MARKA 16 - PATHIAN LEKHABU IRTHIANG C.L. Bible (BSI)

Jisua thoinôkna thu

¹ Sabat nî a hong hekin Magdala mi Mari, Jakoba nu Mari, Salomi hai khan, Jisua ruak pol hrangin sahriak mirimhoi an irchôka.

² Pathianni zînga misa suak hnungin thâna an va fea.

³ Lampuia an fe laiin, “Thân bâia lung kha tu mo nir hlumpai pe hrang tâk?” an irti lai takin.

⁴ Lung lian tak a nia, an hong tanga lung kha irhlum saiin an hmu tâka.

⁵ Thân sûnga an lûta, ruatharte inkhat puan chek sil chang tianga toi an hmua, an chi tâka.

⁶ Khanchu, ama khan an kuang, “Lunginzîng no roi, Nazaret Jisua, an ihembe kha, nin izong ni a ta, hin om ta mah, a thoi nôk ta; en u ta, an inzâlna hi.

⁷ Atûn chu fe unglân, a irchutirhai le Petera kuang khan, nangni a ihril tâk ang khan Galili-a fe masa a ta, kha khan hmu nin ti, tiin va hril roi,” a tia.

⁸ Khanchu, thân ata kha an suaka, beidong le chi pumin an intân pat ta. An chi hrai sikin tûte kuang insîr mahai. [

Magdala mi Mari kuang Jisua an lâr

⁹ Khan, Pathianni zînga a thoinôka khan, Magdala mi Mari a phîng sûnga irthokin ramilhli sari a inhnot suakpai penu kuang a masa takin an lâra.

¹⁰ Mari khan Jisua chanpuihai a va hrila. Irngaiinsia le chapin an lei oma;

¹¹ Mari’n, “Jisua a hring nôka, hmu khom ki hmu lele,” a ti pehaia; an inhriat khomin taksôn mahai.

Irchutir inhni kuang Jisua an lâr

¹² Kha hnungin, Jisua kha hmêl danglam irputin mi inhni an ram tiang an fe laiin an kuang an lâr nôka.

¹³ Khan, an hong kîra irchutir danghai an hong inhrila, khannisian tak lei sôn mahai.

Irchutir sômhleikhathai kuang an lâr

¹⁴ A hnungkhôn taka chu irchutir sômhleikhathai bu an nêk lai takin an kuang an lâr nôka. A thoinôk hnunga a hmuhai chong taksôn loiin an milung an inngar sik le iamna reng an nei no sikin, a halirchuhaia.

¹⁵ Jisua’n an kuang, “Rammual pumpuia fe unglân, thil siam murdihai kuang Thurchi Sa hi insîr roi.

¹⁶ Tukhom a iama, baptisma chang chu saninhringin om an ta. A iam loihai chu thiamno changin om an ti.

¹⁷ A iamhai chu sinirkhêl sintheina irtha ipêk ni an ta; ki’rhmingin ramilhli inhnot suak an ta, chong tharin chong an ti.

¹⁸ Mirûlhai an kutin chel an ta, thina tûr i ang khom in an ta, ite ti no ni; damloihai chunga an kut irnghat an ta, dam thiai an ti,” a tia.

Jisua irvâna a kâi thu

¹⁹ An kuang thu an sîr zoiin chu, Rengpa Jisua kha irvâna ihruaiin a om tâka, Pathian chang tiang a hong toi tâka.

²⁰ Irchutirhai khom kha an fe suaka, hmun tina thu an insîr tâka, Rengpa khomin a thophaia, an thu’nsîr kha a dik tiin le an sinirkhêl tho khom an det pehai thiaia. Amen.]