LUKA 23 - PATHIAN LEKHABU IRTHIANG C.L. Bible (BSI)

Pilata makunga Jisua an hruai

¹ An rêngin an thoia, Pilata kuang Jisua chu an hruai tâka.

² “Hi mi hin ei mipuihai tehel zong hrangin an thorhaia, Kaisara kuang khâzana chôi a khapa, ama hi Rêng, Krista chu, ar ti, ti khom kin inhriat suak a ni,” tiin an hnôla.

³ Pilata’n a kuang, “Judahai rêng mo ni ni?” a tia. Khan, Jisua’n, “Ni ni, ni ni ti khate,” tiin a sâma.

⁴ Pilata’n Ochai inlalhai le mipuihai kuang khan, “Hi mi hi thiamno inchang hranga hin ite a bi hmu ma ung,” a tia.

⁵ Khannisianlân, anni khan, “Tehel zong mi inthorin, Judai ram kho tina mi ar chutir ngai ti kin inhriat, Galili rama a phuta, hin khom a hong itung tâk a ni,” tiin an bei nôk uala.

Heroda makunga Jisua a ngîr

⁶ Pilata’n, kha kha a hong inhriatin chu, Galili mi a ni le ni loi ar dona.

⁷ Heroda biala mi a nih ti an hriatin chu, Heroda kuang a tîr tâka; ama khom Jerusalema a lei om lai tak a ni.

⁸ Heroda’n Jisua thurchi a lei inhriata, Jisua hmu hrang a nuamna, a sân a lei sôt tâk sikin, Jisua a hmu’n chu a lôm oka; a sinirkhêl imo khat hmu khom a sabei sa.

⁹ Thu tamtak ar dona, khannisianlân, i ang khomin sâm mah.

¹⁰ Ochai inlalhai le Dân irchutirtuhai khom an ngîr saa, an sêla.

¹¹ Khan, Heroda khom khan, a sipaihai leh Jisua kha an hmusit tak taka, nuiza siamna’n an hmanga, puan roiinpui tak an siltira, Pilata kuang a tîr nôk tâka.

¹² Pilata le Heroda kha lei irngei ngai mahaia; kha nikhua taka khan chu an irngei ta.

Jisua thi hranga a roi an rêlna

¹³ Pilata khan Ochai inlalhai le Dân irchutirtuhai le vântâng mipuihai kha a koi buka, an kuang,

¹⁴ “Hi mi hi mihai tehel zong hrangin an thorhai, nin hong tia, nin makung ngeia ki’rtipuia, nin ihnôlna thua thilpoi ite a itho hmu ma ung.

¹⁵ Heroda khomin hmu ual mah, ki kuang a hong itîr nôk ta a ni. Irngai roi thina hrang ang dôr ite tho’nsual nei ual mah.

¹⁶ Khanchu, vîk ki ta, insua nôk ki ti,” a tia.

¹⁷ Ferkân kût hruaithe rikipin Pilata’n mi intâng inkhat an ta hrangin an sua pehai ngai a ni.

¹⁸ Khannisianlân, an rêngin khêk irrualin, “Hi mi hi chu thatin lân, Barabba kha nin sua pe roh,” an tia.

¹⁹ Kha mi kha khopuia tehelna sik le mi that sika intângna ina intâng a ni.

²⁰ Pilata khan Jisua kha insua a nuama, an kuang thu an sîr nôka;

²¹ Khannisian, “Krosa hembe roh, krosa hembe roh,” tiin an khêk mur mur tâka.

²² Khan, Pilata’n a voi thumnaa, an kuang, “Itho mo? Imo a tho’nsual? Thina hrang rak ten ite a itho’nsual hmu ma ung; vîk ki ta insua ki ti,” a tia.

²³ Anni khan inring takin an khêka, Krosa hembe hrangin an ngên ngota, an irhai khan an hnêpai tâka.

²⁴ Pilata’n an ingên angin an kung tâka.

²⁵ Tehelna le mi that sika intângna ina mi intâng an ingên kha an suaa, Jisua kha an nuam nuama lo hrangin a pêkhai tâka.

Jisua hembêna

²⁶ Khanchu, sipaihaiin Jisua an hruaia, an fe laiin, Simona Kurini kho mi, thingtâng rengata khopui hong pan an tonga, an chela; Kros an irputtira, Jisua hnunga an infetira.

²⁷ Khan, vântâng mipui tamtak le milung naa chap bop bop nupanghaiin an zui sup supa.

