LUKA 7 - PATHIAN LEKHABU IRTHIANG C.L. Bible (BSI)

Sipai irza hruaitu suak indamna thu

¹ Khan, Jisua’n mihai kuang thu an sîr zoiin chu Kapernaum khuaa a fea.

² Rom sipai irza hruaitu suak lung a ithung tak dam maka, a thi vâng vânga.

³ Khan, Jisua thurchi an hriatin chu a suakna kha indam pe ngêt hranga ngên hrangin Juda upahai a tîra.

⁴ Jisua kuang an honga, “Hi mi hi changpui inruk a ni.

⁵ Ei mihai hi lung a thunga, Sinagok khom a ni sin pe a ni,” an tia.

⁶ Khanchu, Jisua kha an pâla a fe sa tâka. In a va tung hrang tôn chu, sipai irza hruaitu chu a rualhai a tîra, “Rengpa intak pu pumin hong no ro, ki in sûng ni lûtna zât ni mak e,

⁷ Khabana keima khom ni kuanga hong hrang khom inruk ni ma ung.

⁸ Kei khom keima nêka lianhai thu hnuaia om ki nia, ki thu hnuaia sipaihai an oma, inkhat kuang, ‘Fe roh,’ ki tiin a fea, ‘Hong roh,’ ki tiin a honga, ki suak kuang, ‘Hi hi sin roh,’ ki tiin a sin ngai,” a tia.

⁹ Khan, Jisua’n kha kha an hriatin kha pa kha a sân a’rkhêl a tia, a’rhei têi tuaia, a zuituhai kuang, “Nangni ki hril, hiang dôra iamna irkhêl hi Israelhai laia tukhom la hmu ma ung,” a tia.

¹⁰ A mi tîrhai kha ina an va kîr nôkin chu, suak kha a damin an va hmu ta.

Jisua’n meithâi nâipa a kaithoi

¹¹ Chomkhat hnunga chu Jisua kha Nain khuaa a fea, a irchutirhai le mipuihaiin an zuia.

¹² Khan, khua dâi mikot an tungin chu, mithi an hong irzôna, meithâinu nâi neisun a ni. An khuaa mi tamtak an hong saa.

¹³ Khan, Rengpa’n a hmu’n chu, kha nu kha lung an kham tak taka, “Chap ta no roh,” a tia.

¹⁴ A va nâia, irlâng kha a chela, a’rzôntuhai khom kha an ngîr tâka, “Ruatharte, thoi roh, nang ki ti,” a tia.

¹⁵ Mithi kha a thoi zôi zela, a chonga, a nu kuang a pêk tâka.

¹⁶ Mi murdi’n an chia, Pathian an inpâka, “Ei laia Deipu roiinpui tak a zuang iom tâk a ni,” an tia; Pathianin a mihai a zuang ihro tâk a ni, an ti saa.

¹⁷ Kha thu kha Judai ram murdia le a kôlvêla Judai ram tina an thang suak tâka.

Baptistu Johana mi tîrhai

¹⁸ Johana irchutirhaiin Jisua thurchi Johana an hrila.

¹⁹ Khanchu, mi inhni Rengpa kuang a tîra, “A zuang hrang Mesia kha mo ni ini, mi dang kin la itûng hrang mo?” tia irdon hrangin.

²⁰ Khan, Jisua kuang an honga, “Baptistu Johana’n a zuang hranga kha ni ini mo, mi dang mo kin la itûng hrang? a ti,” tiin an irdona.

²¹ Kha lai taka khan, Jisua’n mi tamtak damloihai, an natna hai, ramilhli ichelhai an damhaia, mitchohai mit an vâr pehaia.

²² Khan, Johana irchutirhai kuang, “Fe nôk ta unglân, Johana kuang nin ihmu le nin inhriathai va hril roi, mitchohai an hmu thei ta, kholrahai ke’n an fe thei ta, phârhai an irthianga, kuarsêt hai khom an mikuar a vâra, mithihai kaithoi an ni tâka, inrianghai kuang Thurchi Sa hril a ni ta.

²³ Khan, tukhom ki chunga milung irlakna nei loi chu an vân a sa,” a tia.

²⁴ Johana mi tîrhai an kîr hnungin, Jisua’n mipui kuang Johana chungchâng thu an sîra. “I enhoi en hrangin mo ramchâra nin izuang? lailuang phâivua’n a isêm inhnîng mo?

²⁵ I en hrangin mo nin ife suak? puan irnêm sila irvo mo? puan irnêm sil le mi neihai chu rêng ina kêng an iom.

