MATHAIA 19 - PATHIAN LEKHABU IRTHIANG C.L. Bible (BSI)

Irmâkna chungchânga irchutirna

¹ Jisua’n kha thu kha an sîr zoiin chu Galili ram ata a suaka, Jordan râla Judai rama a fe tâka.

² Mipui tamtakin an zuia, kha hmuna khan mi tamtak a lei indamhaia.

³ Farisai senkhathai a kuang an honga, ama fiana hrangin, “I ang khomin mi’n a dôngma a imâk hi a’rthiang mo?” an tia.

⁴ Khan ama’n, “A phut ata hi thu hi tep ngai mak chêi mo? a phut ata siamtu khan nupang le pasal a siama,

⁵ ‘Khasika khan pasalin a nu le a pa masan a ta, a dôngma thop a ti, khanchu an inhni khan taksa pumkhat hong ni ta an ti,’ a iti a ni.

⁶ Khasikin mi inhni ni ta mahaia, pumkhat an hong ni ta. Pathianin a izom tâk chu mihriamin a isen viat hrang ni mah,” tiin a sâma.

⁷ Farisaihai khan a kuang, “Khante, ithoa mo Mosia’n irmâkna lekha pêkin mâk thei thu a ipêk?” an tia.

⁸ Jisua’n an kuang, “Mosia’n nin dôngmahai mâk nangni a iphalna chu nin milung ngar sika a ni, Khannisian, a phuta chu khaang khan ni mah.

⁹ Keima’n chu nangni ki hril, tukhom uire sika ni loia a dôngma mâka, mi dang neitu chu a uire a ni,” a tia.

¹⁰ Irchutirhai khan a kuang, “Khaang khan ompui sangram chungchânga pasal ngîrhmun a niin chu, irnei hi sa mah,” an tia.

¹¹ Jisua’n an kuang, “Hi irchutirna hi mi tin hrang ni maka, Pathianin a ipêkhai chunga vai hmang ni a ti.

¹² Pasalin dôngma a inei loi nasan chu tamtak a om; senkhat chu nei loi hrang piala suak an ni; senkhat chu khaang hranga mihriamin an isiam khom an om; senkhat chu irvân Ram sikin an inei loi a ni. Tukhom hi irchutirna a pom thei murdi’n chu zôm ri se,” tiin a sâma.

Jisua’n nâipangtehai sat a vur thu

¹³ Khan, Jisua’n an chunga a kut a’rnghat thei hrang le a chongchai pe theina hrangin mi senkhatin nâipangtehai a kuang an hong hruaia, khannisian, irchutirhaiin an lei ngoa.

¹⁴ Jisua’n an kuang, “Nâipangtehai ki kuang inhongtirhai unglân, khap no roi, irvân Ram chu hiang mihai ta a ni sikin,” a tia.

¹⁵ Khan, an chunga a kut a’rnghata, khatak ata a fe tâka.

Ruatharte irchongpa thu

¹⁶ Khan, mi inkhat Jisua kuang a honga, “Irchutirtu, kumtuang hringna ki nei theina hrangin i sin sa mo ki itho hrang?” tiin a’rdona.

¹⁷ Jisua’n, “Itho mo sin sa ni ni irdon? A sa chu inkhat vai kêng a iom. I khom nisian, hringnaa lût ni nuamin chu thupêkhai zôm roh,” tiin a sâma.

¹⁸ Ama khan, “I thupêkhai mo?” tiin a’rdona: Jisua’n, “Mi that no roh; uire no roh, milakin mi hnôl no roh;

¹⁹ ni nu le ni pa chôiindôm roh; khabana, nangma lung ni irthung angin ni bômhai lungthung roh, tihai hi,” tiin a sâma.

²⁰ Ruathartepa khan, “Kha thupêkhai kha chu ki zôm zit ta, imo ki la irsam?” a tia.

²¹ Jisua’n a kuang, “Satirkipa om ni nuamin chu fe’n lân, ni inei murdi zuarin lân, kha sum kha inrianghai kuang pe roh, khanchu, irvâna irchon nei ni ti; kha hnung chu, hongin lân, ni hong zui roh,” a tia.

²² Ruathartepa khan kha chong kha an hriatin chu chardong takin a rot ta, mi irchongtak a ni sikin.

²³ Khan, Jisua’n, a irchutirhai kuang, “Thudik nangni ki hril; mi irchonghai hrangin chu irvân Rama lût a intak ok hrang a ni.

²⁴ Nangni ki hril nok: Irchong Pathian Rama lût nêkin chu saringsei simphuai mikuara lût ol ual a ti,” a tia.

²⁵ Kha chong kha irchutirhaiin an inhriatin chu a sân an irngai a’rkhêl oka, “Khano’nte, tu mo saninhring ni thei hrang?” tiin an irdona.

²⁶ Jisua’n anni kha en ngitin an kuang, “Ama kha mihriam hrangin chu thei ni maka, Pathian hrangin chu thei a ni,” tiin a sâma.

²⁷ Khanchu, Petera’n a kuang, “En ta, keini’n itinrêng mâkin nang kin zuia, imo kin ihmu hrang?” a tia.

²⁸ Jisua’n an kuang, “Thudik nangni ki hril: Zoro thara chu, Mihriam Nâipa a rêngtoihmun roiinpui taka a toi tika, nangni a ni zuituhai khom hi Israel nam sômhleihni chunga roirêlin rêngtoihmun sômhleihnia la toi nin ti.

²⁹ Tukhom ki’rhming sika in mani, urêng mani; farnuhai mani, pa mani, nu mani, nâihai mani, ramhai mani mâksan chu a bâk irzain hmu an ti; kumtuang hringna la dong sa an ti.

³⁰ “Khannisian, atûna a masa taka omhai chu a hnungkhôn tak la ni an ta, a hnungkhôn taka omhai khom a masa tak la ni an ti,” a tia.