MATHAIA 21 - PATHIAN LEKHABU IRTHIANG C.L. Bible (BSI)

Jisua roiinpui taka Jerusalem a lûtna thu

¹ Khan, Jisua le a irchutirhai Jerusalem an tung tôn, Oliv tâng Bethfage khuaa an hong tunga. Kha khan Jisua’n a irchutirhai laia mi inhni a tîrhaia,

² an kuang, “Nin matona khuaa son fe unglân, sakuartung, a kôla a tê leh irthung hmu zôi nin ti. Sût unglân ki kuang hong kai roi.

³ Tukhomin nin kuang i khom lei tihai sian, ‘Rengpa’n a innang kêng,’ ti unglân; khanchu, nangni inhongtir zôi a ti,” a tia.

⁴ Deipu hmanga a insîr kha a hong tung theina hrangin khahai kha a hong iom a ni.

⁵ “Zion nâinu kha hril roh, En ta, ni rêng chu ni kuang a hong e, Sakuartung te chung ngeia,” ti thu hi.

⁶ Khanchu, irchutirhai kha an va fea, Jisua’n thu a ipêkhai ang takin an thoa.

⁷ Sakuartung le a tê kha an hong kaia, an chunga an puanhai an dâpa, Jisua kha a chuang ta.

⁸ Mipui laia a tam ualin chu lampuia an puanhai an dâpa, senkhatin sôlhna an sâta, lampuia khan an dâp thiai saa.

⁹ Mipui Jisua maton tianga fehai le a hnung tianga zuihai khan, “Davida Nâipa kuang, Hosana! Rengpa irhminga hong chu inpâkin om ri se. An chung taka khin Hosana!” tiin an khêka.

¹⁰ Jisua kha Jerusalema a lûtin chu, a kho pumpuiin, “Hi mi hi tu ma ni?” tiin an châng soia.

¹¹ Mipuihai khan, “Hi mi hi deipu Jisua, Galili rama Nazaret khuaa mi a ni,” an tia.

Tempil irthiangtir

¹² Jisua kha Tempila a va lûta, kha khan thil zuartuhai le irchôkpuhai kha an hnot suakhai zita. Sum thûltuhai maichâm le phervali zuartuhai toihmunhai khom a nam inrîl pehaia,

¹³ an kuang, “Pathian Thubua, Pathianin, ‘Ki in chu chongchaina in ti an ti,’ ti irziak a ni. Khannisian, nangni’n chu nakhrâtsonghai khura kêng nin isiam a ni hi,” a tia.

¹⁴ Tempila khan mitchohai le ke’nbâihai a kuang an honga, a lei indamhaia.

¹⁵ Ochai inlalhai le Dân irchutirtuhaiin sinirkhêl a isinhai le Tempila, ‘Davida Nâipa kuang Hosana,’ tia nâipang khêkhai kha an hmu’n chu a sân an ning an mura, “Hihai thu’nsîr hi nin hriat mo?” an tia.

¹⁶ Jisua’n an kuang, “Kin hriat e, ‘Nâitesenhai le irhnu nêk laihai bâia khan, inpâkna a famirkip’ ti hi nin itep ngai loi mo?” a tia.

¹⁷ Anni kha a rotsanhaia, khopui ata a suaka, Bethani-a a fea, kha khan a riak tâka.

Jisua’n theipui kung khua a sâlna

¹⁸ Khan, zînga khopui tiang a pan nôk laiin Jisua phîng a hong châm tâka.

¹⁹ Lam sîra theipui kung a hmua, a va pana, khannisianlân, a hnâ ti no chu ite hmu maka. Khasikin Jisua’n theipui kung kha, “Kumkhua’n ra ngai ta no ro!” a ti pea, voikhat rengin theipui kung kha a hong thêm ta.

²⁰ Irchutirhaiin ama kha an hmua, an irngai ar khêl ok tâka, “Itina mo theipui kung hi a ithêm zôi tâk?” tiin an irdona.

²¹ Jisua’n an kuang, “Thudik nangni ki hril, lunghlâna nei viat loiin iamna nin neiin chu hi theipui kung chunga ki itho ang hin tho thei nin ti. Kha vai kha ni loiin hi tâng kuang khom, ‘Irthonin lân, tuikhangliana zu irpai roh’ ti unglân zu irpai a ti.

²² Nin iamin chu chongchaia nin inghi murdi chu hmu nin ti”, tiin a sâma.

Jisua irchamneina an irdonna thu

²³ Tempila a lûta, ar chuhai laiin Ochai inlalhai le vântâng upahai kha a kuang an hong kâia, “I irchamneina’n mo hi sinhai hi ni itho? Tu’n mo ircham nang a ipêk?” an tia.

²⁴ Jisua’n a sâma, “Kei khomin nangni irdon ki ti, kha kha nin ni don theiin chu, kei khomin tu irchamin mo ki itho nangni hril ki ti.

