LUKA 19 - PATHIAN LEKHABU IRTHIANG C.L. Bible (BSI)

Jisua le Zakaia

¹ Khan Jisua’n sûn palin Jeriko lût hrang a nia.

² Kha khan mi inkhat, a’rhming Zakaia a oma; khâzana irfuangtuhai hruaitu a nia, mi irchong tak a ni.

³ Jisua kha tu mo a inih ti hmu a tuma, mipui sika khan hmu thei maka, mi dung bong a ni sikin.

⁴ Khanchu a fena hrang lampuia an tâna, theipui kunga en hrangin a luia.

⁵ Jisua’n kha hmun kha a tungin chu a tanga, “Zakai, zuang chum lat roh, a vuan hin ni ina ki itung hrang kêng,” a tia.

⁶ A zuang chum lat lata, raifân takin an tungtir tâka.

⁷ Kha kha an hmu’n chu an rêngin, “Mi sual kuang tung hrangin a lût tâk so,” tiin an chiara.

⁸ Zakai kha a ngîra, Rengpa kuang khan, “Irngai ta, Rengpa, ki sum chimrip mi’nrianghai pe ki ta; tu chunga khom dikloi taka ki lei ilâkpai pe a omin chu a bâk minli’n tuam nôk ki ti,” a tia.

⁹ Jisua’n a kuang, “A vuan hin hi ina hin saninhringna a zuang tung ta, ama khom Abrahama nâipa a ni.

¹⁰ Mi irhmanghai zonga saninhring hrangin Mihriam Nâipa hi a izuang a ni,” a tia.

Rângachak sum chongirkhek thu

¹¹ Kha thu kha an irngai lai khan Jerusalem khom a hong nâi tâk sikin le Pathian Ram kha zuang tung zel hrangin an iam sikin, hi chongirkhek thu hi Jisua’n an sîr tâka.

¹² Hiang hin an sîra, “Mi lian inkhat, an lal theina hrang thu lâka hong kîr nôk hrangin kho lam hlataka fe a tuma.

¹³ A suak sômkhat a koihaia, rângachak sum inkhat a pêkhai senga, an kuang, ki om no kârin len pung roi,” a tia.

¹⁴ Khan, kha khuaa mihai khan an hnôla, “Hi pa hi rêng hrangin nuam ma ung” ti hrangin palai an tîr zui sa zôia.

¹⁵ “Inlalna thu kha a lâka, a hong kîr nôkin chu, sum a ipêkhai kha, an inpung zât inhriatna hrangin an koitira.

¹⁶ A hong masa tak khan, ‘Ka pu, ni rângachak sum kha sômin a pung,’ a tia.

¹⁷ Ama khan, ‘Suak sa, ni tho’n sa e, tômte chunga ni iam oma, kho sôm chunga hruaitu’n om roh,’ a tia.

¹⁸ Inhnina hongpu khom khan, ‘Ka pu, ni rângachak sum kha ringa’n a pung,’ a tia.

¹⁹ Ama’n chu, ‘Nang khom, kho ringa chunga hruaitu’n om roh,’ a tia.

²⁰ “A dang khom a honga, ‘Ka pu, en ta, ni rângachak sum kha, irthân huina puanin ki lei infûn chiana.

²¹ Mi ngar tak ni ni sikin nang ki chia; ni isia loi khom ni lâk ngaia, ni itû loi khom ni ât ngaia,’ a tia.

²² “Ama khan, ‘Suak sual, ni chongbâi suak rengata thiam nang inchang ma ung. Mi ngar tak ki nia, ki isia loi khom ki lâk ngaia, ki itû loi khom ki ât ngai nin hriat mo?

²³ Khano’nte, ki sum kha ithoa mo sum bepârhai kuang ni isia loi? ki hong kîrin a pung le ileh ki la isîng hrang kêng a ini,’ a tia.

²⁴ Khan, a kôla ngîrhai kuang, ‘A rângachak sum kha lapai pe unglân, sôm neitu kha pe roi,’ a tia.

