MATHAIA 23 - PATHIAN LEKHABU IRTHIANG C.L. Bible (BSI)

Jisua’n Dân irchutirtuhai le Farisaihai kuang ata irdîn hranga a hrilna

¹ Khan, Jisua’n mipui le a irchutirhai kuang thu an sîra,

² “Dan irchutirtuhai le Farisaihai hi Mosia Dânhai hrilfia hranga phal an ni.

³ Khasikin tho hranga nangni an ibe murdi chu nin zômin, nin izui hrang a ni; Khannisian, an om dân chu zui no roi, an insîrhai hi an hmang ngai no sikin.

⁴ Puakrik pêl intak takhai an siama, mihai chunga an bâng ngaia, khan kha mihai sanna hrangin an kutpârhai lua hmang nuam ngai mahai.

⁵ An sintho murdi kha mihai hmu hrangin kêng an itho ngai; an bân khit le michal khitnaa Pathian chong irziakhai hi en u ta, an inhrol vang na! An songkol irfual irvonahai khom hi en u ta, an sei vang na!

⁶ Hruaithena hmuna toina satakhai, Sinagoka toina langsârhai, dukana chubai irmûk hai,

⁷ mihaiin ‘Rabbi’ an itihai an irngaisâng ngai.

⁸ “Nangni chu ‘Rabbi’ tia koi ni viat no chin ni; urêng khat inzen nin nia, irchutirtu inkhat vai nin nei sikin.

⁹ Irnêng chunga hin tûte ‘Ka pa,’ ti no roi, pa inkhat vai irvâna nin nei sikin.

¹⁰ ‘Hruaitu,’ ti khomin irkoi no roi. Mesia vai hin nin hruaitu a ni sikin.

¹¹ Nin laia a roiinpui tak chu nin sinthopu a ini hrang a ni.

¹² Tukhom irngaiinhlu ka chu irhniam an ta, irngaiintôm ka chu chôiindôm ni an ti.

An vârirletna Jisua’n a dem

¹³ “Nangni Dân irchutirtu le Farisai vârirlethaio, nin chung a rik! vân Ram lampui kha mihai nin khâr pehai ngaia; nangni lak lût mak chêia, a lût hranghai khom an ilût lak phal mak chêi.

¹⁴ Nangni Dân irchutirtu le Farisai vârirlethai, nin chung a rik! Meithâi sum nin fâka, mi huangna’n sôt tak tak nin chongchai ngai, khasika khan nin dûk tong lûminna ual a ti.

¹⁵ Nangni Dân irchutirtuhai le Farisaihaio, nin chung a rik e! mi inkhat irlet hrangin tuikhanglian le ram phêk pumpui nin irfang ngaia, khan, a hong irletin chu kha mi kha nangni nêka a bâk inhni’n hrem hmuna fe hrangin nin siam ngai,

¹⁶ ‘Nangni hruaitu mitcho, tukhom Tempil sâlin mi’n khomâksâm sianlân, ite ni mah, Tempil rângachak sâla khomâksâm chu a isua hrang a ni,’ tituhaio, nin chung a rik e!

¹⁷ Nangni, mi invêt mitchohaio, i hi mo a roiinpui ual, rângachak mo rângachak irthiang infâitu Tempil kha mo?

¹⁸ Mi’n maichâm sâlin khomâksâm sianlân, ite ni mah, khataka thilpêk sâla khomâksâm chu a isua hrang a ni nin ti saa.

¹⁹ Nangni mitchohaio, i hi mo a roiinpui ual, thilpêk mo thilpêk infâitu maichâm kha mo?

²⁰ Khasikin, maichâm sâla khomâksâm chu maichâm le a chunga om murdi sâla khomâksâm a ni.

²¹ Tempil sâla khomâksâm chu Tempil le a luatu sâla khomâksâm a ni.

²² Irvân sâla khomâksâm chu Pathian toihmun le a chunga toi sâla khomâksâm a ni.

²³ “Nangni Dân irchutirtuhai le Farisai vârirlethaio, nin chung a rik! A zoro taka vâng ngai, podina hai, lêngmiser hai, kumhoi hai sôma inkhat nin pêk ngaia, Dân thua poimo ual, dikna hai, lungkhamna hai; iamomna hai nin ngainêp ngai, khannisian, khahai kha kêng nin itho rua tak chu a ni, a danghai khi ma ual loiin.

²⁴ Hruaitu mitchohaio! Nin tui ina thoivâi irthît infâia, saringsei chu nin invol ngai.

²⁵ “Nangni Dân irchutirtuhai le Farisai vârirlethai! nin chung a rik: Nin khilât le khêng pên tiang nin infâia; a sûng tiang chu hlêprûkna le insumloina’n a sip a ni.

²⁶ Farisai mitchohai! khilât sûng tiang chu infâi bak unglân, a pên tiang khom fâi sa a ti.

²⁷ “Nangni Dân irchutirtuhai le Farisai vârirlethai! Thân lung nâl invâra, pên tianga sataka inlang, khannisian a sûng tiang chu mithi ruhai le ruak porinchena tinrênga sip ang kha nin ni.

²⁸ Khaangin mi tin mithmua pên tiang chu a sa angin nin inlanga, khannisian, nin sûng tiang chu vârirletna le sualnaa sip nin ni.

Jisua’n hrem an ini hrang thu an sîr

²⁹ “Nangni Dân irchutirtuhai le Farisai vârirlethai! nin chung a rik e! Deipuhai thân nin sina, mi felhai inhriatmaina lunghai nin irvo ngaia;

³⁰ ei irchibulhai om laia khan lei om tâk khom inlân, Deipuhai thisen an insuakna khan chu kop no ih, nin ti ngai.

³¹ Khasikin deipuhai lei thattuhai irchia mi nin nih ti nin inlang chak a ni,

³² Fe unglân, nin irchibulhaiin an lei iphut kha irzoitir roi.

³³ Nangni mirûlhai le mirûl irchihaio! Hremhmun fe hranga rêlinchukna irthokin itin mo zôk thei hrangin nin irtûng?

³⁴ Khasikin nangni ki hril, nin kuang deipuhai, mi vârhai, Dân irchutirhai hong tîr ki ti; senkhat that nin ta, hembe nin ti; senkhat Sinagoka zêm nin ti, kho tina inhnot irzûl thiai nin ti.

³⁵ Khanchu, Abela, mi fel tak thisen nin insua ata, hmun irthiang le maichâm kâra Barakia nâipa Zakaria thisen nin insua dên khan, irnêng chunga mi fel thisen suak murdi moh chu nangnihai chunga chum a ti.

³⁶ Thudik nangni ki hril, khahai murdi kha atûnlai mihai chunga a itung hrang a ni.

Jisua’n Jerusalem lung a thungzia

³⁷ “O Jerusalem, Jerusalem! Deipuhai thattu, Pathianin ni kuanga itîra omhai lei dêng thattu! Ârpuinu’n a têhai a mitha hnuaia a iop khôm angin ni nâihai voi iza mo op khôm ki tuma, nuam mak che?

³⁸ Irngai u ta, nin Tempil kha marakin, a korongin om ta a ti.

³⁹ Nangni ki hril, Rengpa irhminga hong chu Pathianin satvur ri se, nin ti mâka chu atûna irthokin ni hmu ta no chin ni,” a tia.