MATHAIA 2 - PATHIAN LEKHABU IRTHIANG C.L. Bible (BSI)

Nisua tianga mi vârhai

¹ Heroda inlal laia, Judai rama Bethlehem khuaa Jisua a zuang suakin, irngai ta, nisua tianga mi vârhai Jerusalema an zuanga

² “Khôn mo Judahai rêng hranga nâi zuang suak kha? Nisua tianga a ârsi kin hmua, ama, chubai mûk hrangin kin ihong a ni,” an tia.

³ Kha thu kha rêng Heroda’n an hriatin chu a sân a char a dong tâka, Jerusalema mi murdihai khom an char a donga.

⁴ Khanchu, Ochai inlalhai le Dân irchutirtuhai murdi chu a koi bûmhaia, an kuang, “Kho hmuna mo Mesia a isuak hrang?” tiin ar donhaia.

⁵ Anni khan, “Judai ram Bethlehem khuaa suak hrang a ni,” an tia. Hiang hin Deipu’n a lei irziak kha:

⁶ “Nang, Bethlehem, Judai rama om, Judai ram khopui laia hin chîn ual hliak mak che, Ni sûng ata optu a zuang isuak hrang a ni, ki mi Israelhai hruaitu hrang chu iti hi,” tiin an sâma.

⁷ Khanchu, Heroda’n mi vârhai kha inrûkin a koihaia, ârsi inlang lai zoro kha fel takin ar donhaia.

⁸ Bethlehem-a khan an fetirhaia, “Fe ta unglân, nâite thu kha fel takin irdon infel unglân; kei khomin ama kha chubai ki hong mûk sa theina hrangin, nin hmu tikin ni hong inhril nôk roi,” a tia.

⁹ Reng thu kha an inhriata, an fe tâka, nisua tianga a ârsi an ihmu ngêt kha nâite omna chung irdîna a tunga, a’rngam mâka chu an maton tiang a hruaihai maia.

¹⁰ Ârsi kha an hmu’n an râi a fân tak taka.

¹¹ In sûng an va lûtin chu a nu Mari kôla nâite kha an hmua, khûksadelin chubai an mûka; an irchon kokhai an inhonga, thilpêk rângachak, bero, mura hai an pêka.

¹² Heroda kuang kîr nôk loi hrangin an irmanga hril an ni sikin, an ram panin lam dang tiang an kîr nôk tâka.

Aigupta rama an rot thu

¹³ An kîr hnungin, irngai ta, Rengpa vântirtôn inkhat Josefa kuang irmangin an lâra, “Thoiin lân, nâite le a nu hruaiin lân, Aigupta rama rot ta ro; nang ki hril nôk mâka chu kha khan om mai ro, Heroda’n nâite hi thatpai tumin a izong hrang a ni,” a tia.

¹⁴ Khanchu, a thoia, nâite le a nu chu a hruaia, a zân zânin Aigupta rama an fe ta.

¹⁵ Heroda thi mân chu kha khan an om tâka. Rengpa deipu hmanga, “Ki Nâipa kha Aigupta ram ata ki koi suak,” tia a insîr kha a hong tung ta a ni.

Nâitehai ithata an om thu

¹⁶ Khan, mi vârhaiin an ihuang a nih ti Heroda’n an hriatin chu, a sân a ning an mur tâka, a zoro thu an irdona an ihril ang khan Bethlehem le a kôlvêl murdia nâipang kum hni hnuai tianga chu an thattirhai zita.

¹⁷ Deipu Jeremia’n:

¹⁸ “Rama khuaa khêk irhâi an inhriat, lusûn le chap ngûi ngûi irhâi chu; Rakili’n a nâihai a châa, an om ta no sikin ar tha irngam thei ta maka,” tia insîr kha a hong tung ta a ni.

Aigupta ram ata an hong kîr thu

¹⁹ Heroda a thi zoiin, Aigupta rama khan Josefa’n a’rmangin Rengpa Vântirtôn a hmua,

²⁰ “Thoiin lân, nâite le a nu hruaiin lân Israel rama kîr ta ro; nâite that tumtuhai kha an thi zoi ta,” a tia.

²¹ Khanchu, a thoia nâite le a nu kha a hruaia Israel ram chu a pan tâka.

²² Khannisianlân, Arkelausa chu a pa Heroda irthûlin Judai rama an lal ti an hriatin chu khataka fe kha a chia, a’rmanga inhriattir a ini angin Galili ram tiang a fe tâka.

²³ Khua inkhat, Nazaret an itia khan a va oma, “Ama kha, ‘Nazaret mi’ ti an tih,” tia deipuhai lei insîr kha a hong itung ta a ni.