²⁵ Johana baptisma kha kho rengata irchamneina mani, Pathian ata mo, mihriam a ta?” a tia. An bingin an irsêla, “Imo ei iti hrang tâk? ‘Pathian ata ei ti le, itho mo Johana kha nin iiam loi?’ ni ti a ta.

²⁶ Mihriam ata ei ti lakin mipuihai hi ichi an oma, Johana kha Deipu’n an bê sikin,” an tia.

²⁷ Khasikin Jisua kuang, “Inhre ma ung,” tiin an sâma. Jisua’n an kuang, “Kei khomin tu irchamin mo hihai hi ki isin, nangni hril bîk no ning,” a tia.

Nâipa inhni chongirkhek

²⁸ Atûn hin nangni’n itin mo nin irngai? “Tiana khan mi inkhatin nâi inhni a neia. A nâi ulian kuang a va fea, a kuang ‘Ki nâi a vuan chu grep irhuana fe’n lân, va sin ro,’ a tia.

²⁹ Ama khan, ‘Nuam ma ung!’ a tia, Khannisianlân, inhnunga chu a ngaituana a thûla, a fe nôk ta.

³⁰ Khanchu inkhatpu kuang khom a fea, khaang dênin a va ti nôka. Ama khan, ‘O ka pa, fe ki ti,’ a tia, khannisianlân, fe maka.

³¹ Kha nâi inhnihai khan a tu khan mo an pa nuamlam an sin uala?” a tia. Anni khan a kuang, “A ulian ualpu khan,” tiin an sâma. Jisua’n an kuang, “Nangni ki hril: khâzana irfuangtuhai le notizuarhaiin Pathian Ram lût nangni an ikhêl tâk kêng.

³² Baptistu Johana khan lampui dik nin izui hrang nangni irhmu a zuanga, lei iam mak chêia; khâzana irfuangtuhai le notizuarhaiin chu an lei iam a ni. Nangni chu nin hmu hnung khomin nin ngaituana thûlin ama iam mak chêi,” a tia.

Grep irhuan chongirkhek

³³ Jisua’n an kuang, “Chongirkhek dang irngai nôk roi: voi khat chu mi tu mani ram chongpu a oma, kha mi khan grep irhuan a thoa, dâiin ar kula, grep sôrna hrang khur a choia, a nghâkna hrangin in irsâng a sina. Khanchu, grep kha a nghâk hranghai kuta bângin, ram danga an zin ta.

³⁴ Grep ra irhmal zoro a hong tungin chu, a nghâktuhai kuang khan dongtum va la hrangin a suakhai a tîra.

³⁵ Irhuan nghâkhai khan an suakhai kha an lei chela, inkhat an zêma, inkhat an thata, inkhat lungin an dênga.

³⁶ Khan, suak danghai matona nêka tam ualin a tîr nôka; matonahai ang dênin an lei tho nôka.

³⁷ A hnungkhôn taka chu, ‘Ki nâipa hi chu lei ngîk ngêt an ti,’ tiin a nâipa a tîr tâka.

³⁸ Khannisianlân, irhuan nghâkhai khan a nâipa kha an lei hmu’n chu ‘Hi mi hi a chongpu nâipa a ni; Tho that ei ta, ar chon hi lei lua pe rei!’ an tia.

³⁹ Khanchu, an chela, grep irhuan pên tiang an kêlsuaa, an that ta.

⁴⁰ Khan, grep irhuan chongpupa a hong tikin, kha irhuan nghâkhai kha imo lohai ni?” tiin Jisua’n a’rdonhaia.

⁴¹ Anni khan a kuang, “Kha mi suakhai kha that a ta, grep irhuan kha a nghâkpu dang, a ra irhmal zoroa, a zoro taka a dongtum a pe ngai hrangtu kuang pe a ti,” an tia.

⁴² Jisua’n an kuang, Pathian lekha thu’n, ‘In sintuhaiin lung an ipai, hmang hmunboia an ibe kha, A kila lung poimo tak a hong chang ta. Ama kha Rengpa itho a ni; Ei mit hmua hin a irkhêl a ni!’ a iti hi nin itep ngai loi ma ni?

⁴³ Khasikin nangni ki hril, “Pathian Ram hi nin kuang ata lapai ni a ta, ra insua hrang namhai kuang ipêk ni a ti.

⁴⁴ Tukhom kha lung chunga tûk ka chu irnôi an ta, a idel len vâng chu irnôi indi chit an ti,” a tia.

⁴⁵ Ochai inlalhai le Farisaihaiin Jisua chongirkhek insîrhai kha an inhriatin, anni chungthu a insîr a nih ti an inhriat tâka.

⁴⁶ Khasikin ama chel an tuma, khannisianlân, mipuihai kha an chia, mipuihaiin Jisua kha deipu an bê sikin.