MATHAIA 14 - PATHIAN LEKHABU IRTHIANG C.L. Bible (BSI)

Baptistu Johana thi thu

¹ Kha zoroa khan Galili rama rêng Heroda’n Jisua thurchi a lei inhriata.

² A siahlohai kuang, “Hi mi hi Baptistu Johana ngêt kha a ni, mithi lai ata a thoi nôk tâk kêng. Khasikin kêng hi sinirkhêl sin theina ircham hi a inei,” a tia.

³ Matona khan Heroda’n Johana a lei chela, a khitphiara, intângna ina a lei ikhum tâk a ni. Khaanga a ithô nasan chu a urêngpa Filipa dôngma Herodi sika a ni.

⁴ Baptistu Johana khan Heroda kuang, “Herodi leh nin irnei hi dik ma,” a lei ti pe sikin.

⁵ Heroda’n Johana kha that a tuma, khannisian, Juda mipuihai a chia, Johana kha deipu’n an bê sikin.

⁶ Khannisianlân, Heroda suak nî champha nikhuaa khan chu Herodi nâinu kha mipuihai laia a lâma. Heroda kha a lôm tak taka,

⁷ a kuang chong an kunga, “I khom ni ni inghi ka chu nang pe ki ti,” a tia.

⁸ Khanchu a nu iti pe lam ang takin, “Hi hmuna hin atûn Baptistu Johana lu chu khênga ni pe zôi zel ro!” tiin a nghia.

⁹ Reng kha a sân a char an dongtir tâka, khannisian a chonginkung sikin le a khual mihai sika khan pêk hrang thu an kung tâka.

¹⁰ khanchu, intângna ina khan Johana lu kha an tan ta.

¹¹ A lu kha khêngin an hong chôia, nupangtenu kuang an pêka, ama khan a nu kuang a chôi ta.

¹² Johana irchutirhai an honga, ruak kha an chôia, an phûma; khanchu, an fea, Jisua an insîr pe ta.

Jisua’n mi sâng ringa a vâina thu

¹³ Khan, Jisua’n Johana thurchi a len hriatin, khataka irthokin a suaka, irkuangin a bing dokin hmun fianriala a fea. Mipuihaiin an inhriattin chu an khuahai ata kea fein an zui tâka.

¹⁴ Jisua irkuang ata vakama a suakin chu mipuihai kha a hmu’n chu a sân lung an khamhaia, damloihai an damhaia.

¹⁵ Kha ni khohloia khan a irchutirhai an honga a kuang, “A sân an hnung ok tâka; hi hi hmun fianrial a ni; mipuihai hi infetirhai tan lân, kho sûnghaia fehai sian, an fâk hrang ircho ri sehai” an tia.

¹⁶ Jisua’n an kuang, “An ife nang mah; nangni’n fa hrang pehai roi,” a tia.

¹⁷ Anni khan a kuang, “Hitaka kin inei chu a rêngin bai ringa le nga inhni vai keng,” tiin an sâma.

¹⁸ Jisua’n, “Hin hong chôi roi,” a tia.

¹⁹ Mipuihai kha sûl chunga toi hrangin thu a pêkhaia; Khanchu, bai ringa le nga inhni kha a lâka, irvân tiang enin Pathian kuang lômthu an sîra. Bai kha a khoia, irchutirhai kuang a pêka, irchutirhai khan mipuihai kuang an sem pehai tâka.

²⁰ Mi tinin an fâka an khop senga, an fâk ban chu khamphulu sômhleihni an la hrût insip a ni.

²¹ A fâkhai chu nupang le nâipang tep loiin pasal ulian ka khom mi sângringa vêl an ni.

Jisua tui chunga ar lôi

²² Khan, Jisua’n mipuihai kha an chîntir zoro laiin a irchutirhai irkuanga an chuangtirhaia, dîl râl tiang a lei infehaia.

²³ Mipuihai an chîn zoiin chu a bingin tânga chongchai hrangin a fea: khohloi a hong ni’n chu, kha khan a bing vaiin a om tâka.

²⁴ Kha zoroa khan irkuang kha dîla hla taka a om tâka. Phâivua’n a no tiang a sêmpai sikin, tui irsokin hi tiang so tiang a hnôka.

²⁵ Khanchu, zînga kôlirsal hrang tônin, Jisua chu tui chunga irlôiin a irchutirhai kuang a honga.

²⁶ Tui chunga a ihong an hmu’n chu an chia, “Mithi irtha kêng!” an tia; an chia, an khêk mur mura.

²⁷ Jisua’n a lei chongpuihai zôi zela, “Lungirngam takin om roi, keima kêng ki ini, chi no roi,” a ti pehaia.

²⁸ Khanchu, Petera’n, “Rengpa, nangma ni ni’n chu tui chunga ni kuanga hong ni phal roh,” a tia.

²⁹ Jisua’n, “Hong roh!” tiin a sâma. Khanchu, Petera kha irkuang ata a suaka, Jisua tiang panin tui chunga ke’n a fe tâka.

³⁰ Khannisianlân, phâivua tho kha a hmu’n chu a chia, tuia ngîm hrangin a om tâka, “Rengpa, ni saninzôk ro!” tiin a khêka.

³¹ Jisua’n a hei inbana, an tûk zôi tâka, a kuang, “Ni iamna a tôm bâka! Itho sika mo lung ni irhlatir?” a ti pea.

³² An ruaiin irkuang sûnga an lûta, phâivua khom a dâidup tâka.

³³ Khanchu, irkuanga irchutir omhai khan, “Pathian Nâipa ni ni lele kêng,” tiin Jisua chubai an mûka.

Jisua’n Genesaret rama damloihai an damna thu

³⁴ Dîl râl an kâiin chu Genesaret ram an hong tung tâka,

³⁵ kha khan Jisua kha an lei inhriat zôi zela. Khasikin an kôlvêl ram murdia khan mi an tîra, damloihai murdi kha Jisua kuang an hong tuanga.

³⁶ Damloihai khan a puan hmor vai lua tôn hrangin an ngêna; a tôn murdi chu an dam thiaia.