MARKA 15 - PATHIAN LEKHABU IRTHIANG C.L. Bible (BSI)

Jisua Pilata makunga an hruai

¹ Khan, zîng a hong ni’n chu, Ochai inlalhai chu, upahai, Dân irchutirtuhai le roirêltuhai murdi leh an irhmua, an chonga. Jisua kha an khita, an hruaia, Pilata kuta an bâng ta.

² Pilata’n a kuang, “Judahai rêng mo ni ni?” tiin ar dona. “Ni nih, ni ni ti khate,” tiin a sâma.

³ Ochai inlalhai khan lam iza’n Jisua kha an hnôla,

⁴ Khasikin, Pilata’n Jisua ar don nôka, “Ni ni sâm loi hrang mo? irngai ta, pualoi nang an intumna san hi,” a tia.

⁵ Jisua’n a i ang khomin a sâm no sikin, Pilata irngai ar khêl ok.

Jisua thi hranga roi an rêlna

⁶ Khan, Pilata’n Ferkân Kût zoro rikipin intângna ina om inkhat mipuihaiin an inuam tak an sua pehai ngai.

⁷ Kha zoroa khan mi inkhat ar hming Barabba kha, mi pualoihai leh mi an that sika intângna ina om a ni.

⁸ Khan, mipuihai an hong fea, an ta hranga a itho pehai ngai anga tho hrangin an ngêna.

⁹ Khanchu, Pilata’n, an kuang, “Judahai rêng hi nangni insua pe inlân nin nuam mo?” a tia.

¹⁰ Ochai inlalhai khan an hnarsa sika Jisua kha a kuang an hong hruai a nih ti an hriat infela.

¹¹ Ochai inlalhai khan mipuihai chu Barabba insua pehai hrangin an inphûthaia.

¹² Khanchu, Pilata’n an kuang, “Khante, Judahai rêng nin ititu hi, imo ki ilo hrang tâk?” tiin ar donhai nôka.

¹³ Anni khan, “Krosa hembe ro!” tiin an khêk nôka.

¹⁴ Pilata’n an kuang, “Ithoa mo? Imo a itho insual?” tiin ar donhaia. Khannisianlân, anni khan, “Krosa hembe roh!” tiin an khêk inring uala.

¹⁵ Khanchu, mipuihai milung inhoi a nuam sikin, Barabba kha an sua pehaia. Khan, Jisua kha sipaihai an zêmtirhai zoiin chu Krosa hembe hrangin a pêk tâka.

Sipaihaiin Jisua an soisak

¹⁶ Khan, sipaihaiin Jisua kha Ramoptu in Praitoriana an hruai inlûta, an chanpuihai murdi an koi buka.

¹⁷ Khanchu, songkol irfual senduk an innghâktira, ilhling lukhum an phana, an inkhumtir ta a ni.

¹⁸ Kha hnung chu chubai an mûka, “Juda hai Rêng, hring sôt roh,” an tia.

¹⁹ A lua khianghrolin an vîka, an inchila, khûksadelin chubai an mûka.

²⁰ Khan, an phengsan zoiin chu songkol irfual senduk kha an hlîk pea, ama songkol dên kha an innghâktir nôka. Kha zoiin chu Krosa hembe hrangin an hruai suak ta.

Jisua Hembea a om thu

²¹ Khan, lampuia mi inkhat ar hming Simona an irtongpuia, kha mi kha ram rengata khopui hong pan a nia, sipaihaiin Jisua Kros irput hrangin an dândea (Simona kha Kurini mi, Alexander le Rufa pa a ni).

²² Khanchu, Jisua kha Golgotha an iti hmuna an hruai ta, kha kha “Luru hmun,” tihna a ni.

²³ Kha hmuna khan Jisua kha Uain, Mura leh irpol an pêka, Khannisian, in nuam mah.

²⁴ Kha zoiin chu Krosa an hembea, a puansilhai kha an irsema, an dong hrang chit inhriatna hrangin tâ an sâna.

