MARKA 7 - PATHIAN LEKHABU IRTHIANG C.L. Bible (BSI)

Pi pu thumâk

¹ Khan, Jerusalem rengata hong Farisaihai le Dan irchutirtuhai Jisua kuang an hong irbuka.

² Khahai khan Jisua irchutirhai senkhatin kut sôp loia fâk an izong an lei hmu tâka.

³ (Farisaihai le Judahaiin chu an pi le pu thumâk zômin an kut fâi takin an sôp no’n chu fâk zong ngai mahai.

⁴ Khan bazar ata an kîr nôk khomin tui an irsil bak no zelin chu fâk zong ngai mahai. Pi le pu thumâk dang tamtak intûk ngit khom an om sa. Khahai kha khilât, bêlhai, sumsen bêlhai le zâlhmunhai sôpfâi hrang tituhai an ni.)

⁵ Khasikin, Farisaihai le Dân irchutirtuhai khan, “I sika mo ni irchutirhaiin pi le pu thumâk zôm loiin kut sôp loia fâk an izong ngai hi?” tiin an irdona.

⁶ Jisua’n an kuang, “Isaia’n nin chungthu a lei ihril kha a dik: vârirlet nin ni, ‘Hi mihai hin an bâiin an ni chôiindôma, Khannisianlân, an lungrîlin chu an ni hla vit.

⁷ An irchutirnaa mihriam thupêkhai an irchutir sikin. An ni biakna hi a korong a ni,’ ti irziak ang khan.

⁸ “Pathian thupêkhai chu nin hnôla, mihriam thumâkhai nin ipom a ni hi,” a tia.

⁹ Khan, ama ngêtin an kuang, “Nin thumâk nin zôm theina hrangin Pathian thupêkhai nin ihnôl hi chu lungvâr chu nin nei hi te.

¹⁰ Mosia’n, ‘Ni nu le pa mahrip tho roh, tukhomin a nu mani, a pa mani, hrilinsiattu chu thi ngêt ri se,’ tiin thu a lei pêka.

¹¹ Nangni rêkin chu hiang hin nin ti ngai, ‘Mi’n a nu mani, a pa mani, kuang, ni ni hmangna hrang hi ‘Korban’ a ni ta,’ a ti’n chu, (Hi hi Hebrai chongin Pathian kuanga pêk tihna a ni)

¹² a nu mani, a pa mani ta hrangin ite sin phal ta mak chêi;

¹³ hianga thumâk nin irchu thiai sikin Pathian Thu nin irhmangtir ngai a ni. Hianga sin nin itho ngai, a dang khom tamtak a la om sa,” a tia.

Mihriam porinchetirtu

¹⁴ Khan mipuihai kha a koi bukhai nôka, an kuang, “Nin rêngin ki thu hi irngai unglân, hi hi inhrenfel roi;

¹⁵ Pên tiang rengata mihriam sûnga lût ama porinchetir thei ite om mah, mihriam sûng rengata suak ngaituana hin kêng mihriam a porinchetir ngai.

¹⁶ Tukhom inhriatna hranga mikuar nei murdi’n chu irngai ri sehai,” a tia.

¹⁷ Khan mipuihai chu in sûnga a lûtsanhai hnungin, a irchutirhaiin chongirkhek thu kha an irdon infela.

¹⁸ Khan, Jisua’n an kuang, “Nangni khom hi dôr hi nin la inhriat thei loi mo? Hi hi inhre mak chêi mo? I khom pên tiang rengata mihriam sûnga lût hin ama porinchetir thei mah;

¹⁹ a milung sûnga lût loiin a phînga a lûta, a suakpai sikin, ti hi nin inhriat no ma ni?” a tia. (Kha kha Jisua’n fâk hrang tinrêng a’rthiang a tihna a ni.)

²⁰ Khan, ama ngêtin, “Mihriam sûng rengata hong suak khan kêng mihriam a porinchetir ngai.

²¹ Mihriam lungrîl sûng rengata kêng ngaituana sual a hong suak, kha ngaituana sual khan kêng irditna, inruna, irthatna,

²² uirena, irzukna, sual tinrêng tho nuamna, irhuangna, hurna, hnarsana, nuisona, lârirpâkna le invêtna hai hi an tungtir ngai.

²³ Kha sualhai murdi kha sûng tiang rengata a hong suaka, mihriam chu a porinchetir ngai a ni,” a tia.

Suro Foiniki nupangnu iamna

²⁴ Khanchu, a thoia, Jisua’n Galili ram a mâksana, Tura le Sidon hualsûnga a fe tâka. In inkhata a lûta, tûte inhriat nuam maka, khannisianlân, irthup thei mah.

²⁵ Khanchu, nupang inkhat, a nâinu ramilhli ichel pe a oma, kha nu khan a thurchi an hriata, a ke bula a van boka,

²⁶ Kha nupangnu kha Grik mi a nia, irzirna tiang chu Suro Foiniki a ni. Khanu khan, a nâinu sûnga ramilhli inhnot suak hrangin Jisua a ngêna.

²⁷ Khannisianlân, Jisua’n a kuang, “Nâihai khop bak ri sehai, nâihai bai lâkpai pea, uihai kuanga pêk chu dik mah,” a tia.

²⁸ Nupangnu khan a kuang, “Rengpa ni chu a ni, khannisianlân, maichâm hnuaia uihai khomin nâipanghai bai irnôi chu an fâk ngai khate,” tiin a dona.

²⁹ Khan, Jisua’n a kuang, “Kha ni chongbâi sika khan fe nôk tan lân, ni nâinu kha ramilhli khan a suaksan ta,” a ti pea.

³⁰ Khan a ina a fe tâka, a nâinu kha ramilhli’n a suaksan zoia zâlhmuna zâlin a va hmua.

Kuarsêt chong theiloi indam

³¹ Khan, Tura ram rengata a suak nôka Sidon khuaa lûtin Dekapoli ram hro’n Galili dîl kha a tung tâka.

³² Khan, mi inkhat kuarsêt, chong khom theiloi hi a kuang an hong hruaia, kha pa chunga a kut irnghat hrangin Jisua kha an ngêna.

³³ Khaang khan, kha pa kha, Jisua’n mipui lai ata a bingin a hruaia, a kutpârhaiin a mikuar sûng an khîk pea, an chila a milei khom an them pe sa.

³⁴ Kha hnung chu Jisua’n irvân tiang tangin a phûk an sum huta, a kuang “Efatha,” a tia. (Kha kha Grikin, “Lei irhong roh,” tihna a ni).

³⁵ Khanchu, a mikuarhai a hong irhonga, a milei irkhitna khom a hong irsûta, fel takin a chong thei ta.

³⁶ Khan, Jisua’n mipuihai kuang, tûte hril viat loi hrangin thu a pêka, khannisianlân, a khap lia an inpuang li lia tâka.

³⁷ An hriat murdi’n ar khêl an ti tak taka, “A isin tinrêng hi ar khêl a ni! kuarsêthai khom an vâr pehaia, chong theiloihai khom a inchongtir thei hi!” an tia.