²⁵ Anni khan, ‘Ka pu, ama’n chu sôm a nei khate!’ an tia.

²⁶ Ama’n an kuang, ‘Nangni ki hril, tukhom a neipu ka kai chu, pêk belsa ni a ta, a nei loi chu a inei sunte khom lâkpai pe rip ni a ti,’ a tia.

²⁷ Khan, hi ki râlhai inlal hranga ni inuam loituhai hi, hong hruai unglân, ki makunga that roi,” a tia.

Jisua’n roiinpui takin Jerusalem a lût

²⁸ Kha thu kha an sîr zoiin chu Jerusalem panin maton an sa tâka.

²⁹ Oliv tâng an itia om Bethfage le Bethani khua a tung tônin irchutirhai laia inhni a tîrhaia.

³⁰ “Ei maton khuaa son va fe unglân, nin va lûtin sakuartungte irthung, tûte la chuang ngai loina va hmu nin ta; sût unglân, hong kai roi.

³¹ Tu mo khatin, ‘Ithoa mo nin isût?’ nangni an ti khomin, Rengpa’n a innang kêng, tiin sam roi,” a tia.

³² Khanchu a itîrhai kha an fe tâka, an kuang a ihrilhai ang dênin an va hmua.

³³ Sakuartung kha an sût lai takin a neipuhai khan, “Sakuartung kha ithoa mo nin isût?” an tia.

³⁴ Anni khan, “Rengpa’n a innang kêng,” an tia.

³⁵ Jisua kuang an hong kaia, sakuartung chunga khan an puanhai an dâpa, a chunga Jisua kha an inchuangtir tâka.

³⁶ A fe tâka, lampuia khan an puanhai an dâp thiaia.

³⁷ Jerusalem tung tôn, Oliv tâng khêl tôna khan irchutir murdihai khan sinirkhêl an ihmu murdihai sikin an lôma, hnuk irhai inring takin an khêka, Pathian an inpâk tâka.

³⁸ “Rengpa irhminga hong chu, inpâkin om ri se, Irvâna irngei lêng sianlân, Anchungtaka khin roiinpuina om ri se,” an tia.

³⁹ Mipui laia Farisai senkhathaiin chu a kuang, “Irchutirtu, ni irchutirhai hi khaphai roh,” an tia.

⁴⁰ Ama khan a sâmhaia, “Nangni ki hril, hihai hi an dâihrekin chu hi lunghai lua hin an ikhêk suak hrang a ni,” a tia.

Jisua’n Jerusalem a châ

⁴¹ Khan, a hong nâi uala khopui a hong hmu’n chu a chap tâka.

⁴² “O nang lua’n a vuan ten hin irtharngamna lampui hi inhre tan lân chu! khannisianlân, atûn chu ni hmu loi hrangin ar thup ta.

⁴³ Ni râlhaiin nir hîlin kul siam an ta, nang irhualin kil tin ata nang an bei zoro la hong tung a ti:

⁴⁴ ni sûnga om ni nâihai ten luan nang pai rak an ti; ni sûnga lung irchon rêng rêng hôi no nihai, Pathianin nang a zuang kan lai kha nin hriat no sikin, kha kha ni chunga hong tung a ti,” tiin.

Jisua Tempila a lût

⁴⁵ Khan, Jisua chu Tempila khan a va lûta, neinun zuartuhai kha an hnot suakhaia,

⁴⁶ an kuang, “Ki in chu chongchaina in ni a ti, ti irziak a ni, nangni’n chu nakhrâtsonghai khura kêng nin siam ual tâk,” a tia.

⁴⁷ A nitin Tempila khan ar chutir ngaia, Ochai inlalhai le Dân irchutirpuhai khan, vântâng hruaituhai le, ama kha that irhmang an tuma.

⁴⁸ Khannisianlân, mipuihaiin a thu irngai an hnông thei no sikin, a tho lam dân an inhriat theiloi a ni.