MATHAIA 22 - PATHIAN LEKHABU IRTHIANG C.L. Bible (BSI)

Irneina hruaithe chongirkhek

¹ Mipuihai kuang chongirkhekin Jisua’n thu an sîr nôka,

² “Irvân Ram chu rêng inkhat a nâipa ta hranga irneina hruaithe leh khan irkhek thei a ni.

³ Hruaithe hranga a ifialhai kha koi buk hrangin a siahlohai a tîra, khannisian hong nuam mahaia.

⁴ Khan, siahlo danghai a tîr nôka, ‘Ki ifialhai kuang khan, irngai u ta, hruai chu ki’rsiam diam tâka, ki sehrât chalhai le sa ki ivâihai ki thata, itinrêng irsiam diam a ni tâka, hruaithe fâk hrangin hong ta roi ti roi,’ a tia.

⁵ Khannisianlân, lei ngaisak mahaia, an sintum chit an sina, inkhat chu loia a fea, inkhat chu dukana a fea,

⁶ mi danghaiin siahlohai kha an chela, an zêma, an thata.

⁷ Reng kha a sân a ning an mura, khasikin a sipaihai a tîra, kha mi thathai kha an thata, an khua khom an hâl pehai tâka.

⁸ Khanchu a siahlohai a koia, an kuang ‘Irneina hruai kha siam zoi a ni ta, khannisianlân, ki mi fialhai kha fâkrua ni mahai.

⁹ Atûn chu lamliana fe unglân, mi nin ihmu murdi hruaithe fa hrangin hong koihai roi,’ a tia.

¹⁰ Khanchu siahlohai kha lamliana an fea, mi an ihmu murdi, mi sa le mi sia, an hong koi bûmhaia, irneina in kha mipuiin an sip ta.

¹¹ “Khan, rêng kha khual mihai en hrangin a va lûta, irneina puan sil loi mi inkhat a va hmua.

¹² Reng khan a kuang, ‘Mala, irneina puan sil loiin itina mo hin ni ihong lût lam?’ tiin ar dona. Khannisianlân, kha mi kha a dâihreka.

¹³ Khanchu, rêng khan, a siahlo kuang, ‘A kut le a ke khit unglân, pên tiang inthima pai suak roi. Kha khan chap le irkamnôi om a ti,’ ” a tia.

¹⁴ Khan, Jisua’n, “Fialhai chu tamtak an nia, khannisianlân, inthanghai chu tômte an ni,” a tia.

Kaisara kuanga khâzana chôi

¹⁵ Khan, Farisaihai kha an suaka, Jisua kha a thu’nsîr rengata an chel theina hrangin an van sîr irhlôma,

¹⁶ Khan, an irchutir senkhathai le Heroda pâla mi senkhathai a kuang an tîra, kha mihai khan, “Irchutirtu, thutak nin sîr ngai ti kin inhriat tukhom uksak ual ngai mak chea, tukhom theibîk loiin mihriam ta hranga Pathian lungdo thutak kha nir chutir ngai.

¹⁷ Khante, itin mo nir ngai, ni hril ta? Kaisara kuanga khâzana chôi mo a’rthiang, irthiang ma mo?” an tia.

¹⁸ Khannisianlân, Jisua’n an lunginchong kha an hriat chiana, an kuang “Vârirlethai! Itho mo ki chong nin ôktir nin itum?

¹⁹ Khâzana chôi hranga sum kha nin entir u ta,” a tia. Khanchu, sum kha a kuang an hong chôia,

²⁰ anni kha ar donhaia, “Tu illim le tu irhming mo a chuang?” a tia.

²¹ Anni khan, “Kaisara,” tiin an sâma. Khanchu, Jisua’n an kuang, “Kaisara ta chu Kaisara pe unglân, Pathian ta chu Pathian pe roi,” a ti pehaia.

²² Kha thu kha an inhriatin chu ar khêl an ti tak taka, an mâka, an rot pat ta.

Thoinôkna thu an irdonna

²³ Kha nî sûn ngeia khan, thoinôkna om mah ti pâl Sadukai senkhathai Jisua kuang an honga.

²⁴ A kuang, “Irchutirtu, Mosia’n, ‘Mi nâi nei loiin a dôngma thisan sianlân, a sangpa khan meithâi kha lua nôkin a upa ta hrangin irchi a inei pe hrang a ni,’ a tia.

²⁵ Khan, kin laia urêng sari an lei oma; a ulian takin dôngma a neia, irchi nei loiin a thia, khasikin a dôngma kha a sangpa kuang a mâk tâka.

²⁶ A sangpa a inhnina chunga khom, khaang dênin a oma, inthumna chunga khom, a sarina dênin, an lua senga.

²⁷ A hnungkhôn taka chu nupangnu khom a thi sa tâka.

²⁸ Khan, thoinôk tika teh tu dôngma tak mo a ini hrang tâk? An rêng lakin an lua senga,” an tia.

²⁹ Jisua’n an kuang, “Nin irngai insual bâka! Asan chu Pathian thu le Pathian irtha nin inhriat no sika a ni.

³⁰ Mithihai an thoinôk tika chu irvâna vântîrtônhai angin om ta an ti, dôngma pasal irnei ta no nihai.

³¹ Khan, mithihai thoinôk thuhai Pathianin nangni a insîr pe kha nin la itep ngai loi ma ni?

³² ‘Keima Abrahama Pathian, Isaka Pathian Jakoba Pathian,’ ki ni a tia, Pathian chu ihringhai Pathian kêng a ini; mithihai Pathian ni ma,” tiin a sâma.

³³ Mipuihaiin an inhriatin a irchutirna kha ar khêl an ti tak taka.

Thupêk roiinpui tak

³⁴ Jisua’n Sadukaihai kha a sêl indonghai ti Farisaihaiin an inhriatin chu, an irhmukhôma,

³⁵ an laia mi inkhat, Dân irchutirtu khan ama fiana hrangin,

³⁶ “Irchutirtu, dâna hin i thupêk tak hi mo a roiinpui tak?” tiin a’rdona.

³⁷ Jisua’n a kuang, “ ‘Rengpa ni Pathian chu ni lungrîl murdi’n, nir tha murdi’n, ni lunginchongna murdi’n lungthung roh!’ ti hi,

³⁸ Hi hi thupêk roiinpui le poimo tak a ni.

³⁹ Thupêk poimo inhnina a irangpui chu ‘Nangma lung ni irthung angin ni bômhai lungthung ro, ti hi,’ tiin a sâma.

⁴⁰ Mosia Dân pumpui le deipuhai irchutirna murdi khom hi thupêk inhni hin a ihuap zit a ni,” a tia.

Mesia chungchânga irdon infelna

⁴¹ Farisai senkhathai an irchun laiin Jisua’n an kuang,

⁴² “Mesia hi itin mo nin irngai? Tu nâipa ma ni?” tiin ar donhaia. Anni khan, “Davida nâipa a ni,” tiin an sâma.

⁴³ Jisua’n an kuang, “Khan, itho mo Davida kha Irtha’n Rengpa tia a ikoi?

⁴⁴ Rengpa khan ki Rengpa kuang, ‘Ki chang tiang toi roh, ni râlhai ki ke hnuaia ki sia zoi mâka chu,’ a iti a ni.

⁴⁵ “Davida’n, ‘Rengpa,’ tiin a koiin teh, itin mo Mesia kha Davida nâipa a ini thei hrang?” a tia.

⁴⁶ Khanchu, tûte’n Jisua kha sâm thei mahaia, kha nia irthokin chu tûte’n ite irdon ngam ta mahai.