MATHAIA 12 - PATHIAN LEKHABU IRTHIANG C.L. Bible (BSI)

Sabat chungchânga chong irdonna

¹ Kha zoro lai khan, Jisua chu Sabat nî’n bu bil hmunhaia a hroa; irchutirhai kha an phîng a châma, bu vûihai kha an khiaka an fâk tâka.

² Farisaihaiin an hmu’n chu, Jisua kuang, “En ta, Sabat nî’n ni irchutirhaiin an itho hi ei Dân ikhap a ni,” an tia.

³ Jisua’n an kuang, “Davida le a mihaiin an phîngchâm laia an itho kha nin la itep ngai loi ma ni?

⁴ Davida kha Pathian ina a lûta ama le a mihaiin bai, an ifâk irthiangloi Pathian kuanga inhlan tâk, Ochaihai vaiin an ifâk ngai kha an ifâk a ni khate.

⁵ A ni le Sabat dân an inchâi ngaia, khan khoma thiamno chang ngai mahai ti Mosia Dân lekhabua nin la itep loi ma ni?

⁶ Nangni ki hril, hin tempil nêka roiinpui ual a om.

⁷ Pathian Thubu’n, ‘Irbôlna nuam ma ung, lungkhamna kêng ki inuam,’ a iti hi a omzia nin inhriat infel ni sianlân chu, mi sahai kha thiamno inchang no chin ni;

⁸ Mihriam Nâipa hi Sabat Rengpa a ni sikin,” a tia.

Jisua’n kut zenginthi an damna thu

⁹ Jisua’n kha hmun kha mâkin, Sinagoka a lûta.

¹⁰ Khataka khan mi inkhat kut zenginthi a lei oma. Khabana, mi senkhat Jisua’n a tho’nsual tia hnôl nuamhai an lei om saa, Jisua kuang, “Sabat nia mi indamtir hi ei Dânin a ikhap ma ni?” tiin an irdona.

¹¹ Jisua’n an kuang, “Nin laia tu khôkin mani belra inkhat nei sian, Sabat nî’n khurpadopa tâk sianlân, tu mo la suak loi hrang?

¹² Belra nêkin chu mihriam chu a hlu ual kêng! Khasikin Sabat nia thil sa tho hi a irthiang a ni,” a tia.

¹³ Khanchu, kut zenginthi kuanga khan, “Ni kut phar ro,” a tia. A hong inphara, a kut kiang khat tianga angin a dam ving ta.

¹⁴ Khanchu, Farisaihai kha an suaka, Jisua kha an that thei hrang lam ngaitua’n an chong tâka.

Pathian siahlo inthangna thu

¹⁵ A that hrang lam an zong ti Jisua’n an hriatin chu kha hmun ata kha a rota, mipuihaiin a hnung an zuia. Damloihai murdi an dama,

¹⁶ a thurchi tûte kuang insîr loi hrangin thu a pêka.

¹⁷ Pathianin deipu Isaia kuanga a insîr kha a hong tung theina hrangin.

¹⁸ “En ta, ki siahlo ki inthang, Ki indit tak, Ki lungrîlin a ilôm tak tak hi; A sûnga ki’rtha sia ki ta, Khanchu, nam tin laia roirêlna thu inpuang a ti.

¹⁹ Sêl no nia, khêk ual no nia, kholaia khom tûte’n ar hâi inhre ual no nihai.

²⁰ Hrât loihai chunga zâidamna nei a ta, Beiindonghai chunga khonzana nei a ta, Dikna khan inhnêna a pêk mâka chu mong no ni.

²¹ Ama irhminga Jentailhaiin sabeina irnghat an ti,” ti hi.

Jisua le Belzebula

²² Khan, mi senkhat Jisua kuang mitcho le ramilhli’n a chel sika chong theiloi an hong hruaia. Jisua’n khapa kha an dama, khanchu, a hong chong theia, a hong hmu thei ta.

²³ Jisua sintho kha mipuihai murdi’n a’rkhêl an ti oka. “Hi mi hi Davida Nâipa kha mo ni ma?” an tia.

²⁴ Ama kha Farisaihaiin an inhriatin chu, “Hi mi hin ramilhlihai an hnot suak theina chu an rêngpa Belzebula’n irnak a pêk sika a ni,” an tia.

²⁵ Jisua’n an ingaituahai kha an hriata, an kuang, “Kho rama khom mâni le mâni irdoi chu an chiam ngai; kho khuaa khom, sûngkua khom, mâni le mâni irdoi ka chu inding suak no nihai.

²⁶ Setana khom Setana an hnot suakin chu mâni irdoi ni a ta, a ram chu itin mo a ingîr suak thei hrang?

²⁷ Khan, Kei Belzebula sika ramilhlihai inhnot suak ngai ki lei ni chu, nin nâihaiin tu sikin mo an inhnot suak ngai kha? khasikin, anni chu nangni ngaituatu hranghai ni an ti.