²⁸ Jisua kha anni tiang a’rheia, “Jerusalem nuhaio, ni châ no roi, nangni le nin nâihai ta hrangin chap ual roi.

²⁹ Nupang ching hai, nâivong ngai loihai, nâi don ngai loihai chu an vân a sa e! an ti zoro la hong tung a ti.

³⁰ Kha zoro tika chu mihaiin tâng kuang, ‘Ni del roh,’ ti an ta, mual kuang, ‘Ni’rkhu roh,’ la ti an ti.

³¹ Thing hring lua hiang hin an lo’n te, thing châr len vâng te itin takin mo an ilo hrang?” a tia.

³² Khan, that sa hrangin mi dang, mi sual inhni, a pâlin an hruai saa.

³³ Luru an ti hmun chu an va tunga; khatak khan krosa an hembe tâka; mi sualhai khom kha a chang tiang inkhat, a vei tiang inkhat, an hembe saa.

³⁴ Jisua’n, “Ka Pa, annihai hi ngaidam roh, an sintho hi inhre mahai” a tia. A silkaihai kha tasânin an irsema.

³⁵ Vântâng mipuihai khan ngîrin an thîra. Hruaituhai khom khan, “Mi dang lua an damhai ngaia, Pathian mi’nkung, Krista chu, a ni lele’n teh a bing khomin irdam ri se ba,” tiin an êroa.

³⁶ Sipai hruaituhai khom khan an innuisana, a kuang an fea, zu thûr an pêka,

³⁷ “Judahai rêng ni ni tak takin chu, ni bingin irdam ro ba,” an tia.

³⁸ A chunga khan, “Hi mi hi Judahai rêng a ni,” ti irziak an târa.

³⁹ An hembe sa mi sual inkhatpu khan a chiar khuma, “Krista kha ni ini loi ma ni? Irdamin lân, keini khom nin dam sa ro ba,” a tia.

⁴⁰ Khannisianlân, inkhatpu khan a lei khapa, a halirchua, “Pathian ten lua ni ichi loi mani, irang maia nang an ihrem hi?

⁴¹ Eini ruai hi chu hrem inruk rêng ei ni, ei sinthôna man ei ihmu a ni hi; Ama hin chu ite tho’nsual nei mah,” a tia.

⁴² Khanchu, “Jisua, ni Ram ni tung tika nin hre mai roh,” a tia.

⁴³ Jisua’n a kuang, “Thudik tak nang ki hril, ki kuang a vuan hin Paradisa om sa ni ti,” a tia.

Jisua thi thu

⁴⁴ Khan, sûn dâr sômhleihni vêl ata khohloi dâr thum dênin rammual an thim khaka;

⁴⁵ misa a hong inthim tâka, tempil sûnga puanzâr kha a laia a têr thai tâka.

⁴⁶ Jisua kha inring takin a khêka, “Ka Pa, ki’rtha ni kuta nang kin koltir,” a tia. Kha kha a ti zoiin chu a hrang a chat tâka.

⁴⁷ Sipai irza hruaitu khan thil zuang tung kha a hmu’n chu, Pathian an pâka, “Hi mi hi mi dik ngêt a ni,” a tia.

⁴⁸ Kha thîr hranga mipui hong irbukhai khan thil omzia kha an hmu’n, beidongin an rôp irchu chûmin an kîr nôk tâka.

⁴⁹ A hmêl inhriathai chu hla vita an ngîr chiana, Galili ram ata ama zuipu nupanghai leh khan, kha thil kha an thîr suama.

Jisua an phûm

^50-51 Khan, Judai rama Arimathai khuaa mi, ar hming Josefa a oma. Ama chu mi fel tak, mi mahripom tak, le Pathian Ram zuang tung hrang lei nghâk mi a nia. Roirêlpuhai laia mi ni sa khomsian, an roirêlna le an sintho kha sa tipuihai maka.

⁵² Kha mi kha Pilata kuang a fea, Jisua ruak a va nghia.

⁵³ Khan, Jisua ruak kha a kai thâka, puan irnêmin a tuama, tûte an la inzâl ngai loina lung inver thâna an zâltir tâka.

⁵⁴ Kha nikhua kha Judahai irtûng nî a nia, khannisian Judahai Sabat ni ar phut vâng vâng ta.

⁵⁵ Galili ram ata hong zuitu nupanghai khom khan an zui sa thiai thiaia, thân le a ruak an inzâl lam kha an hmua.

⁵⁶ Khan, an kîra, mirimhoihai le sahriak mirimhoihai an irfûka. Khan, Dân thupêk angin Sabat nî chu an irngama.