MATHAIA 18 - PATHIAN LEKHABU IRTHIANG C.L. Bible (BSI)

Tu mo roiinpui tak

¹ Kha lai khan irchutirhai Jisua kuang an honga, “Irvân Rama tu mo roiinpui tak hrang?” an tia.

² Khanchu Jisua’n nâipangte hi a koia, an makunga an ngîrtira,

³ “Thudik nangni ki hril, nin irleta, nâipangtehai angin nin om no’n chu, irvân Rama lût viat no chin ni.

⁴ Irvân Rama roiinpui tak hrang chu irngaiintôma, hi nâipangte anga omtu hi ni a ti.

⁵ Tukhom ki’rhming sika hianga nâipangte lôm ka chu keima ni lôm an ni.

Tûkna inomtirtu thêmna

⁶ “Tukhom, hi a ni iamhai laia nâipangte inkhat khom hi an tûktirin chu, a hroka bu nôina lung lianpa irhlitirin tuikhanglian inthûk taka inthâkhai sianlân a ta hrangin sa ual a ti.

⁷ Tûknahai sikin rammual chung an tak vang na! Tûknahai chu om mai a ti, khan tûknahai inomtirtu chung chu an tak vang na!

⁸ “Ni kutin mani, ni ke’n mani, nang an tûktirin chu tanpaiin lân, pai chian roh! kut kiang hni mani, ke kiang hni mani neia kumtuang hremhmuna nang pai nêkin chu kut boi, ke boia hringnaa lût ni ta hrangin a sa ual.

⁹ Ni mit khomin nang an tûktirin chu kêlsuakin lân, pai rak roh! Mit kiang hni neia hremhmun meidîla nang pai nêkin chu, mit kiang khat vai neia hringnaa lût ni ta hrangin a sa ual.

Belra irhmang chongirkhek thu

¹⁰ “Hi mi chîntehai laia inkhat lua hi hmusit loi hrangin irdîn roi, irvâna vântîrtônhaiin ka Pa irvâna mi, hmêl an hmu mai ngai ti nangni ki hril a ni.

¹¹ Mihriam Nâipa hi a’rhmanghai zonga saninhring hrang piala zuang a ni.

¹² “Mi inkhatin belra irzakhat a neia an laia inkhat irhmang sian, itin mo tho le nin irhoitir? Sômkuak kuakhai kha mâkin, fe a ta, ar hmangtu kha a va izong loi hrang ma ni?

¹³ Nangni ki hril, a va hmu’n chu sômkuak kuak ar hmang loihai nêkin inkhat chunga khan lôm ual a ti.

¹⁴ Khaang dênin, hi mi chîntehai laia inkhat irhmang khom hi nin Pa irvâna mi nuam mah.

Urêng thil tho’nsual thu

¹⁵ “Ni urêngin ni chunga thil sual tho sianlân, fe’n lân, nin inhni vai inhriata irchu roh. Ni chong ar ngaiin chu ni innghip ni a ti.

¹⁶ Khannisianlân, ni chong ar ngai no’n chu mi dang inkhat mani, inhni mani hruai sa’n lân, khanchu nin thu murdi chu inhretu inhni mani, inthum mani bâia indet ni thei a ti.

¹⁷ Khan, khahai chong khom ar ngai no’n chu thil tinrêng koiindanghai kuang intung roh. A hnungkhôn taka chu koiindang chong khom ar ngai nuam no’n chu, kha mi kha chu Jentail angin mani, khâzana irfuangtu angin mani bê roh.

Khap le phal

¹⁸ “Thudik nangni ki hril, irnêng chunga i khom nin ikhap ka chu irvâna ikhap ni a ta, irnêng chunga i khom ni iphal ka chu irvâna phal ni a ti.

¹⁹ Thudik nangni ki hril; irnêng chunga hin nin laia mi inhni inruala i thua khom an chongchaiin chu ka Pa irvâna mi’n tho pe a ti.

²⁰ Mi inhni mani inthum mani ki’rhminga an irchunkhôm rikipin an kuang om ngai ki ti,” a tia.

Siahlo ngaidam nuam loi chongirkhek

²¹ Khanchu, Jisua kuang Petera a honga, “Rengpa, ki urêngin voi iza mo ki chunga thil tho’nsual sianlân ki ingaidam hrang? Voisari ten mo a ini hrang?,” a tia.

²² Jisua’n a kuang, “Voi sari ten, ti ma unga, voi sari hmun sômsari ten,” ki iti a ni.

²³ Khasika khan irvân Ram chu, Inlaltak tu mo khat a siahlohai kuang sum chungchâng infel tumtu leh irkhek a ni.

²⁴ A hong infelin chu, mi inkhat, talent sîngkhat intâng, a kuang an hong hruaia;

²⁵ Thuanna a nei no sikin a pu khan ama leh a dôngma, a nâihai le a inei murdi zuara thuan hrang thu a pêka.

²⁶ Khanchu, siahlo khan khûksadelin chubai a mûka, ‘Ki chunga irngai nin hoiin lân, a rêngin nang thuan zit ki ti,’ a tia.

²⁷ Khanchu, kha siahlo kha a pu khan a sân lung an kham tak taka, an suaa, a intâng kha a ngaidam tâka.

²⁸ Khannisianlân, kha siahlo kha a fe suaka, a siahlo chanpui inkhat a sum, a duli irza intângtu kha a va hmua, a chela, a bohroka a chela, ‘Ni intâng kha ni pe roh,’ a tia.

²⁹ Kha a siahlo chanpui khan inbokin, ‘Ki chunga irngai nin hoiin lân, nang thuan ki ti!’ tiin a ngêna.

³⁰ Khannisianlân, nuam maka, a lâkai a thuan mâka chu intângna ina a khum tâka,

³¹ Khan, siahlo danghaiin a sintho lam kha an hmu’n a sân poi an tia, Inlaltak kuang khan an fea, thil tinrêng an van sîr pe ta.

³² Khanchu, Inlaltak khan siahlo kha a koia, a kuang, ‘Siahlo pualoi! ni ni ngên sikin ni lâkai murdi nang ki ngaidam a ni.

³³ Lung nang kin kham angin, nang khomin ni siahlo chanpui lung ni inkham hrang mo ni ma? a ti pea.

³⁴ Inlaltak kha a sân a ning an mur sika kha siahlo kha a lâkai a thuan zoi mâka intângna ina a khum tâka,’ a tia.

³⁵ Khan, Jisua’n, “Mi tinin nin urênghai nin lungrîl takin nin ngaidam no’n chu ka Pa irvâna mi’n khaang dên khan nin chunga tho sa a ti,” a tia.