²⁵ Jisua an hembe zoro kha zîng dâr kuak vêl a ni.

²⁶ Khan, an hnôlna kha lekha’n an irziaka, “Juda hai Rêng,” tiin a lu chunga an târa.

²⁷ Khan, Jisua le hrâtlaksong, mi inhni an hembe sa, a chang tiang inkhat, a vei tiang inkhat.

²⁸ Khaang khan, Pathian thubu’n “Ama khom mi sualhai laia tep sain a om ta,” a iti kha a hong tung ta.

²⁹ Khan, mi ar lôi murdi’n an lu inthikin Jisua kha an êroa, “O hoi! Tempil set ni ta, sûn thum ni’n ni inding nôk hrang na!

³⁰ Kros ata zuang chumin lân, irzôk ta ro ba,” an tia.

³¹ Khaang dênin Ochai inlalhai le Dân irchutirtuhai khomin Jisua kha an êroa, “Mi danghai lak an zôktira, ama chu zôk thei maka!

³² Tho atûn Mesia, Israelhai rêng hi, Kros ata a zuang chum lei en hi rei; Khanchu ama ei iamna hrangin,” an tia. Ama le an hembe mi inhnihai khomin Jisua an êro sa.

Jisua thina thu

³³ Khan, sûn dâr sômhleihnia irthokin khohloi dâr thum ten chu rammual an thim khaka.

³⁴ Dâr thumin chu Jisua kha inring takin a khêka, “Eli, Eli, lema sabakthani?” a tia. (Kha kha “Ki Pathian, ki Pathian, itho mo ni ni imâksan?” tihna a ni.)

³⁵ Kha hmuna ngîr mi senkhatin ama kha an inhriatin, “Irngai u ta, Elija a ikoi kêng,” an tia.

³⁶ Khanchu, an laia mi inkhat an tâna, sponj, uain thûr inchia’n, khianghrolin a târa, a hong in ina, “La nghâk roi, Jisua kha insum hrangin Elija a zuang pe mo lei en rei,” an tia.

³⁷ Jisua kha inring takin a khêka, a hrang a chat ta.

³⁸ Khanchu, Tempila puanzâr kha a chung tiang ata a hnuai dênin a têr thai tâka.

³⁹ Sipai hruaitu kros matona ngîrtu khan Jisua hrang chat kha a hmu’n chu, “Hi pa hi Pathian Nâipa ngêt a ni hi te,” a tia.

⁴⁰ Nupanghai khomin hlatak ata an thîr sa maia, kha laia khan Magdala mi Mari, Jakoba nâipang ualnu, Mari, Josefa nu, Salomi hai an kop sa a ni.

⁴¹ Hi mihai hi Galili rama a om laia ama zuia a sintho ngaihai an ni; ama pâla Jerusalem fe sa nupang dang khom tamtak an om.

Jisua an phûm thu

⁴² Juda hai irtûng nî a nia, (Kha kha Sabat hranga an irsinsiam nî a ni.)

⁴³ Josefa, Arimathai khuaa om, roirêlpu laia kop sa, mi mahripom tak, Pathian Ram sabei mi a ni sa, khohloi tiang a hong ni’n chu, a honga ngam takin Pilata a va lût khuma, Jisua ruak a nghia.

⁴⁴ Pilata’n Jisua thi tâk thu kha an hriatin chu a sân ar ngai ar khêl oka. Sipai irza hruaitu kha a koia, Jisua thina kha a isôt mani ta, a tia.

⁴⁵ Sipai irza hruaitu ata an hriat zoiin chu a ruak kha Josefa a pêk tâka.

⁴⁶ Khanchu, Josefa’n puan irnêm a lâka, a ruak kha an suma, puan irnêm leh a tuama, thân, lung invera an zâltira, thân bâi kha lungin a sîng tâka.

⁴⁷ Khan, Mari Magdala mi le Josefa nu Mari hai khom khan an inzâlna kha an en chiana.