MATHAIA 13 - PATHIAN LEKHABU IRTHIANG C.L. Bible (BSI)

Fachî inthektu chongirkhek thu

¹ Kha nî sûn ngêta Jisua kha in ata a suaka, dîl kôla a fea, khan a toia, ar chuhaia.

² Mipui tamtak an hong irchunkhôma; khanchu, irkuanga a chuanga, a toia, mipui murdi kha chiaiphoia an ngîra.

³ Thu tamtak an kuang chongirkhekin an sîra; “Irngai u ta, fachî inthektu fa chi inthek hrangin a fea.

⁴ A hong in thekin chu senkhat lampuia a tâka, vahaiin an hong fâk zôi zela.

⁵ Senkhat lungpherpha chung, irnêng irphânnaa a tâka, irnêng ar sâ no sikin, a hong mông lata.

⁶ Khannisianlân, misa a hong irsâng uala, a thêma, irzung a lâk thei no sikin a châra.

⁷ Senkhat chu hloi ilhlingnei kâra a tâka, hloi kha a hong mông irsânga, a hong dîp irhmang ta.

⁸ Senkhat chu irnêng saa a tâka, senkhat chu irzain, senkhat chu sômrukin, senkhat chu sômthumin a hong ra tâka.

⁹ Irngaituana mikuar nei murdi’n chu irngai ri sehai,” a tia.

Chongirkhek thiltum

¹⁰ Khan, irchutirhai kha Jisua kuang an honga, “Mipuihai laia thu nin sîrin ithoa mo chongirkhekin ni insîr?” an tia.

¹¹ Jisua’n an kuang, “Irvân Ram thurîl inhriat theina nin kuang pêk a ni a, mi danghai kuang chu pêk ni ma,

¹² Tukhom a nei ka chu pe sa ni a ta, nei ok a ti; tukhom a nei loi chu a inei sun khom lapai pe ni a ti.

¹³ An kuang thu kin sîra chongirkhek ki ihmang nasan chu an ena an hmu nona hrang le an irngaia an inhriat thei loina hranga a ni.

¹⁴ Khasikin, deipu Isaia lei ihril kha an chunga a hong itung a ni hi: ‘Hi mihai hin irngai an ta chu a omzia inhre thei no nihai; En en an ta chu hmu’nfel no nihai.

¹⁵ An milung a lei inmôl tâka, An mikuar a lei sêt tâk, An mit khom a lei zîng tâk sikin. khano’nchu an mitin hmu an ta, An mikuarin inhriat an ta, An milungin inhre thei an ta, Keima tiang hong irhei kîr an ta, Ki lei indamhai itinin, Pathianin a ti,’ iti kha.

¹⁶ “Nangni chu, nin vân a sa bâka na! Nin mitin a hmua, nin mikuarin a inhriat a ni.

¹⁷ Nangni ki hril, nin ihmu hi deipu tamtak le Pathian mi tamtakin a hmu an nuam tak taka, khannisianlân, hmu thei mahai, nin inhriat khom hi inhriat an nuam tak taka, khannisian, inhre thei mahai.

Jisua’n fachî inthektu chongirkhek a hrilfia

¹⁸ “Khasikin irngai unglân, fachî inthektu chongirkhek omzia hi irchu roi.

¹⁹ Tukhomin Pathian Ram thu chu irngaia an inhriat thiam no’n chu mi sual chu a honga, a milunga inthek sai chu ar chupui ngai.

²⁰ Khan, fachî lungpherpha irnêng irphânnaa tâk chu, thu an hriat zoi le lôm taka pom zôi zelhai hi an ni.

²¹ Khannisian irzung inthûk a thâk no sikin om sôt ngai mah. Thu sika intakna mani, dengintheina mani a hong om le chu an tûk zôi zel ngai a ni.

²² Fachî ilhling kâra tâk kha thu inhre tâkhai an ni, Khannisian, hi rammual kanna le irchongnahai khan thu kha a dîpa, ra nei ngai mah.

²³ Khan, fachî irnêng saa tâk chu thu kha an inhriata, ar ngai lam khom inhriathai hi an ni. An ra ngaia, senkhat irza’n, senkhat sômrukin, senkhat sômthumin an hong pung ngai,” a tia.

Farhli chongirkhek thu

²⁴ Jisua’n chongirkhek dang an sîr nôka: “Irvân ram chu mi inkhat a loia chi sa inthektu leh irkhek a ni.

²⁵ Zân khat chu mi an in zit hnungin, râl a honga, bu bil laia khan bu dol an theka, a rot nôka.

²⁶ Khan, bu kha a hong mônga, a hong vûiin chu farhli khom a hong inlang sa tâka.

²⁷ Loi neitu suakhai kha an honga, a kuang, ‘Ka pu, ni loia chi sa ni inthek kha, farhli so kho taka hong om ma ni?’ an tia.

²⁸ Ama khan an kuang, ‘Kha kha chu râlhai lei inthek sa a ni so te,’ a tia. Suakhai khan a kuang, ‘Khano’nte, va rôl zoiin lân a sa mo ni ti?’ an tia.

²⁹ Ama khan a sâma, ‘Ti ma ung,’ farhli nin rôlin chu bu tak kha inpot pal sa nin ti.

³⁰ Bu ât dênin mông sap ri sehai; bu ât tika a âttuhai kuang, ‘Farhli chu rôl bak unglân, hâl hrangin intêl roi; bu tak chu fasiara inlût roi,’ ” a tia.

