LUKA 24 - PATHIAN LEKHABU IRTHIANG C.L. Bible (BSI)

Jisua thoinôkna thu

¹ Khan, Pathianni thingchangvârroa mirimhoi an irfûkhai kha chôiin thâna khan an va fea.

² Thân mikot ata lung kha irhlumpaiin, an va hmua,

³ an hong lûtin chu Rengpa Jisua ruak kha hmu ta mahai.

⁴ Khaanga chamai raka an om lai khan, mi inhni puan chek silin an kôla an zuang ngîra.

⁵ An chia, irnênga inbokin an kûn khaka; kha mihai khan an kuang, “Itho sika mo mithi laia mi hring nin izong?

⁶ Hi hin om ta ma? Kaithoi a ni ta Galili rama a om laia nin kuanga a ihril kha inhre mai roi,

⁷ ‘Mihriam Nâipa hi mi sualhai kuta incheltir ni a ta, Krosa hembe an ta, sûn thum ni’n a ithoi nôk hrang a ni,’ a ti ngai khate,” an tia.

⁸ Khan, nupanghai khan a thu’nsîr kha an inhriat suak nôk tâka.

⁹ Thân ata kha an kîra, thil omzia chu sômhleikhathai le mi danghai kuang, kha thu kha an hril ta.

¹⁰ Kha thu, tirtônhai hong hrilpuhai chu, Magdala mi Mari, Joani, Jakoba nu Mari hai le an laia fe sa nupang senkhathai an ni.

¹¹ Khannisianlân, kha thu kha thu dikin le’rngai mahaia, lei iam mahai.

¹² Petera chu a thoia, thâna khan a van tâna, a kûna a zu vêngin chu, puan irnêm sil omhai vai kha a hmuhaia, khanchu, thil om dân kha ar khêl ti pumin in tiang a kîr nôk tâka.

Emmau kho pan rual lefahai

¹³ Irngai ta, kha ni taka khan an laia mi inhni kha khua inkhat Emmau an itia khan fe hrangin an suaka, kha khua kha Jerusalem ata kilometar sômhleikhat vêla hla a ni.

¹⁴ Thil hong tung murdi kha an insîr suama.

¹⁵ Khaanga an insîr suam lai khan Jisua ngei khan a hong nâihaia, an fe suam tâka;

¹⁶ khannisianlân, a hmêl an inhriat thei nona hrangin an mit an vâitir pehaia.

¹⁷ An kuang, “Fe puma nin insîr kha i thu mo?” a tia. Khanchu, ngûi takin an ngîr tâka.

¹⁸ A’rhming Kleopa khan a sâma, “Nangma vai hi ni ni ti, Jerusalem hroa atûnlai thurchi inhre loi chu!” a tia.

¹⁹ Ama khan, “I thurchi mo?” a tia. Anni khan, “Nazaret Jisua thurchi; Pathian le mi murdi mit hmua a thua le a sinthoa deipu sinthothei tak thurchi kha,

²⁰ Ama kha Ochai inlalhai le ei roirêltuhaiin that hrangin an pêka, Krosa an hembe thu kha.

²¹ Keini lakin Israelhai irtantu hrang a ni tih kin lei tûnga. Kha vai kha ni ma, a vuan hin a sûn thumna a ni tâk.

²² Kin pâla nupang senkhathai khan a vuan zîng khan thâna an va fea, chardong an nin lâktira.

²³ A ruak hmu loiin an hong kîr nôka, vân vântîrtôn inlâr kin hmua, khahai khan, ‘A hring nôk ta,’ an ti tiin an hong tia.

²⁴ Kin iompui laia senkhat khom thâna an va fea, nupanghai insîr ang tak khan an va hmua, khannisian ama chu va hmu ta mahai, an tia.

²⁵ Jisua khan an kuang, “Mi’ntohaio, deipuhai thu’nsîr tinrêng iamna tianga beng sêthaio!

²⁶ Krista’n kha thil kha tuangin a roiinpuinaa a lût hrang mo ni ma?” a tia.

