MARKA 4 - PATHIAN LEKHABU IRTHIANG C.L. Bible (BSI)

Fachî inthektu chongirkhek

¹ Khan, dîl kôla khan a’rchutirhai nôk tâka; mipui tamtak an hong irbuk nôk tâka, irkuanga khan a chuanga, a toia; mipuihai kha dîl kôl muanga khan an oma.

² Chongirkhekin thu tamtak ar chutirhaia, ar chuhai lai khan an kuang,

³ “Irngai u ta, voikhat chu mi inkhat hi fachî inthek hrangin a fea;

⁴ a hong inthekin chu senkhat lampuia a tâka, vahaiin an hong fâkpai ta.

⁵ Senkhat lungpherpha chung irnêng irphânna hmuna a tâka, irnêng irsa maka, a hong mông lata.

⁶ Khan misa a hong irsâng ualin chu, a em inchâra irzung a thâk thei no sikin, a ram nôk chit ta.

⁷ Senkhat ilhling laia a tâka, ilhling kha a hong irsôna, a dîp irhmanga, ra thei ta mah.

⁸ Senkhat chu irnêng sana hmuna a tâka, a hong môngin a hong irsôna, a ra tâka; a bâk sômthum, a bâk sômruk, a bâk irzakhatin a hong inpungtir ta,” a tia.

⁹ Jisua’n, “Tukhom inhriatna hranga mikuar nei murdi’n chu inhre ri sehai,” a tia.

Chongirkhek a ihmang nasan

¹⁰ A binga a om hnungin chu sômhleihnihai le a danghai khan chongirkhek thu kha an irdon infela.

¹¹ Jisua’n chu an kuang, “Pathian Ram thurîl kha nin kuang pêk a nia; mi danghai ta hrangin chu chongirkhek vaiin insîr a ni.

¹² ‘En enin hmu infel no nihaia, Irngai irngaiin ar fêna lam chang inhre no nihai, khano’nchu, hong irhei an ta, ngaidam nina an ti; ti ang kha a ni theina hrangin,’” a tia.

Chongirkhek hrilfiana

¹³ Khan, Jisua ngêtin an kuang, “Hi chongirkhek hi nin inhriat infel thei loi ma ni? Khaang khan a ni’n te, itin mo chongirkhek danghai ngân khom kha nin inhriat thei hrang?

¹⁴ Fachî inthektu khan Pathian Thu a inthek a ni.

¹⁵ Lam kôla tâkhai kha hiang hi an ni; thu kha an inhriatin Setana a hong lata; an fachî inthek kha a lâkpai pehai zôi ngaia.

¹⁶ Khaang dênin, lungpherpha hmuna inthekhai kha hiang hi an ni, thu kha an inhriat zoi le raifân takin an pom zôi zela;

¹⁷ Khannisianlân, annia khan irzung tha maka, zoro sôtnote vai a diara, kha hnungin chu thu sika intakna mani, dengtheina mani, a hong om le chu an rîl zôi zel ngai a ni.

¹⁸ Hloiilhlingnei kâra inthekhai chu hihai hi an ni: Thu chu an inhriata,

¹⁹ khannisian, rammual intakna hai, irchon irzukna hai, irzukna dang danghai, a hong lûta, thu kha a hong dîp irhmanga, a ira ta ngai loi a ni.

²⁰ Irnêng saa inthekhai chu, thu kha inhriata, an poma, a bâk sômthum, a bâk sômruk le a bâk irzakhata rahai hi an ni,” a tia.

Meiser irkhu

²¹ Jisua ngêtin an kuang, “Meiser chu a sianaa sia loia khamphulu hnuaia mani, zâlhmun hnuaia mani sia hrangin an hong inchok ngai ma ni?

²² Inpuang loi hranga thup ite om maka, inlang loi hranga thuppai khom ite om sa mah.

²³ Irngaina mikuar nei murdi’n chu irngai ri se!” a tia.

²⁴ Khan an kuang, “Nin thu irngai kha irdîn dêkin irngai roi, mi nin irkhîna ngêt khan, nangni irkhîna’n hmang an ti, nangni bôk ual viat an ti.

²⁵ Tukhom a nei ka chu bôk sa an ta, a nei loi chu a ineisun khom lapai pe an ti,” a tia.

Chimu chongirkhek thu

²⁶ Jisua’n an kuang, “Pathian Ram chu hiang hin a ni, mi’n loia chîmu an theka.

²⁷ Zâna a zâla, sûna a thoia, chimu kha itika hong mônga, hong irsôn mani tih a inhriat loi ang hi a ni.

²⁸ Irnêngin a kung kha a’rsôntira, ra an neitir ngai, a maton taka a kung a hong suaka, kha hnung a vûia, a hnungkhôn taka a’rmalpum kha a hong suaka.

²⁹ Bu kha a hong hmin tâkin chu kôite lâkin bu ât a hong iphut ang hi a ni,” a tia.

Ancham ru chongirkhek

³⁰ Jisua’n an kuang, “Pathian Ram chu i leh mo ei irkhî hrang tâk, i chongirkhek hmangin mo ei insîr infel hrang?

³¹ Hiang hi a ni, mi’n ancham ru rammuala, chimu tinrênghai laia a chîn tak a lâka, irnênga a tua.

³² Khannisian sôtnote hnunga a hong mônga, chimu tinrênghai laia a lian tak a hong ni ta; ôn lian tak tak a hong neia, chunglêng vahai khomin an irbûk irbei thei ngai ang hi a ni,” a tia.

³³ Khaang chongirkhek tamtak hmang khan an inhriat thiam hrang dôrin thu kha an kuang an sîr ngai.

³⁴ Chongirkhek no’n chu an kuang thu insîr ngai ma, a irchutirhai kuang chu itinrêng a hrilfiah ngai a ni.

Jisua’n phâivopui a hal indâi

³⁵ Kha nî dêna khan khohloi a hong ni’n chu, Jisua’n irchutirhai kuang “Dîl râl tiang son lei kâi rei,” a tia.

³⁶ Kha hnung chu mipuihai kha an mâka, Jisua lei toina irkuanga khan irchutirhai kha an lûta, ama khom an hruaia. Irkuang dang khom an om sa.

³⁷ Irningloiin, phâivopui hrât tak a hong thoa, tui irsok kha irkuanga a lûta, a sip vâng vâng tâka.

³⁸ Jisua chu lukham khamin irkuang irmei tiang khan a lei ina. An kai thoia, “Irchutirtu kin irhmang hrang hi poi ni iti loi ma ni?” an tia.

³⁹ Khanchu a hong thoia, phâivua kha a hala, dîl kuanga khan, “Dâihrekin lân, om chian chian roh,” a tia. Phâivua kha a hong monga, a dâidup ta.

⁴⁰ Ama khan an kuang, “Ithoa mo ang dôra nin ichi? iamna zel nin la inei loi ma ni?” a tia.

⁴¹ Khanchu an chi tak taka, “Hi mi hi tu mo a ini hi, phâivua le dîl khomin a thu an izôm hi?” an irtia.