LUKA 17 - PATHIAN LEKHABU IRTHIANG C.L. Bible (BSI)

Sual

¹ Khan, Jisua’n a irchutirhai kuang, “Tûknahai hi om no thei ni mah, khannisianlân, an omtirtu chung chu a rik e,

² Hi mi chîntehai laia inkhat khom hi an tûktir nêkin chu bu nôina lung lianpa a ringa inhlitira, tuikhangliana inthâk ni sian a ta hrangin sa ual a ti.

³ “Irdîn roi, ni urêngin ni chunga thil a tho’nsualin chu hril roh, a’rletin chu ngaidam roh.

⁴ Sûn khata ni chunga voisari thil a tho’nsualin voisari ‘Ki’rlet e,’ tia nangma tiang a hong irheiin chu ni ingaidam hrang a ni,” a tia.

Iamna

⁵ Tirtônhaiiin Rengpa kuang khan, “Kin iamna nin det pe roh,” an tia,

⁶ Rengpa khan, “Ancham ru malkhat dôr iamna nei unglân chu, hi thingtheimu kung kuanga hin ‘Irphôiin lân, tuikhangliana irson roh,’ ti nin ta, nin thu zôm a ti,” tiin a sâma.

Siahlo sintum

⁷ Nangni laia tukhomin mâni siahlo nei sian, irnêng tuka fe mo, kêlbelra ena fe mo a hong kîr le, “Hongin lân, bu hong ot zôi roh,” tu mo lei ti hrang?

⁸ Khasikin, ki bu nêk hrang siam ro, irsiamin lân, ki nêk zoi mâka chu ni don ro; kha zoi tika nêk ni ti, a iti loi hrang mo ni ma?

⁹ Nin thu anga a tho sikin nin siahlo chu lômthu nin hril ngai mo?

¹⁰ Khaang dênin nangni khom thupêk murdi nin tho zoi zit hnung khomin, “Siahlo takirtâi loi ei ni, ei itho tum kêng ei itho a ni, ti roi,” a tia.

Phâr sômkhat a indam thu

¹¹ Khan, Jisua Jerusalem a pan pumin Samari le Galili ramria a fea.

¹² Khua inkhata a lûtin chu, phâr sômkhat an honga; hla vita an ngîra;

¹³ an khêka, “Jisua, Hruaitupa, lung nin kham ro,” an tia.

¹⁴ Anni kha a hong hmuhaiin chu, “Fe ta unglân ochaihai van entir roi,” a tia. Khaanga an fe lai khan an hong irthiang tâka.

¹⁵ An laia inkhat khan a dam tâk ti ar hriat zoi le chu, irhai inring taka Pathian inpâk pumin a hong kîr nôk tâka.

¹⁶ Jisua ke bula khan a van boka, lômthu an sîr tâka. Kha mi kha Samari mi a ni.

¹⁷ Jisua khan a lei chongpuia, “Mi sômkhat kha nin irthiang infâi zit mo ni ma? Kuakhai kha khôn mo an om tâk?

¹⁸ Ithoa mo, hi ram dang mi vai hin, Pathian inpâk hrangin a hong ikîr nôk?” a tia.

¹⁹ Khanchu, a kuang, “Thoiin lân, fe roh, ni iamna hi ni dampuina a ni,” a tia.

Pathian Ram zuang tung

²⁰ Farisaihaiin Pathian Ram zuang tung hrang zoro an irdonin chu, Jisua’n an kuang, “Pathian Ram zuang tung chu mita hmu zât ni mah.

²¹ Tûte’n, ‘En ro, hi hin kêng a om,’ ‘So son kêng a om,’ ti no nihai. Irngai u ta, Pathian Ram chu nin laia hin a iom chian a ni,” a tia.

²² A irchutirhai kuang khan, “Mihriam Nâipa hring lai sûnhai hi sûn khatte lua nin ihmu nuam nî la hong om a ti, khannisianlân, hmu no chin ni.

²³ Nin kuang, ‘En u ta, so so mani, hi hi mani,’ la ti an ti; en hrangin fe suak no unglân, zuihai sa no roi.

²⁴ Irvâna kôlirtêkin kôlkung ata kôlkung dênin a ivâr ngai ang kha a ni, Mihriam Nâipa zuang Ni chu la nih a ti.

²⁵ Khannisian, atûnlai mihai hin la hnôl an ta, thil tamtak a ituang masa hrang a ni.

²⁶ “Nova zoro laia thil om dân ang khan Mihriam Nâipa zuang hrang nia khom a la iom hrang a ni.

²⁷ Nova irkuanga a lût ni dên khan mihai khan an fâkin an ina, dôngma pasal an irneia; tui a hong liana, an rênga a hong ithat irhmanghai tâk kha.

²⁸ Khaang dênin Lota dam laiin thil a iom kha; an fâkin an ina, an irchôka, an zuara, thil an phuna, in an sina;

²⁹ Khannisianlân, Sodom khua ata Lota a suak ni khan irvân ata mei le kât a thoa, an rêngin a thathai zita.

³⁰ Mihriam Nâipa a zuang tika chu khaang dên khan a ini hrang a ni.

³¹ Kha tika chu in chunga mi an omin chu in sûnga a neinun la hrangin chum no ri se.

³² Loia om chu kîr ta no ri se. Lota dôngma inhre mai roi.

³³ Tukhom mâni hringna inzôk nuam ka kaiin chu inchân a ta, tukhom mâni hringna inchân ka kaiin chu inzôk a ti.

³⁴ “Nangni ki hril, kha ni zâna khan mi inhni zâlhmun khata zâl an ta, inkhat chu ihruai ni a ta, inkhat chu mâksan ni a ti.

³⁵ Nupang inhni’n bu suk an ta, inkhat chu ihruai ni a ta, inkhat chu mâksan ni a ti.

³⁶ Mi inhni loia fe khom inkhat ihruai ni a ta, inkhat mâksan ni a ti,” a tia.

³⁷ Irchutirhai khan, “Rengpa, khôn mo?” an tia. Jisua’n, “Sa ruak omna kipa raikosohai khom omkhôm an ti,” a tia.