n Jisua a phil thu

⁶⁹ Khan, Petera kha irhuan sûng, kholaia a toia, khan dôngmate inkhat a kuang a honga, “Nang khom Jisua Galili rama mi kuang ni om ngai,” a ti pea.

⁷⁰ Khannisianlân, an rênga makunga a phila. “I thurchi mo ni insîr inhre ma ung,” tiin a sâma,

⁷¹ irhuan dâi mikot pên tiang a va suaka, dôngmate dangin a lei hmu nôka, khataka omhai kuanga khan, “Hi mi hi Nazaret Jisua kuanga om ngai kha a ni duah,” a tia.

⁷² “Kha mihriam kha inhre ma ung,” tiin Petera khan khomâk irsâmin a phil nôka.

⁷³ Chomkhat hnunga chu khataka ngîrhai khan Petera kha, “Nang khom hi an laia mi ngêt ni nih ti ni chong lama hin kin inhriat thei,” an hong tia.

⁷⁴ Ama khan, khosâl irhuamin khomâk ar sâma, “Kha mihriam kha inhre ma ung,” a tia.

⁷⁵ Âr a khuang zôi tâka, “Âr a khuang mân nangin voi thum ni phil ni ti,” tia Jisua’n a iti kha Petera khan an hriat suaka, khanchu a suaka a chap ngûi ngûi tâka.