²⁸ Aniachu, Pathian Irtha sika ramilhli inhnot suak ngai ki ni’n chu, nin kuang Pathian Ram kha nin kuang a zuang tung ta tihna a ni.

²⁹ A ninole, mi’n mi hrât kha a khit masa bak no’n chu itin mo a ina lûtin a sum a ilâkpai pe thei hrang? A khit zoia vai kêng a in kha inram pe thei hrang.

³⁰ Tukhom keima tianga kop loi chu a ni doi a ni, tukhom ni bûmpui no ka chu a ichênpai chit a ni.

³¹ “Khasikin nangni ki hril, mihai sualna murdi le Pathian an hril insiatna tinrêng chu ngaidam nih a ti. Irtha Irthiang hrilsiat chu ngaidam ni no ni.

³² Tukhom, Mihriam Nâipa hrilsiattu chu ngaidam ni a ta, Irtha Irthiang hrilsiat chu, atûn hring sûnga khom, zoro hong theng hranga khom ngaidam ni no ni.

Thing le a ra

³³ “Ra sa nei thei hrangin chu thingkung sa nin nei a nang; thingkung saloi nin neiin chu ra saloi nei nin ni. Thingkung chu a ra rengata inhriat thei a ni.

³⁴ Mirûl irchihaio, nangni’n sual nei chianin itin mo thu sa nin insîr thei hrang? milunga lêt raka sip hi kêng bâiin a insîr suak ngai.

³⁵ Mi sa’n chu ar chon kok sa ata thil sahai a sapsua ngai. Mi saloiin chu ar chon kok ata thil saloi a sapsua ngai.

³⁶ “Nangni ki hril, mihaiin chong chanlamboi an insîr murdihai kha, Roirêlna Nikhuaa chu la hril zit an ti.

³⁷ Ni thu khan thiam nang inchang a ta, ni thu ngêtin thiamno nang inchangtir a ti,” a tia.

Irsinsiana thilirkhêl an izong thu

³⁸ Kha lai khan Dân irchutirtuhai le Farisaihai laia mi senkhathaiin a kuang, “Irchutirtu, ni kuang ata irsinsiana thilirkhêl hmu kin nuam e,” an tia.

³⁹ Jisua’n an kuang, “Atûnlai thoiinthar sual tâk le uire hmang ngaihai, irsinsiana thilirkhêl nin izong na! Khannisianlân, deipu Jona irsinsiana vai ti no chu irsinsiana thilirkhêl dang rêng nin kuang pêk ni no ni.

⁴⁰ Jona chu sûn thum le zân thum ngapui sûnga a iom ang khan Mihriam Nâipa hi sûn thum le zân thum irnêng sûnga a iom hrang a ni.

⁴¹ Roirêlna Nikhuaa chu Ninevi khuaa mihai kha ngîr an ta, thiamno nangni inchang an ti; anni chu Jona thu insîr an inhriata, an sualhai ata an irlet tâk sikin; nangni ki hril, Jona nêka lian ual hin a om.

⁴² Roirêl Nia chu Seba rêngnu kha ngîr a ta, atûnlai mihai leh hin thoi a ta, thiamno inchangtir a ti; rêng Solomona vârna irngaitua hrang luan kôlkung ata a honga; irngai u ta, Solomona nêka roiinpui ual hin a iom kêng!

Ramilhli hong kîr thu

⁴³ “Ramilhli chu kha mi sûng ata a suakin chu irngam hmun zongin tui boina hmunhaia a chaia, khannisian hmu ta maka.

⁴⁴ Khanchu, ‘Ki isuaksan tâknaa khan kîr nôk chian ki ti,’ a tia; a va tungin chu rongrala phît infâi diamin a va hmua.

⁴⁵ Khanchu, a fea, ama nêka sual ual ramilhli sari dang a hong hruaia; an lûta, kha khan omhmun an khuar tâka. Kha mihriam om lam kha, matona nêkin a siat ok tâka. Khaang dênin, atûnlai thoiinthar sual tâkhai chunga hin la om a ti,” a tia.

Jisua nu le a urênghai

⁴⁶ Mipuihai kuang thu an sîr lai khan a nu le a urênghai kha ama chongpui tumin pên tiang an ngîra,

⁴⁷ Mi inkhatin a kuang, “Ni nu le ni urênghaiin nang chongpui tumin pên tiang son nang an nghâk kêng,” a tia.

⁴⁸ Jisua’n a kuang, “Tu mo ka nu? Tu mo ki urênghai?” a tia.

⁴⁹ Khanchu, a irchutirhai tiang a kut a phara, “En u ta, ka nu le ki urênghai hi:

⁵⁰ Tukhom ka Pa irvâna mi nuamlam thotuhai hi ki urênghai, ki farnuhai, ka nuhai an ni,” a tia.