²⁶ I tak en hrangin mo nin ife? Deipu en hrangin mo? A ni khate; nangni ki hril, ama chu deipu nêka roiinpui ual a ni. Hi mi hi a ni hi te.

²⁷ Johana’n hi Pathian Thubua, ‘Irngai ta, ki tirtôn ni matona ki tîr, Ama khan ni matona ni lam siam a ti,’ tia a thurchi an irziak kha.

²⁸ Nangni ki hril, nupang inei laia Johana nêka roiinpui ual om mahai; aniachu, Pathian Rama mi chîn tak khom ama nêkin chu a roiinpui ual,” a tia.

²⁹ Vântânghai le khâzana irfuangtuhai khan Johana thu an inhriatin Pathian sintho dik tak kha pomin a kuang baptisma an chang oka;

³⁰ Farisai le Dân irchutirtuhai chu baptisma kha chang nuam mahai, anni ta hranga Pathian irfûktir kha nuam mahai.

³¹ Jisua’n, “Atûnlai mihai hi i leh mo ki irkhi hrang tâk? I ang mo an ini.

³² Nâipanghai bazar hmuna toia, senkhatin irneina theihle nangni kin tum pea, lâm mak chêia, lusûn hla kin sak khomin chap mak chêia, tia irsamirhlôm ang kha an ni.

³³ Baptistu Johana a zuanga, bu ne maka, uain khom in maka, ramilhli nâi kêng nin tia.

³⁴ Mihriam Nâipa a zuanga, a fâkin a ina, rôlruakpa, khâzana irfuangtuhai le mi sualhai rualpa nin tia.

³⁵ Khannisianlân, a pomtuhai ta hrangin chu, Pathian vârna hi a dik a ni tih inlangna a ni,” a tia.

Farisai Simona ina Jisua thu

³⁶ Farisai inkhatin Jisua bu nêk a koia, Jisua a fea, bu ne hrangin a toia.

³⁷ Kha khua khan nupang sual a oma, Jisua Farisai ina bu a nêk tih an hriatin chu alabastar bûrin sahriak mirimhoi a hong chôia.

³⁸ Jisua hnung tiang a ke bula a ngîra, a chapa, a mit irthîn a kehai a zunga, a samin a huia, a ke kha a tuma, a sahriak mirimhoi kha a pol tâka.

³⁹ Farisai khan a hmu’n chu a milungin, “Hi mi hi deipu dik a ni’n te, a tôntunu, nupang sualzia hi inhria a ti,” a tia.

⁴⁰ Jisua’n a kuang, “Simon, nang hril hrang ki nei,” a tia. Simona’n “Ti ro ba, irchutirtu,” a tia.

⁴¹ Jisua’n, “Mi inhni’n lâkai pe ngaitu kuang sum an tângtira, inkhatin irza ringa, inkhatin sômringa,

⁴² An tuam thei no sikin, a ngaidamhaia, a tu khan mo lungthung ual ni?” a tia.

⁴³ Simona’n a sâma, “Ki iam lamin chu a ingaidam tam ualtu khan,” a tia. Jisua’n, “Ni indik,” a ti pea.

⁴⁴ Khanchu, nupangnu tiang irheiin, Simona kuang, “Hi nupangnu hi ni hmu mo? Ni ina ki honga, ki ke sôpna hrang tui ni pe mak chea, ama hin chu a mit irthi’n ki ke an duia, a samin a huia.

⁴⁵ Nangin ni tum mak chea, ama hin chu a hong lût phut ata ki ke tum hi mong mah.

⁴⁶ Nangin ki lua sahriak ni pol mak chea, ama hin chu ki ke sahriak mirimhoi a ipol a ni.

⁴⁷ Khasikin, nangni ki hril, hi nupangnu hin lungthungna lian tak an langtirnaa hin, a sualna murdi ngaidam a ni tâk tih an lang infel a ni. Khasikin, tukhom ngaidamna tôm ual dongpu’n chu lung a ithungna ar nêp ual ngai,” a tia.

⁴⁸ Nupang kuang khan, “Ni sualna ngaidam a ni ta,” a tia.

⁴⁹ A khalai otpuituhaiin chu, “Tu mo a ini tâk kha, sualhai khom ngaidam thei tâk,” an irtia.

⁵⁰ Khan, nupang kuang khan, “Ni iamna hin nang a isaninhring a ni, irtharngam takin fe ta ro,” a tia.