²⁷ Khanchu, Mosia ata irphutin deipu murdi thu suiin Pathian Lekha thua, a thurchi irziakna hmun tina a hrilfiah pehaia.

²⁸ An ifena hrang khua an tung tônin, ama chu fe mai hrang angin an langa.

²⁹ Chong bâiin an chela, “Kin kuang riak sa ta roh, an hnung ok tâk, misa khom tâk hrang a ni ta, a inthim hrang tâk kêng,” an tia. Khanchu an kuang riak hrangin a lût tâka.

³⁰ Zân bu an hong ot suama, bai a lâka, sat a vura, a khoia an kuang a pêka.

³¹ An mit kha a hong vâra, a hmêl an inhriat tâka; ama khom an mit hmua ar hmang pat ta.

³² Anni’n, “Lampuia a ni chongpui laia Pathian Lekha thuhai a ni hril lai khan, ei milung a hong vâr ual mo ni ma?” an irtia.

³³ Khanchu, an thoia, Jerusalema an kîr nôka, sômhleikhathai le an rualhai omkhôm kha an hong hmua.

³⁴ “Rengpa chu a hong thoi nôk ngêt a ni, Simona kuang khom a inlâr kêng,” an lei tia.

³⁵ Anni khom khan lampuia thil hong tung le bai a khoia ama an inhriat tâk dânhai kha an insîra.

Irchutirhai kuanga Jisua inlârna thu

³⁶ Kha thu kha an insîr laiin Jisua ngei kha an laia a hong ngîra, an kuang, “Nin chunga irtharngamna om ri se,” a tia.

³⁷ A’rkhêl an tia an chi tak taka, irtha an ihmu an sôna.

³⁸ Ama khan, “Ithoa mo khaang dôra nin ichi? Itina mo nin irngaitua inbuai tâk?

³⁹ Ki kuthai, ki kezaphahai hi en u ta, keima ngei kha ki ni hi te. Ni tôn unglân, en roi; nin ni ihmu ang hin irtha’n taksa le ru nei mak e,” a tia.

⁴⁰ An sîr zoiin a kuthai a kezaphahai an entirhaia.

⁴¹ An lôm hraia chu, la iam ual mahaia, ar khêl an ti lai takin an kuang, “Hin imo fâkrua nin inei?” a tia.

⁴² Nga, rô inhmin bong khat an pêka,

⁴³ A lâka, an makunga khan a fâk tâka.

⁴⁴ Jisua’n an kuang, “Nin laia ki om lai khan hi thuhai lele hi nangni ki hril ngai khate. Mosia Dân bua, Deipu lekhabua, inpâkna hlabuhaia ki Thurchi an lei irziak, hong tung indik ngêt hranga nangni ki lei inhrilhai kha a ni,” a tia.

⁴⁵ Khanchu, Pathian lekha thu inhre thiam thei hrangin an lungrîl an vâr pehaia.

⁴⁶ An kuang, “Krista khan tuang ngêt a ta, sûn thum ni’n mithi lai ata thoi nôk a ti,

⁴⁷ Ama irhmingin irletna le sual ngaidamna thu Jerusalem ata nam tin laia insîr la ni a ti.

⁴⁸ Hi thilhai hi an hriattuhai nin ni.

⁴⁹ Irngai u ta, Pa chonginkung chu nin chunga zuang tîr ki ti. Chung tiang ata sinthotheina nin chunga a chum mâka chu, khopuia hin lei om mai roi,” a tia.

Irvâna Jisua lâk a ni

⁵⁰ Khan, Bethani dâi dênin a hruai suakhaia, a bân an phara, anni kha sat a vurhaia.

⁵¹ Khaanga sat a vur lai khan a’rsenpuihaia, ama chu irvâna hruai kâiin a om tâka.

⁵² Khan, ama chu chubai an mûka, raifân takin Jerusalema an kîr nôk tâka,

⁵³ khan Tempila khan Pathian kuang lômthu insîrin an zoro murdi an hmang ngai.