LUKA 2 - PATHIAN LEKHABU IRTHIANG C.L. Bible (BSI)

Jisua suak thu

¹ Kha laia khan, rêng Kaisara Augasta’n Rom sorkâr ram op murdia irhming irziak hrangin thu a pêka.

² Hi irteppui masa tak hi Suria rama Kurinia, Ramoptu a ni laia a ni.

³ Mi tinin mâni khua chita irhming irziak hrangin an fea.

^4-5 Josefa khom Davida in sûngkua le a’rchia mi a ni sikin, a dôngma hual Mari inrâi chum te tem leh khan Galili ram Nazaret ata Judai rama, Davida suakna Bethlehem khuaa irhming irziak hrangin an fea.

⁶ Khan Bethlehem-a an om laiin nâi nei zoro’n a hong de tâka.

⁷ Nâi lutîr pasal a neia, puanin a tuama, khualbûka an inleng ta no sikin sa bu pêkna khênga an inzâl ta.

Beralpuhai le vântîrtônhai

⁸ Kha rama belrapuhaiin belra an ena, zâna an riak nghaa.

⁹ Rengpa itîr vântîrtôn an makunga a zuang inlâra, Rengpa roiinpuina khan an kôl kha a êl invâr phuta, an chi tak taka.

¹⁰ Vântîrtôn khan an kuang, “Chi no unglân, irngai roi, mi tin ta hranga Thurchi Sa râifânom tak tak nangni ki zuang intung pe kêng.

¹¹ A vuan hin nin ta hrangin Davida khuaa saninhringtu a suak ta, Reng Krista chu,

¹² Khan, hi hi nin ta hranga irsinsiana hrang chu a ni; nâitesen, puana tuam, sa bu pêkna khênga zâl hmu nin ti,” a tia.

¹³ Voikhat rengin vântîrtôn kôla khan irvân mipuihai an zuang om mur tâka, Pathian an inpâka.

¹⁴ “Anchungtaka khin Pathian roiinpui takin om sianlân, Irnênga a lômhai kuang irngeina lêng ri se,” an tia.

¹⁵ Khan, vân vântîrtônhaiin an rotsan le chu belrapuhai khan, “Thoi, Bethlehem-a fe ei ti, Rengpa’n thu a ni ihril, zuang tung kha lei va en rei,” an tia.

¹⁶ Khanchu inrang takin an fea, Mari le Josefa, sa bu pêkna khênga nâitesen zâl kha an va hmua.

¹⁷ An hmu’n chu nâitesen thurchi vântîrtôn insîr kha an hrila.

¹⁸ An hriatpu dôrin belrapuhai thu’nsîr kha ar khêl an ti tak taka;

¹⁹ Mari khan kha thuhai kha a lungrîla ngaitua’n a vong chiana.

²⁰ Vântîrtôn ihrilhai ang dênin itinrêng an hmu le an inhriat sika khan, belrapuhai khan Pathian chôiindôm le inpâk pumin an kîr nôk tâka.

Jisua irhming an phua

²¹ Khan, a sertan hrang nikhua sûn riat a hong chukin chu, sula a om mân daia angin a lei iphua tâk irhming Jisua ti kha an phua tâka.

Nâitesen Jisua Tempila an hruai

²² Mosia dân anga an irthiang nî a hong chukin chu Josefa le Mari’n an nâite Pathian kuang inhlan hrangin Jerusalema an fepuia.

²³ Rengpa dân thua, “Nâi lutîr pasal ka chu Rengpa dongtum hrang a ni,” ti a nia.

²⁴ Khan, Rengpa Dân angin vasu inhni mani, phervali mani, irbôlna’n an inhlan hrang a ni.

²⁵ Jerusalema khan mi inkhat, ar hming Simeona a oma. Ama kha mi fel le sakhua mi tak a nia, Israelhai irtharngamtir hrangtu kha a thîr maia; a chunga Irtha Irthiang a om.

