MATHAIA 15 - PATHIAN LEKHABU IRTHIANG C.L. Bible (BSI)

Pi pu thumâk

¹ Khanchu, Jerusalem ata Farisaihai le Dân irchutirtuhai kha Jisua kuang an honga.

² “Ithoa mo ni irchutirhaiin pi pu thumâk hi an izôm ngailoi? Fâk an zong khomin tho dân angin kut irsûk ngai mahaia!” an tia.

³ Jisua’n an kuang, “Ithoa mo Pathian thupêk zôm loiin nin binga thumâk nin izui hi?

⁴ Pathianin, ‘Ni nu le ni Pa chôiindôm roh, mâni nu mani, pa mani insîrinsiat chu a ithi ngêt hrang a ni,’ a tia.

⁵ Khannisian, nangni’n chu, ‘Tukhom a nu mani, a pa mani, sanna hrang thil a neia, nikhomsian, ‘Hi thil hi Pathian ta tak kêng,’ a ti’n chu,

⁶ a nu le a pa mahrip a itho hrang ni mah,’ nin ti ngaia. Khasikin, nin pi le pu thumâkhai nin zôm theina hrangin Pathian thupêk chu ite’n nin ibe ngai loi a ni.

⁷ Nangni vârirlethaio, Isaia’n nin chungchâng a lei insîr kha a dik kêng!

⁸ ‘Hi mihai hin an bâiin an nin pâka, Khannisian, an lungrîlin chu an ni hla.

⁹ An irchutirna chu mihriam thupêk an irchutir sikin, an ni biakna hi a korong a ni, Pathianin a ti,’ tia a lei irziak kha,” tiin a sâma.

Mihriam porinchetirtu

¹⁰ Khan, Jisua’n mipuihai kha a kuang a koihaia, an kuang, “Irngai unglân, inhre thiam roi!

¹¹ Bâia lûtin mi porinchetir ngai maka, bâi ata suakin kêng mi a iporinchetir ngai,” a tia.

¹² Khanchu, a irchutirhai an honga, a kuang, “Ni chong khan Farisaihai milung a sân hoi mah, ti nin hriat mo?” an tia.

¹³ Jisua’n, “Thing murdi ka Pa irvâna mi iphun ni no chu phâipaiin om an ti.

¹⁴ An chungchânga nin milung inbuai no roi! Anni kha mitchohai hruaitu mitcho an nia; mitcho khan mitcho dên a hruaiin chu an ruaiin khurpadopa tâk an ti,” tiin a sâma.

¹⁵ Petera’n a kuang, “Kha chong omzia kha ni hrilfiah pe ro,” a tia.

¹⁶ Jisua’n an kuang, “Nangni khom atûn ten ang dôra lan môl mo nin la ini?

¹⁷ Bâia lût ka chu phîng sûnga a lûta, kha hnung chu a isuakpai ngai ti nin inhriat loi ma ni?

¹⁸ Bâia suakhai ka chu milung ata hong suak a nia, kha khan mihriam a porinchetir ngai a ni.

¹⁹ Milung ata nin ngaituana sual hai, mi thatna hai, uirena hai, irditna hai, inrûkna hai, milaka irsêlna hai, Pathian hril siatna hai a ihong suak ngai a ni.

²⁰ Kha kha mihriam porinchetirtu chu a ni; kut irsûk loia bu nêk hi chu mi porinchetir ngai ma,” a tia.

Suro Foiniki nupangnu iamna

²¹ Jisua’n kha hmun kha mâkin Tura le Sidon kho hual vêla a fea.

²² Kha rama om Kanaan nupangnu inkhat a kuang a honga, “Davida Nâipa! lung nin kham ro! ki nâinu ramilhli’n a chela, dengthei takin a iom kêng,” tiin a khêka.

²³ Khannisianlân, Jisua’n chu bâi khat luan sâm mah. A irchutirhai a kuang an honga, “Hi mi hi infetir ta roh! khêk diaiin ei hnung a ni zui,” tiin an ngêna.

²⁴ Khanchu, Jisua’n, “Israel belra irhmanghai laia vai kêng tîr ki ini,” tiin a sâma.

²⁵ Khannisianlân, nupangnu kha a honga, “Rengpa, ni changpui roh,” tia kûnin chubai a mûka.

²⁶ Jisua’n, “Nâihai bai lapaia, uihai laia pêk chu dik mah,” tiin a sâma.

²⁷ Nupangnu khan a kuang; “Rengpa, a ni chu a ni, khannisian, uihai khomin an pu maichâm ata bai irnôi tâk chu an fâk ngai khate,” tiin a sâma.

²⁸ Khasikin Jisua’n a kuang, “Nupangnu a sân ni iam, ni inuamlam ang takin ni chunga tung ri se” a ti pea. Khanchu, a nâinu kha, kha zoro lai taka khan a hong dam tâka.

Jisua’n mi tamtak an damtirna thu

²⁹ Khan, Jisua chu khatak ata a fea, Galili dîl kôla a fea, tânga a kâia, a toi tâka.

³⁰ Mipui tamtak a kuang an honga, ke’nbâi hai, mitcho hai, suakinsual hai, chong theiloi hai le mi dang tamtak Jisua kuang an hong hruaihaia; a lei indamhai thiaia.

³¹ Mipuihai khan chong theiloihai kha hong chongin, kholrabaichahai kha hong damin, kea fe’n, mitcho hai mit hong vâr tâk kha an hmu’n a sân a’rkhêl an tia; khanchu, Israel Pathian kha an inpâk ta.

Jisua’n mi sâng minli a vâina thu

³² Khan, Jisua’n a irchutirhai a koia, an kuang, “Mipuihai hi sûn thum ki kuang an om tâka, atûn hin ite fa hrang an nei no sikin, a sân lung kin khamhai tak taka, bu ngheiin inkîrtirhai nuam ma ung, khano’nchu lam laia châmsôl irveina an ti,” a tia.

³³ Irchutirhai khan a kuang, “Hiang dôra mipui infâ inkhop hrangin, hi ramchâra hin khôn mo bai ei ihmu hrang?” an tia.

³⁴ Jisua’n, “Idôr mo bai nin inei?” tiin a’rdonhaia. Anni khan, “Bai sari le nga tômte,” an tia.

³⁵ Khanchu, Jisua’n mipuihai kha irnênga toi hrangin thu a pêkhaia.

³⁶ Khan, bai sari le nga kha a lâka, Pathian kuang lômthu an sîra, a khoia, irchutirhai kuang a pêka; irchutirhai khan mipuihai kuang an pêk tâka.

³⁷ An rêngin an fâka, an khop seng tâka. Khanchu, irchutirhai khan an ifak mihliaa a’rnôi kha khamphulu sari an la hrût insipa.

³⁸ A fâkhai chu nupang le nâipang tep loiin pasal ulian inzen mi sâng minli an ni.

³⁹ Kha hnung chu Jisua’n mipuihai kha an chîntirhai zoiin chu irkuanga a chuanga, Magadan rama a fe ta.