MATHAIA 11 - PATHIAN LEKHABU IRTHIANG C.L. Bible (BSI)

Baptistu Johana ata irchutirhai

¹ Jisua’n irchutir sômhleihnihai kha irchutirna thuhai a pêkhai zoiin, khatak ata Galili ram khuahaia irchutir le thu hril hrangin a fe tâka.

² Baptistu Johana’n Jisua sintho hai kha intângna in ata a lei inhriatin, a irchutir senkhat Jisua kuang a tîrhaia.

³ Jisua kuang, “Ni hril roh, Johana’n a zuang hrangtu a iti kha ni ini ma ni? A ninole, mi dang kin la itûng hrang ma ni!” an tia.

⁴ Jisua’n an kuang, “Fe nôk ta unglân, thil nin ihmu le nin inhriat hi Johana va hril roi!

⁵ Mitchohai an hmu thei ta, ke’nbâi hai an fe thei ta, phârhai an irthiang ta, kuarsêthai khom an inhriat thei ta, mithihai kaithoiin an om ta, inrianghai laia Thurchi Sa insîr a ni ta.

⁶ Tukhom ki chunga lunghlâna nei loihai chu an vân a sa,” a ti pea.

⁷ Johana irchutirhai kha an fe zoiin chu, Jisua’n mipuihai kuang khan, Johana thurchi an sîra: “Johana kuang ramchâra nin fe laia khan imo hmu hranga nin itûng kha? Phâivua’n lâiluang a isêm inhnîng kha ma ni?

⁸ A ninole, i en hrang taka nin ife ma ni? Mi, puan irnêm sil ma ni? Khaanga puan sil ngai mi chu rêng ina kêng an om ngai!

⁹ Ni hril roi, i en hranga nin ife ma ni? Deipu en hranga ma ni? O a ni, khannisian, deipu nêka lian ual tak nin ihmu kha.

¹⁰ Kha Johana kha kêng Pathian Thubu’n, ‘Irngai ta, ki tirtôn ni matona ki lei tîr, ama khan ni lampui lei siam a ti,’ a lei iti kha.

¹¹ Thudik nangni ki hril, Baptistu Johana nêka lian ual tûte la’rsiang ngai mahai, khannisian irvân Rama mi chîn tak khom Johana nêkin chu a roiinpui ual.

¹² Baptistu Johana’n thurchi an sîr lai ata a vuan sûn ten khom irvân Ramin tuangna irkhêl a tuang ngaia, mi kôkhelhaiin kha ram kha lâk an tum ngai.

¹³ Deipuhai murdi le Mosia Dân thu khan Johana zuang om dênin Ram thurchi an insîra;

¹⁴ nin iam nuamin chu, a zuang hrang thu inpuanga lei om Johana hi Elija a ni.

¹⁵ Irngai roi, mikuar nei murdi’n chu!

¹⁶ “Atûnlaia thoiintharhai hi i leh mo ki irkhek ta hrang? Nâipang bazar hmuna toihai ang kha an ni. Pâl khatin pâl khat danghai an lei khêk pehaia.

¹⁷ ‘Irneina theihle nangni kin tum pea, khannisian, lâm mak chêi! Lusûn hla kin sak khomin chap mak chêi!’ ti ang kha an ni.

¹⁸ “Johana chu a zuanga, bu a ngheia uain in maka, mi tinin, ‘Ramilhli ichel kêng,’ an tia.

¹⁹ Mihriam Nâipa chu a zuanga, a fâka, a ina, mi tinin, ‘Hi mi hi en u ta! Bu’n dupa, uain indupa, khâzana irfuangtuhai le mi sualhai rualpa so!’ an tia. Khannisian, Pathian vârna chu a dik ti a raa khan inlangin a iom a ni,” a tia.

A iamloi khuahai

²⁰ Jisua’n sinirkhêl a thôna khuaa mihai khan an sual ata irlet mahaia, khasikin kha khuahai kha a ngoa.

²¹ “Korazin! ni chung a rik e! Bethsaida, ni chung a rik e! Nangnia sinirkhêl sinhai kha Tura le Sidon khuaa sin, ni ta sian chu bora puan silin irvut irpolin an sual ata irlet ta an ti.

²² Thudik nangni ki hril, Roirêl Nikhua chu nangni ituang nêkin chu Tura le Sidon mihai ituang chu a zâi om ual a ti.

²³ Nangma Kapernaum khom irvân dênin inpâk ni ini hrang ma ni! mithi khua dênin ni zu fe hrang sôn mak che! Nangmaa sinirkhêl isinhai kha Sodom khuaa sin ni sianlân chu, a vuan ten hin la om mai a ti.

²⁴ Nang ki hril, Roirêl Nikhuaa chu ni ituang nêkin chu Sodom khua ituang chu a zâi om ual a ti,” a ti.

Ki kuang hong unglân sôl irngam roi

²⁵ Kha laia khan Jisua’n “Ka Pa, irvân le irnêng Rengpa! Mi vâr, mi thiamhai laia ni iip kha mi inmôlhai laia nin puang sikin, lômthu kin sîr a ni.

²⁶ A ni, ka Pa, khaanga tho kha ni nuamlam tak a ni,” a tia.

²⁷ Thil tinrêng ka Pa’n a ni pêk ta. Pa ti no’n chu tûte’n Nâipa inhre mahai. Nâipa bana chu tûte’n Pa khom inhre mahai, Nâipa’n a inpuangnahaia ti no’n chu.

²⁸ “Nangni sinsôl le puakrik pêl murdihaio, ki kuang hong unglân, keima’n nangni irngamtir ki ti.

²⁹ Ki ringkol irbun unglân, ki kuang irchu roi, thuhnuairôl tak le irngaiintôm tak ki ni sikin, Khanchu nin irtha ta hrangin irngamna hmu nin ti.

³⁰ Ki ringkol chu a hoia, ki puak khom a izâng a ni,” a tia.