MATHAIA 1 - PATHIAN LEKHABU IRTHIANG C.L. Bible (BSI)

Jisua Krista Irchibulhai

¹ Jisua Krista chu Davida irchi a nia, Abrahama ata an irkai lam chu hiang hin a ni.

² Abrahama’n Isaka a neia, Isaka’n Jakoba, Jakoba’n Juda le a urênghai a neia,

³ Juda’n Pereza le Zera (an nu chu Tamari a ni) a neia, Pereza’n Hezrona a neia; Hezrona’n Arama a neia.

⁴ Arama’n Aminadaba, Aminadaba’n Nasona, Nasona’n Salmona,

⁵ Salmona’n Rahabi ata Boaza a neia, Boaza’n Ruthi ata Obeda, Obeda’n Jesaia a neia.

⁶ Jesaia’n rêng Davida a nei. Davida’n Uria dôngma ata Solomona a neia.

⁷ Solomona’n Rehoboama, Rehoboama’n Abija, Abija’n Asa.

⁸ Asa’n Jehosafata, Jehosafata’n Jehorama, Jehorama’n Uzia,

⁹ Uzia’n Jothama, Jothama’n Ahaza, Ahaza’n Hezekia.

¹⁰ Hezekia’n Manasea, Manasea’n Amosa, Amosa’n Josia.

¹¹ Babulon-a sala intâng lai vêl khan Josia’n Jehoiakina le a urênghai a neia.

¹² Babulon-a sala intâng hruai hnungin Jehoiakina’n Sealtiela a neia, Sealtiela’n Zerubabela a neia.

¹³ Zerubabela’n Abiuda, Abiuda’n Eliakima, Eliakima’n Azora.

¹⁴ Azora’n Zadoka, Zadoka’n Akima, Akima’n Eliuda.

¹⁵ Eliuda’n Eliazara, Eliazara’n Mathana, Mathana’n Jakoba.

¹⁶ Jakoba’n Josefa, Mari pasal kha a neia; Mari ata Jisua Krista an iti kha, a zuang suak tâka.

¹⁷ Khanchu, Abrahama le Davida kâra irlo sôm irlo minli an oma, Davida le Babulon-a sala intâng hruai kâra khom irlo sôm irlo minli an om a ni. Kha rengata irthokin Messia suak dênin irlo sômhleiminli a ni.

Jisua suak thu

¹⁸ Jisua Krista zuang suak lam chu hiang hin a ni, a nu Mari kha Josefa dôngma hual a nia, an omsuam mân Irtha Irthiangin nâi an vongtir ti inhriat a ni tâka.

¹⁹ A pasal hrang Josefa chu mi fel tak a nia, mualinphoitir nuam maka, inrûkin mâk a tuma.

²⁰ Khannisianlân, kha thu kha ar ngaitua laiin, irngai ta, ar manga Rengpa itîr vântîrtôn a hmua, “Josefa, Davida nâipa, ni dôngma hual Mari kha a nei chitinrîm no ro, a nâi vong chu Irtha Irthiang ata kêng, a tia.

²¹ Nâipasal nei a ta, ar hming Jisua phua ni ti, Ama khan a mihai kha an sualhai ata a isaninhring hrang a ni,” a tia.

²² Rengpa’n Deipu bâia,

²³ ‘Irngai ta, dôngmate irthiang khan nâi vong a ta, nâipasal nei a ta, A’rhming Imanuela,’ phua an ti. (kha kha “Ei kuanga Pathian a om,” tihna a ni.) tia a insîr kha a hong tung theina hrangin hihai murdi hi a hong iom a ni.

²⁴ Josefa in kha a hong hara, Rengpa Vântirtôn thupêk angin a oma, Mari kha dôngma’n a nei tâka;

²⁵ Khannisianlân nâipasal a nei mâka chu zâlpui suam ma, khan Josefa’n ar hminga JISUA tiin nâi irhminga khan a phua tâka.