Ancham chi chongirkhek

³¹ Jisua’n chongirkhek dang, an sîr nôka: “Irvân Ram chu mi’n ancham chi a chôia, a loia a inthek ang hi a ni.

³² Kha kha chîmu murdi laia chîn tak ni khomsian, a hong irsôn tikin chu chîmu danghai nêka lian tak a hong ni ngai. Thingkung a hong nia, khanchu, chunglêng vahai an honga, a ôna irbu an kai ngai,” a tia.

Chol chongirkhek thu

³³ Jisua’n chongirkhek dang an sîr nôka: “Irvân Ram chu nupang inkhatin chol a lâka; baiphit litar sômminli leh ar zêla, a thoi mâka chu khamphulua a irpoltir ang kha a ni,” a tia.

Jisua’n chongirkhek a ihmangna san

³⁴ Khahai murdi kha Jisua’n mipuihai kuang chongirkhekin an sîra, chongirkhek ni no’n chu an kuang ite insîr ma.

³⁵ Kha a ihmangna san chu deipu’n, “An kuang thu kin sîrin chongirkhek hmang ki ta, Kho’rsiang kho’rzir ata thil irthup kha insîr pe ki ti,” tia a lei insîr kha a hong tung theina hranga a ni.

Farhli chongirkhek hrilfiana thu

³⁶ Jisua’n mipuihai kha a mâksanhaia, in sûnga a lûtin chu a irchutirhai an honga, a kuang, “Loia bu chongirkhek kha imo a omzia nin hril ro,” an tia.

³⁷ Jisua’n an kuang, “Fa chi sa inthektu kha Mihriam Nâipa a ni,

³⁸ loi chu rammual hi a ni, chi sa chu Ram nâihai an nia, farhli chu sual nâihai an ni;

³⁹ râl, farhli inthektu kha chu Diabola a ni. Bu ât zoro chu rammual hekna hrang a nia, bu âttuhai chu vântîrtônhai an ni.

⁴⁰ Farhlihai chu irtika, meia an ihâl angin rammual hek tika chu a iom hrang a ni;

⁴¹ Mihriam Nâipa’n vântîrtônhai kha tîr a ta, a Ram ata mi, sual inthotir ngaihai le sualtho ngaihai kha bûm an ta,

⁴² mei thi thei ngai loia khan pai an ta, kha khan chap an ta, an irkamnôi an ti.

⁴³ Khanchu, Pathian nâihai chu an Pa Rama misa angin vâr ta an ti. Irngai roi, mikuar nei murdi’n chu!

Irchon phûm inrûk chongirkhek

⁴⁴ “Irvân Ram chu mi inkhatin loia irchon phûm inrûk a hmu suaka, a phûm nôka raifân takin a fea, a inei murdi a va zuara, kha loi kha a irchôk tâk ang kha a ni.

Lunghlu chongirkhek

⁴⁵ “Irvân Ram chu mi inkhatin lunghlu satak a zonga,

⁴⁶ Lunghlu satak kha a hmu’n chu, a fea, a inei murdi a va zuara, kha lunghlu kha a irchôk tâk ang kha a ni nôk.

Lên chongirkhek

⁴⁷ “Irvân Ram chu nga chel ngai senkhatin an lên dîla an vôra, nga chi tinrêng an iman ang kha a ni nôk.

⁴⁸ Lên chu a sip tenin chu muanga an kaisuaa, kha khan an toia; a sa murdi koka an thuna, a saloi ka chu an pai ngai.

⁴⁹ Rammual mong tika chu khaang khan la om a ti, vântîrtônhai chu zuang suak an ta, mi felhai laia irthokin mi sualhai kha bûm an ta,

⁵⁰ mei thi thei ngai loia khan pai an ta, kha khan chap an ta, an irkamnôi an ti,” a tia.

Thil milui le thar

⁵¹ Khan, Jisua’n, “Khahai murdi kha nin inhriat thei mo?” a tia. Anni khan, “Kin inhriat thei,” an tia.

⁵² Khan, Jisua’n an kuang, “Khasikin, Dân irchutirtu, vân Ram thu irchu tâk ka chu, in neipu’n, ar chon kok ata thil milui le thil thar kêlsuatu ang hi a ni,” a tia.

Nazaret-a Jisua hnôlin a om

⁵³ Jisua’n kha chongirkhek kha an sîr zoiin chu khatak ata a fe tâka,

⁵⁴ a omna khua tiang a kîr nôka, Sinagoka khan a’rchutirhaia; a thu’nsîr inhriat dôrin chu an irngai a’rkhêl tâka, “Hi mi hi vârna le sinirkhêl sin theinahai hi khô taka a ihmu ma ni?

⁵⁵ Hi mi hi bakot sin ngaitu nâipa kha mo ni ma? Mari kha a nu mo ni ma? A urênghai khom Jakoba, Josefa, Simona le Juda hai kha ni mahai mo?

⁵⁶ A farhai khom hitaka om mo ni mahai? Hihai murdi hi khôtaka irthoka a ihmu ma ni?” an tia.

⁵⁷ Khanchu, ama kha an hnôl tâka; Jisua’n an kuang, “Deipu chu a khua le a in mihai laia ti no chu hmun tina an chôiirsâng ngai,” a ti pehaia.

⁵⁸ An iam no sikin khataka khan chu sinirkhêl tho intam ok ma.