²⁶ Rengpa chonginkung Mesia a hmu mâka chu thi no ni tih a inkung a ni.

²⁷ Irtha hruaiin Simeona Tempila a fea, Dân anga a chunga tho hrangin a nu le pa’n nâite Jisua kha, Tempila an hongpuia.

²⁸ Simeona’n nâite a poma, Pathian kuang lômthu an sîra.

²⁹ “Rengpa, atûn ni thu ang ngêtin, ni suak hi irtharngam takin ni infetir hrang a ni tâka.

³⁰ Ni saninhringna chu ki mit ngeiin ki hmu tâka.

³¹ Mi tin hmu hranga ni isiam kha.

³² Jentailhai kuang ni vâr inlangtir hrang le ni mi Israelhai roiinpuina hrang chu,” a tia.

³³ A nu le pa khan nâitesen chungchâng a insîr kha ar khêl an ti oka.

³⁴ Simeona khan anni kha sat a vura, a nu Mari kuang, “Irngai roh, Israel laia mi tamtak siata tûk hrang le inngîr suakna hrangin, hi nâite hi inkung a ni, Pathian irsinsiana, mi tamtakin an isêl sup sup hrang ni a ti.

³⁵ Nang khom khandai isun angin ni milung la na a ti, mi tamtak lungrîl sûng inlang la nih a ti,” a tia.

³⁶ Deipu inkhat, ar hming Anna, Fanuela nâinu, Asera nam, a sân a tar tâk a oma. A pasal leh kum sari an irsen hnungin,

³⁷ Kum sômriatminli a meithâi tâka. Ama khan Tempil rotsan loiin bu a nghei hena, sûn zân chongchaiin Pathian a biak ngai.

³⁸ Kha lai khan ama kha a fea, Pathian kuang lômthu an sîra, Jerusalem sansuakna sabeituhai kuang nâitesen thurchi kha an sîr tâka.

Nazaret khuaa an kîr

³⁹ Rengpa dân angin thil an tho zoi zit hnunga khan Galili rama, an khua Nazaret-a khan an kîr nôk tâka.

⁴⁰ Nâitesen khom kha a’rsôn maia, a vâr tîr tîra, Pathian lungkhamna a chunga a om maia.

Nâipang Jisua Tempila

⁴¹ A nu le pahai kha kum tin Jerusalema Ferkân kût hmang hrangin an fe ngaia,

⁴² Ama kha kum sômhleihni a niin, dân angin kût hmang hrangin an hong fepuia.

⁴³ Kût ar zoiin chu, an kîr tâka, nâipang Jisua chu a nu le pa inhre loiin Jerusalema a la riaka.

⁴⁴ A rualhai laia fe ni a ti; tiin sûn khat an fe hnungin, an urênghai le an rualhai kuang an zonga.

⁴⁵ Khan khom hmu mahaia, zong pumin Jerusalem tiang an hong kîr nôk tâka.

⁴⁶ A sûn thum ni’n chu Tempila, irchutirtuhai kuang lei toiin an hong hmu tâka; an thu a lei irngai le lei irdonhaiin an va hmu tâka.

⁴⁷ A vâr le a sâm theizia an inhriatin a sân ar khêl an tia.

⁴⁸ A nu le pa khomin an hong hmu’n chu a sân ar khêl an tia, a nu khan, “Bonga, itho mo hianga ni ni ilo? Ni pa leh irthatâk vîkin nang kin izong mai tâk kêng,” a tia.

⁴⁹ “Itho mo nin ni izong? Ka pa ina ki om ti nin inhriat loi ma ni?” a tia.

⁵⁰ Khannisianlân, a sâm dân kha a’rngaina lam chang inhre mahai.

⁵¹ Khanchu, an kuang Nazaret-a fea, an thu zômin a oma, thil omzia hai murdi a nu’n a lungrîla a vong chiana.

⁵² Khan, Jisua kha taksa tiang le vârna tiang a hong irsôn tîr tîra, Pathian le mihriam inrenna le kanna a dong tîr tîr tâka.